Luc 8

₁Tä tajyäme täjtso, Jesús ilunche hupuy lhäy'e wichi lew'etesas wet yen lhämeta Dios Silätyaj tä Is tä häpe Leniyatyaj. Wet lechufwenkay tä ihi doce yikche, ₂lhäy'e elhpej atsinhay tä Jesús pajche ichesthen tä t'inhayaj ihi, lhäy'e tä inuhatchephä ahät lhayis tä ihi. Elh lhamel häpe María tä õyen lheya Magdalena, lham häpe atsinha tä siete ahät lhayis inukwephä tä tälho. ₃Häte iyej lhamel atsinha tä lhey Juana, hin'o tä lhey Cuza tä lech'efwa, hin'otso häpe p'ante Herodes

₄Wujpe wichi tä tälhomche hupuyhas tä ihoye Jesús wet lhaihuthiwek tä lham ihi. Wet lham ifwenhomche lhämet tä itech'aynej täja wet yok:

₅–Iche p'ante hin'o tä n'utchenaj, yik tä tutchey. Wet tä itsäype honhat yachuyaj lhoy, iche iyhäj tä nichätho n'äyij, wet wichi t'äsche wet afwenchey tufw. ₆Iyhäj nichätho honhat lhip tä wuj tuntey, wet tä inuphä letälhes, yofwajkwet tamchäy, tsi wuj tä tamchäyhi honhat tä ihi. ₇Iyhäj nichätho ch'uthanil, wet tä inuphä letälhes, hap'akej t'at, wet ch'uthanil hip'o'pe. ₈Mat iche iyhäj tä nichätho honhat tä is, wet inuphä letälhes wet wuj lhay tä iwoye, yäk nichäte cienpej tä tälhe hätefwajni.

Häp täjtso lhämet Jesús, wet nech'e ifwitsenej lechos tä yok:

–¡Elh che lech'otey ihi, ch'ahuye täjtso!

₉Lechufwenkay tay'ätshaneje Jesús wet yok:

–¿Atsi m'ak tä häpe ämet häpet yachuyaj lhoy?

₁₀Lham nichulho wet yok:

–Häp amel õ'täfwnhat amejen m'ayhay tä nin'äla tä häpe Dios Niyatyaj. Mat iyhäj wichi otech'aynej at m'ayhay häp olhämtes tä ofwenho, häpkhilek tej che iyahin, mat hiw'enhit'a, wet tej che iläte, mat ihanhiyejt'a.

₁₁“Häp täja m'ak tä häpe olhämet tä otech'aynej m'ayek: Häp yachuyaj lhoy häpe Dios lhämet, ₁₂wet iyhäj tä nichätho n'äyij häpe wichi tä iläte Dios lhämet, mat näm ahättaj wet isoyej tä ihi lehusek yämthilek nichayaye wet nitfwaya. ₁₃Wet iyhäj yachuyaj lhoy tä nichätho honhat tä tuntey ihi, häpe lhamel tä iläte Dios lhämet wet wuj tä ihumin wet iti lhamejen. Mat tä hätet iwoyek lefwettsil ni'tofwahchä, pitajit'a lewhäy tä iwo lechayaja. Näm ifwala tä n'olhelhtshayaj nichäte, wet ileyej. ₁₄Wet yachuyaj lhoy tä nichätho ch'uthanil, häpe lhamel tä tach'ahuye Dios lhämet, mat tä iche m'ayhay tä yen tichunhayaja, lhäy'e lakhäywet, lhäy'e lakäjyajay, tähestso lhimphajpej tä hip'o'pe lechayaj wet iwohit'a lhaya. ₁₅Mat häp yachuyaj lhoy tä nichätho honhat tä is, häpe wichi tä lehusey matche tä isen wet tach'ahuye Dios lhämet, wet itihi lehusey, wet tä lhait'untejiche iwo lhaya.

₁₆“Ihichet'a elh che iwun lechäkw wet hip'o'pe wok itichufwi lemäwet, mat itonitphä yämthilek iyhäj tä ihochufwi lew'et hiw'enche honhat.

₁₇“Häp tä hätet iwoye täjtso, m'ak at che häpe che õ'iskat, õhn'älthila, wet m'ak at che häpe che õ'thahyen, õ'hanhiyeja wet kalelhäj.

₁₈“Tä mälhyejtso, tetshanay m'ak tä lelätaye. Elh che tach'ahuye m'ak tä oyäme, Dios y'isiyeja lhip lehanyaj. Mat elh che nitch'ahuyaye m'ak tä oyäme, Dios isohiyeja m'ak tä fwetaj ihanej.”

₁₉Jesús lech'inhis lhäy'e lako María ihoye häp lham, mat nichäthiyet'a tsi wujpe wichi tä lhaihutej. ₂₀Wet iche elh tä ifwenho Jesús wet yok:

–Ako lhäy'e hach'inhis i'alhoye, t'uhläk ahiw'en.

₂₁Mat lham nichulho wet yok:

–Häp lhamel tä iläte Dios lhämet wet iwoye, häp tä oko wet och'inhis.

₂₂Ifwala elh p'ante, Jesús tiyäjo chalana, lhäy'e lechufwenkay, wet tahuyej wet yok:

–N'ekhen, n'aho lewomek lhip elhe.

Tä lhamel yikhen ₂₃tä inu'pe inät, Jesús imä t'at. Wet näm yafwthitaj tä äytaji tä nichätho lewomek, wet inät nitsäylhaho lehi pajtha eyte y'uyhihchä. ₂₄Wet lhamel ihoye Jesús tä hin'omhatlhi wet yok:

–¡Maestro! ¡Maestro! ¡Y'ach'ahen!

Wet Jesús nephä, wet ifwone yafwthitaj lhäy'e inät tä iwo lhetheya wet yok:

–¡Wo atamseka!

Wet takasit yafwthitaj lhäy'e inät wet iwo letamseka. ₂₅Wet nech'e tahuyej lechufwenkay wet yok:

–¿Chip ihitso amel achayaj?

Lhamel wuj tä iseltejen wet nowayhen, wet yok:

–¿Atsi tä häpe hin'ona? ¡Tsi tahuye yafwthitaj lhäy'e inät, wet iwoye t'at lhämet!

₂₆Tä paj lhamel nichäte honhat tä lhey Gerasa, honhat tä tumej lewomek lhip elhe tä tatayhlä Galilea. _27-29Wet iche hin'o tä welantas länek tä ihi honhattso, pitaj lewhäy tä ahät lhayis ihi wet iwohit'a lew'uya. Häte ihit'achufwi lewukwe mat yen at lew'eta n'op'itseyhayw'etes. Wet ahät ikhajyenpej, wet tej che õyäytejpej chinhas häp takweyey lhäy'e takäläy yämthilek nemhit yik, mat yisthenpej, wet ahät istunpej, wet yik t'at tä ihoye lhip tä ts'anis.

Häpet tä Jesús inuhchä tä tälho chalana wet iho'pe ufw, ahät lhayis länektso hiw'ene wet ihoye. Tä nichäte, takhos katsi. Wet Jesús tahuye ahät tä ihi wet yok:

–¡Mäch'oye hin'otsi!

Wet hin'o wuj tä t'än wet yok:

–¿Chipte tä katach'anlhaya n'oye, Jesús, Dios tä N'owujtaj Lhäs? Olhaip'altsen ame, ¡yej wit'äyenn'o!

₃₀Wet Jesús tay'ätshane wet yok:

–¿Chiwoye ey?

Lham nichulho wet yok:

–Olhey Wujpey.

Iwoynejetso lhämet tsi wujpey ahät lhayis tä ihi. ₃₁Wet lhamel lhaip'altsene Jesús tä yok:

–¡Yej that n'oyehen chowej tä laj lech'oya tä oteläythayajw'et!

₃₂Iche p'ante wujpe kutsi lhayis tä t'ekwethä tä iwhäye chenaj. Wet häp tä ahät lhayis lhaip'altsene Jesús tä yok:

–¡Ch'anlha n'oyehen yämthilek otiyäjomche kutsi lhayis l'ini!

Jesús iwahnej t'at. ₃₃Wet ahät lhayis inukwephä tä tälho hin'otso wet tiyäjomche kutsi lhayis, wet lhamelna inukwe alhoho tä tälhpe tä nistakchä, yäk nichätho lewomek wet hich'ahen.

₃₄Wet häp hin'ol tä t'uyehen kutsi lhayis, tä lhamel hiw'en tä mälhyejtso, nowayhen wet inukwe alhoho. Tä nichäte hupuy, wet ifwenho wichi, lhäy'e iyhäj tä ilhipe hupuy, ₃₅wet wichi yikhen tä iyahne m'ak wit'äyna. Tä lhamel nichäte Jesús, wet hiw'en hin'o tä ahät lhayis pajche inukwephä tä ihi, lham tatayphäwhäye Jesús lepach'ol, nech'e lew'uy ihi, is t'at, nemhit häpe hin'o tä welan. Wet wichi wuj tä nowayhen. ₃₆Wet häp lhamel tä hiw'enej m'ayhay tä mälhyejentso, ifwenhomche iyhäj m'ak tä Jesús iwoye tä ichesat hin'otso. ₃₇Wet nilhokej wichi tä ihi honhattso tä Gerasa, lhamel yäme Jesús wet yok:

–Olhaip'altsen ame, ¡mäch'oye oka honhatna!

Tsi lhamel lhäy'e lhip tä nowayhen. Wet tä Jesús tiyäjo chalana yämthilek yik, ₃₈häp hin'o tä ahät lhayis inukwephä tä tälho, lhaip'altsene wet yok:

–Che letach'anlha n'oye, ot'uhläk oyik amche.

Mat Jesús nichulho wet yok:

–Kha, is tä lemälhehchä kana. ₃₉Mat äple haw'et wet en ämeta nilhokej m'ak tä Dios iwoyejne ame.

Wet hin'otso yik wet ifwenhomche nilhokej wichi tä ihi hupuy häp m'ak tä Jesús iwoyeje.

₄₀Tä Jesús tapile lewomek lhip elh, wichi tä inihich'oye lakäjyaj ihi wet tachumlä. ₄₁Wet näm hin'o elh tä itetshan n'ohusew'et lechumet, lhey Jairo. Tä nichäte Jesús, wet takhoschufwi wet wuj tä lhaip'altsene tä yok:

–Woye tä owoye, hoye ayej ow'et. ₄₂Tsi olhäse tefwaj'atni, hiw'en doce nekchämes, t'inhayaj ilän, wet athana tatäy lhimphaj wet ilehiyeja honhat.

Tä Jesús iläte, yikche häp hin'otso, wet wujpe wichi lhäy'e lhip tä hip'ajtit tä yik. ₄₃Wet iche atsinha tä iyej wichi tä yikhen, t'inhayaj ihi, w'oytaj tä ilänpej, wet ichespej, mat yachajopej, yäk doce nekchämes tä mälhyejpejtso. Wet nilhokej m'ak tä hiw'en noj t'at, tä tispej kachawo elh che häpe tä lham ihoye, mat niwohit elh che ichesat. ₄₄Wet atsinhatso iho w'echehi Jesús wet itsok lew'uy lhip. Häpet tä mälhyejtso, wet lew'oyis takasit.

₄₅Jesús tay'ätshane wichi wet yok:

–¿Atsin'e tä häpe tä itsokn'o?

Nilhokej wichi tä ihän, elhpej yok:

–Thayej, olhamhit'a.

Wet Pedro tahuyej Lewuk wet yok:

–Maestro, lew'en tä lhehi lechowej wichi tä aip'ajtit.

₄₆Mat Jesús tujlhache t'at tä yok:

–Matche, íchene elh tä itsokn'o. Olät lhame tä inuphä lhip okhajyhayaj.

₄₇Wet atsinha tä hiw'en tä nhanayej lhaiwoyneje che lhaiskat, yik tä ihoye, wet tachettiche, takhoschufwi, wet lhaifwel tä ihi tä nilhokej wichi tatache, yäme m'ak tä letichunhayaj tä lham t'uhläk itsok Jesús lew'uy, wet tä iwoynejetso m'ak tä iwoye iches t'at.

₄₈Tä ileyej, wet Jesús yok:

–Yäse, achayaj tä aichesat. Mäh, atamsek ihi.

₄₉Tä kamaj Jesús yämhoplhi atsinha, wet näm n'ochenek tä tälhe Jairo lew'et, iwo silätaye lham wet yok:

–Äsefwaj pajchene ileyej honhat. Yej lhaklitejlhi häp Maestro.

₅₀Mat Jesús iläte, wet tahuyej Jairo wet yok:

–Yej nuhat amho, mat chaye, wet äse ichesla.

₅₁Wet yikhen. Tä nichäte Jairo lew'et, takawoyhlä nilhokej wichi, tajlhama t'äne Pedro, Juan, lhäy'e Santiago, lhäy'e lhutsha lajcha lhäy'e lako. ₅₂Wet nilhokej wichi tafwchehchä tä yen tichunhayaja lhutsha. Mat Jesús yok:

–Yej tafwchehchä. Lhutsha y'inhit'a, imäfwaj t'at.

₅₃Tä wichi iläte, ischeyejen, tsi lhamel hiw'en tä y'il t'at lhutsha. ₅₄Mat nech'e Jesús tachuma takwey wet yok:

–¡Lhutsha, nephä!

₅₅Häpet tä mälhyejtso, yachajo tä iläy wet nephä. Wet Jesús yok:

–W'enho m'ak che tufw.

₅₆Wet lajcha lhäy'e lako wuj tä iseltejen. Mat Jesús tahuyej lhamel wet yok:

–Yej fwenhola elh at che häpe m'ak tä mälhyejtso.