1Häp Lhawuk tä laj letumfwaya yok:
–Lhek yahinya, ochunkatla lehilä oka silätwo häpkhilek iwaklhatche on'äyij. Wet olham tä ohäpe Awuk tä amel let'uyaykwe pajiyejt'ala che otiyäje Ow'et tä Ot'amajchet. Nämla t'at silätwo tä amel lewatayhlä tä nekchufwi olhämtes.
2Tha ¿atsihila tä iteläytej ifwala tä nämla? ¿Atsihila tä häpe che tumhilahlä? Tsi tehlat iwoye itäj tä isoyej chinaj lech'ohle, wet tehlat iwoye jabón tä ilanhi hin'o lech'ohle. 3Lhawuk tatayhiphäla tä ilejwethä sacerdotes tä Leví lepes lheley. Itech'aynhiyeja oro lhäy'e plata tä itäj isoyej lech'ohley tä iyej. Che tefwaytshi täjtso, nech'ehilak isen t'at lhamel häpkhilek iwo t'awayhataye Lhawuk m'ak tä t'uhawetej. 4Tä mälhyejtso, Lhawuk akäjiyejlhila t'awayhtes tä Judá lhayis lhäy'e Jerusalén lheley iwoye, tet iwoye tä akäjejlhi lhamel ifwalas tä pajchehen.
5Lhawuk tä laj letumfwaya yok:
–Onämla häpkhilek oti amejen okalelhthayaj. Äp ohäpkhila letayhfwa hayawul, lhäy'e lhamel tä itäkwyen lewuhuy, lhäy'e tä yäme m'ak tä kamatachehen, lhäy'e tä ithahyen chumhas lakaha, wet ilhaklitwethä tesalis lhäy'e chipenhas, lhäy'e tä iwit'äyen wichi tä kalew'et lheleya, wet äp nhuminan'o wet niwoyaye olhämtes.
Diezmo tä n'otw'ayhat
6“Ohäpe Awuk. M'ak tä ohäpe, ohäpe t'at. Wet häp tä amel tä aJacob lepes lheley äp aknittäyhiya t'at. 7Amel alew'enhatlä olhämtes, atet iwoye achätilis tä akachuhantses. Tapilay n'oye tä Awukn'o, wet äp oyäpnhila amejen. Mat amel lhoyay, ¿atsi m'ak tä is che owoye che oyäpil amej? 8Lhek tetshanay olhämet, oyok, ¿hä iwoye che hin'o t'etanchufwi Dios? Kha. Mat amel let'etanay n'ochufwi. Amel lhoyay, ¿atsi m'ak tä olhamel ot'etane? Amel let'etane otw'ayhtes, tsi lechäjit'a n'oye aka diezmos tä one'tek lew'en n'oho, lhäy'e iyhäj otw'ayhtes. 9Matche, nilhokej t'at amel tä let'etan n'ochufwi. Häp tä tamenej tä otkäpfwayej amehen awit'äyhyaj. 10Chäjay n'oye aka diezmos, tichufwi lhip tä lew'et tä ichufwi Owukwe häpkhilek iche n'olhäk. Elhtej n'oye häpkhilek ofwoyenche pule lepelis wet otsäyhla atapehen okäpfwayajay tä isen pajla'tha naya amejen. 11On'äyhiyejola aka yachuyaj che lewos tuj, tehla lhay iyhäj tä ihi akäsw'et. 12Wichi tä ihiche nilhokej honhatil yenla lhämeta tä ahäpehen wichi tä ische alhoho, tsi nech'e mathichela tä häpe honhat tä is amel aka honhat. Olham tä Awukn'o olhämet täjtso.”
Lhawuk hiw'enhathihena wichi tä isen lhäy'e iyhäj tä ni'isahen
13“Amel ämtes äyteschehen n'oyej”, Lhawuk iwoyetso. “Wet amel lhoyay, ¿Atsin'aj olhämtes tä tatay ahilä? 14Lhoyaynaj, W'et oyen at owuka Dios. ¿Atsi m'ak che olhamel oisej tä owoye lhämtes wet otw'uyhiche ow'uyis tä yelaj tä oyen tetneka lhamejen tä oyen lhakliya och'isukyajay tä ottayejlä häp lham Dios tä laj letumfwaya? 15Olhamel ow'en tä wichi tä lhaichäjwethä lakäjyaj ihiche, wet lhamel tä ni'isahen is t'at m'ak tä iyej. Tsi tä lhamel yelhte Dios, wet äp nichuwetaye.”
16Tä mälhyejtso, wichi tä iwujyen Lhawuk tahuy lhamejen, wet Lhawuk tach'ahuyehen. Wet äp õyenlhi n'olesaynek, õ'lesayen lheyis häp lhamel tä iwujyen Lhawuk wet iwoye lhämtes. Wet õ'tihi Lehi tä ihi tä Lhawuk tatache häpkhilek õyenpej tichunhayaja lhamel.
17“Che nichäte ifwala tä owo okalelhthayaja, lhamel häpkhila okäywet tä ot'amajchet”, iwoyetso Lhawuk tä laj letumfwaya. “Tsi op'altsenhihena, otehlat iwoye hin'o tä hip'altsen lhäs tä tach'ote. 18Häpkhilek yachajo tä letäfwelej wichi tä isen lhäy'e iyhäj tä ni'isahen, häp lhamel tä yen Lewukan'o wet iyhäj tä nena Lewukan'o.”
