Mat 13

₁Häp ifwalatso Jesús yikch'oye hup tä ihi wet ihoye lewomekitaj lhip wet tatayphä. ₂Wet tä wujpe wichi tä lhaihute, lham tiyäjo chalana wet tatayhiphä, wet wichi i'pe lewomek lhip. ₃Wet nech'e yäme wujpe m'ayhay, mat itech'aynej tähesna wet yok:

–Iche p'ante hin'o tä n'utchenaj, yik tä tutchey. ₄Wet tä itsäype honhat yachuyaj lhoy, iche iyhäj tä nichätho n'äyij, wet nämhen afwenchey wet tufw. ₅Iyhäj nichätho honhat lhip tä wuj tuntey wet niwuja honhat tä i'pe. Wet yofwajkwet tälh häp lhoy, mat tä honhat niwuja tä i'pe tuntey, ₆wet tä wuj tä chayokwe, y'ohen letälhes, wet tä lefwettsil ni'tofwahchä, tamchäy t'at. ₇Wet iyhäj nichätho ch'uthanil, wet tä ch'uthanil lhaichihelit, hip'o'pe. ₈Mat iche iyhäj tä nichätho honhat tä is, wet wuj tä iwo lhaya. Iche elhpej yachuyaj lhofwaj tä ihi cien lhay tä iwoye, wet elh sesenta, wet elh treinta.

₉“¡Elh chik lech'otey ihi, ch'ahuye täjtso!”

₁₀Lechufwenkay ihoye Jesús wet yok:

–¿Chipte tä letech'aynej m'ayhay häp ämtes tä lefwenho wichi?

₁₁Lham nichulho wet yok:

–Häp amel õ'täfwnhat amejen m'ayhay tä nin'äla tä häpe Dios Niyatyaj, mat iyhäj wichi tek õ'täfwnhatejen m'ayhaytso. ₁₂Tsi elh chik tach'ahuye m'ak tä oyäme, õy'isiyeja lhip lehanyaj yämthilek wuj. Mat elh chik nitch'ahuyaye m'ak tä oyäme, õ'sohiyeja lehanyaj lhimphaj tä iyej. ₁₃Häp tä tamenej tä otech'aynej m'ayhay häp olhämtes tä ofwenho lhamel, yämthilek tej chik iyahin, mat hiw'enhit'a, wet tej chik iläte, mat tach'ahuhiyet'a wet ihanhiyejt'a. ₁₄Wet lhamel t'at tä Dios lhämet p'ante tälhe profeta Isaías lhaimattejche tä yok,

₁₆“Mat häpet amel, Dios lakäpfwayaj tä is i'amejen, tsi lep'ot ihihit'a atelhoy wet hach'otey p'otes ihihit'a. ₁₇Matche tä ofwen amhohen, Wujpey profetas lhäy'e iyhäj wichi tä ische alhoho tä wuj tä t'up'antehläk hiw'en m'ak tä amel lew'enayna, mat hiw'enhit'a. Lhamel t'up'antehläk iläte m'ak tä amel lelätayena, mat iläthiyet'a.

₁₈“Tä mälhyejtso, lhek ch'ahuyaye m'ak tä häpe olhämet tä otech'aynej n'utchenaj. ₁₉Elh chik häpe chik iläte Dios lhämet tä yäme Leniyatyaj, mat nhanayej m'ak tä häpe, näm ahättaj wet isoyej m'ak tä ihi lehusek. Häp hin'otso hätet iwoye yachuyaj lhoy tä nichätho n'äyij. ₂₀Wet iyhäj yachuyaj lhoy tä nichätho honhat tä tuntey ihi, häpe wichi tä iläte Dios lhämet wet wuj tä ihumin wet iti lhamejen. ₂₁Mat tä hätet iwoye chik lefwettsil ni'tofwahchä, wujit'a tä t'unhiche lhamel, wet chik näm ifwalas tä atha len'äyij wok õ'tiyej n'oka'tshayaj lhamel, Dios lhämet tä tamenej, wet yofwajkwet ileyej. ₂₂Wet yachuyaj lhoy tä nichätho ch'uthanil, häpe wichi tä tach'ahuye Dios lhämet, mat wuj tä nilhak'alch'oye m'ayhay tä ihonhatena, wet ikan lhamejen tä inech'etpejlä wuj kolhki. Häp tähesna hip'o'pe Dios lhämet wet ihanhiyejt'a chik iwo lhaya. ₂₃Mat häp yachuyaj lhoy tä nichätho honhat tä is, häpe wichi tä tach'ahuye Dios lhämet wet ihanej wet iwo lhaya. Iche elhpej tä cien lhay tä iwoye, wet elh sesenta, wet elh treinta.”

₂₄Jesús ifwenho lhamel häp lhämet elhna wet itech'aynej täja wet yok:

–Häp Dios Niyatyaj hätet iwoye täja: Iche p'ante hin'o tä ithatchä yachuyaj lhoy tä isen tä itihi lelafwek. ₂₅Matkat tä nilhokej imähen, näm letayhfwa wet ithatchä cizaña tä tutcheype trigo wet yikch'oye. ₂₆Wet tä trigo inuphä, lhaichihelit wet iwo lhaya, mat häte n'äl cizaña tä lhahi. ₂₇Wet lakawos ihoye lewuk wet yok, “Iwuk, lhäme tä isen häp yachuyaj lhoy tä lethatchä tä ihi alafwek. Tä mälhyejtso, ¿chi tälhi cizaña tä lhayej?” ₂₈Lewuk yok, “Häpe t'at elh tä yenn'o letayhfwaya, häp tä iwoye täja.” Wet lakawos tay'ätshane wet yok, “¿Hä lehuminche chik olhamel ohoye yämthilek otonhiche cizaña?” ₂₉Mat lewuk nichulho wet yok, “Kha, tsi elat chik letonhiche cizaña, häte letonhihichela häp trigo. ₃₀Ch'anlhaye t'at tä yiklhayejphä yäk nichäte lewhäy chik õ'lanhi. Wet ofwenhihola oka chumhas oyohlak, Chunkat cizaña tä lehutwek wet nayhtho yämthilek õ'wunho. Wet chik leleyej, hutawek trigo wet tihila okapuchehi wet amajeja.”

₃₁Wet Jesús ifwenho lhamel häp lhämetna wet itech'aynej täja wet yok:

–Häp Dios Niyatyaj hätet iwoye mostaza lhofwaj tä hin'o tachuma wet itihi lelafwek. ₃₂Häpe t'at m'ak tä hich'atej tä lhämsaj, inu'pe yachuyaj lhoy iyhäj tä niwusa. Mat tä inuphä wet lhaichihelit, inu'pe nilhokej yachuyaj iyhäj yäk häpe hal'ä tä wuj, wet nämhen afwenchey wet iwo lhupisahi lhachal.

₃₃Wet elh lhämet tä ifwenho lhamel wet itech'aynej täja wet yok:

–Häp Dios Niyatyaj hätet iwoye levadura tä atsinha tachuma wet ikasoyej treinta kilos harina, wet iwojyenhi imälhewek.

₃₄Jesús iwoye nilhokej lhämtestso tä itech'aynej m'ayhay tä ifwenho wichi, wet ihichet'a lhämet chik iwoye chik nitech'aynayej m'ayek. ₃₅Wet häp tä mälhyej'attso tä lhayäm matche profeta lhämet p'ante yok:

₃₆Jesús iwo tsilhekayej wichi wet ihochufwi hup. Wet lechufwenkay ihowhäye wet yok:

–Kalelhät n'ohohen häp ämet tä letech'aynej cizaña tä ihi n'olafwek.

₃₇Jesús nichulho lhamel wet yok:

–Häp elh tä ithatchä yachuyaj lhoy tä isen häpe Hin'o Lhäs, ₃₈wet n'olafwek häpe honhat tä imälhewek. Yachuyaj lhoy tä isen häpe lhamel tä Dios Niyatyaj leles, wet cizaña häpe ahättaj leles, ₃₉wet elh tä ithatchä cizaña häpe t'at ahättaj. Yachuyaj tä õ'lanhi häpe ifwala chik honhat noj, wet lhamel tä ilanhi yachuyaj lhay häpehen ángeles. ₄₀Wet häp cizaña tä lewos ihutwek yämthilek ithatho itäj, häpe t'at tä mälhhiyejattso chik nichäte chik honhat noj. ₄₁Hin'o Lhäs ichenla laka ángeles häpkhilek ihutwek nilhokej wichi tä lhayej lham Leniyatyaj leles, häp lhamel tä iwoyepej m'ak tä ni'isa lhäy'e lhamel tä tamenej iyhäj tä iwoye lech'isukyaj. ₄₂Wet ithathiyela n'onhonthi tä itäj y'uho, wet ihihila lhafwyhayaj wet wuj tä äytaj. ₄₃Chik tajyäme täjtso, wichi tä iwoye Lajcha Dios lenech'ethayaj, hätehlat iwoye ifwala tä isi tä lhamel ihi lham Leniyatyaj.

“¡Elh chik lech'otey ihi, ch'ahuye täjtso!”

₄₄“Häp Dios Niyatyaj hätet iwoye n'okäywet tä õ'iskat tä ihi n'olafwek. Iche hin'o tä nilhoke wet wuj tä akäjejlhi. Wet yachajo tä iskat wet yik, iwom nilhokej m'ak tä lewuk yämthilek ichäj häp n'olafwektso.

₄₅“Häte Dios Niyatyaj hätet iwoye täja: Iche hin'o tä ichäj m'ayhay, lham t'ukwe n'olhamsilis tä isis. ₄₆Tä nilhoke elh tä wuj laha, yik, iwom nilhokej m'ak tä hiw'en wet ichäj häp n'olhamistso.

₄₇“Häte Dios Niyatyaj hätet iwoye täja: Iche w'ahatwos tä ithate lewomek hotanaj wet isakanej nilhokej w'ahat tä w'enhache lhamej. ₄₈Tä tapoyej hotanajtso, lhamel iton ufwe wet tatachephä tä t'ähi w'ahat, iyhäj tä isen ithathomche lehis, wet ithat kanhi iyhäj tä ni'isahen. ₄₉Häp tä mälhhiyejattso chik honhat noj, yikhila ángeles yämthilek hiw'enhat häp wichi tä ni'isahen tä lhayej iyhäj tä isen, ₅₀wet ithathiyela n'onhonthi tä itäj y'uho, wet ihihila lhafwyhayaj wet wuj tä äytaj.”

₅₁Jesús tay'ätshane lechufwenkay wet yok:

–¿Hä lehanayej nilhokej tähestso?

Lhamel nichulho wet yok:

–Ey'a.

₅₂Tä mälhyejtso, Jesús yok:

–Chik elh tä häpe lewo häp Ley p'ante tälhe Moisés, lhaichufwenej wet ihanej häpet Dios Niyatyaj, hätet iwoye hup lewuk tä hin'älitpej häp m'ayhay tä nech'ayhas lhäy'e m'ayhay tä pajchehen.

₅₃Tä Jesús ileyej lhämtestso, yikch'oye lhiptso ₅₄wet ihoye honhat tä lew'et. Tä ihi ichufwenpej wichi tä ihi n'ohusew'et. Tä lhamel iläte, wuj tä iseltejen wet yok:

–¿Chip'ante ihi tä lhaichufwenej nilhokej m'ayhay tä ihanej hin'otsi, lhäy'e m'ayhay tä yenlhi tä iselkatejen wichi? ₅₅¿Hä kahäpeya carpintero lhäs, wet hä kaMaría lhäsa, wet lech'inhis Santiago, José, Simón, lhäy'e Judas? ₅₆Wet nilhokej lech'inhälis lew'et t'at täja. ¿Chi tälhe nilhokej m'ayhayna tä iyej?

₅₇Wet Jesús len'ohyajtso iwäkyhayen lhamel. Mat lham yok:

–Ihichet'a profeta chik wichi yen w'et m'ayeka, tajlhame chik ihi honhat tä lew'etya, häp tä yen w'et m'ayeka.

₅₈Wet tä ihi hupuytso wujit'a m'ayhay tä iwoye tä iselkatejen wichi, häp lhamel lakachuhanyaj tä tamenej.