Mat 16

₁Häp Fariseo lhayis lhäy'e Saduceo lhayis, lhamel ihoye Jesús wet fwetaj ikanej wet yok:

–Lhek enlhi n'ohohen n'otetnek häpkhilek n'äl chik akhajyhayaj tälhe Dios.

₂Mat Jesús nichulho lhamel wet yok:

–Tä honaj amel lhoyaykwe, “Isilahchä, ifwala ihutunche len'äyij”, ₃wet tä nech'e fwala lhoyaykwe, “Isit'alahchä, pule ichäthi.” Tä lew'en m'ayhay tä iche pule, wuj tä lehanej m'ak tä yäme tä ihichela. Wet tä äp lew'en m'ayhay tä oyenlhi fwalasna, ¿chipte tä kahanayej m'ak tä yäme tä ihichela? ₄¡Wichi tä ihi fwalasna lhäy'e lhip tä ni'isahen wet ileyej m'ak tä is alhoho! T'alhch'oye n'otetnek, mat naya t'at n'otetnek tä häpe Jonás p'ante.

Tä iwoyetso, yikch'oye lhamel.

₅Tä lechufwenkay ihoye lewomek lhip elh, hip'ethatlä tä ichäj pan. ₆Wet Jesús ifwenhomche tä yok:

–Tetshan olhämet, uyayhlä häp Fariseo lhayis laka levadura lhäy'e Saduceo lhayis laka levadura.

₇Tä lechufwenkay iläte täja, yämwethä lhamhomche tä yok:

–Y'achäjit'a pan, häp tä tamenej tä iwoynejetso lhämet.

₈Mat Jesús nitäfwelej letichunhayaj wet yok:

–¿Chipte tä lhenay atichunhayaja pan tä kaw'enaya? ¡Ahäpehen hin'ol tä t'ekhahyaj lhimphaj! ₉¿Hä kamaj tek lehanayej? ¿Hä tek ahusekch'oye? Täjnaj ow'enhomche cinco pan häp cinco mil hin'ol, ¿chinaj hätefwas lehis tuskalis tä õyenlhi tä tapokwe lhipey tä imälhehi tä letachumaye? ₁₀Wet täjnaj ow'enhomche siete pan häp cuatro mil hin'ol, ¿chinaj hätefwas lehis tä tapokwe lhipey tä imälhehi tä letachumaye? ₁₁¿Chipte tä kahanayej tä häpkhit'a pan tä oyämene? Oyok, ¡uyayhlä Fariseo lhayis laka levadura lhäy'e Saduceo lhayis laka levadura!

₁₂Wet nech'e tä lhamel ihanej tä häpkhit'a levadura tä õ'tihi pan tä lham inowayhteje, mat häpe t'at Fariseo lhayis lechufwenyajay lhäy'e Saduceo lhayis lechufwenyajay.

₁₃Tä Jesús lhäy'e lechufwenkay nichäte honhat lhip tä hupuy tä Cesarea de Filipo ihi, wet tay'ätshane lhamel tä yok:

–Olham tä ohäpe Hin'o Lhäs, ¿atsi tä wichi yenek ohäpe?

₁₄Lhamel nichulho wet yok:

–Iyhäj yenek ahäpe Juan Bautista, iyhäj yenek ahäpe Elías, iyhäj yenek ahäpe Jeremías wok elh profetas iyhäj tä pajchehen.

₁₅Wet Jesús yok:

–¿Wet cho amel, atsi tä lhenayek ohäpe?

₁₆Simón Pedro nichulho wet yok:

–Ahäpe N'ofwayhthi tä Dios Chenek, häp Dios tä n'ilataj tä Lhäs.

₁₇Tä Jesús iläte, wet yok:

–¡Dios lakäpfwayaj tä is i'amej, Simón, Jonás lhäs! Tsi niwohit hin'o chik itäfwnhat amej täjtso, mat Ojcha tä ihi pule häp tä itäfwnhat amej. ₁₈Wet häte ofwen amho, ahäpe “Tunte”, wok oyok, Pedro, wet häp tuntena häpkhilek oyen lefwetesa oka wichi tä häpe Dios leles, wet n'ot'ilek lakhajyhayaj tek ikalhihila lhamel. ₁₉Ow'enla amho Dios Niyatyaj laka llaves, wet m'ak at chik häpe chik lefwenho oka wichi wet lhok, “Isit'a, yej woye”, - häte Dios n'äyhiyejola. Wet m'ak at chik häpe chik lefwenho oka wichi wet lhok, “Häp tä is, woye t'at”, - häte Dios iwahnhiyeja.

₂₀Wet nech'e Jesús ifwenho lechufwenkay wet yok:

–Yej fwenhola elh at chik häpe tä ohäpe t'at N'ofwayhthi tä Dios Chenek.

₂₁Tälhe täjtso Jesús nech'e ifwenho lechufwenkay tä yok:

–Lhek tetshan olhämet, iwohiyet'ak n'am hoye Jerusalén wet n'am teläytej m'ayhay tä hin'ol tä thänhäy wuj tä iti n'oyej, lhäy'e sacerdotes tä len'ohyajay ihiche, lhäy'e hin'ol tä lhayen lewosayej Ley p'ante tälhe Moisés. Õ'länlan'o, mat chik tres ifwalas onuhiphäla tä otälho n'op'itseyhay.

₂₂Tä Pedro iläte tä iwoyetso, ihänej kanhi wet ifwoneje tä yok:

–¡Kha, Iwuk! ¡Dios ihumnhichet'a chik mälhyejtso! ¡Tek awit'äyhyaj ihichela!

₂₃Mat Jesús nitilhaklä wet yok:

–¡Mä och'oye, Satanás, yej nulhi n'ohlä! Lehanhiyejt'a m'ak tä Dios t'uhläk iwoye, wet atichunhayaj häpe hin'o letichunhayaj t'at.

₂₄Wet nech'e Jesús ifwenho lechufwenkay wet yok:

–Elh chik häpe chik t'uhläk yen hänekan'o, is chik lhaifwonlä lham lenech'ethayaj wet tilhäj laka cruz wet nek n'okwe. ₂₅Tsi elh chik nit'uyahläk leteläythayaj ihi, tatäyhla. Mat häp elh chik matche tä ihänlhin'o wet ninowayaye leteläythayaj, häp tä lew'atshancheyaj ihiyeja. ₂₆¿Atsi m'ak chik hin'o isej chik ikalhi p'iya nilhokej m'ayhay tä ihi honhat, mat lham tatäy? Wok ¿chihätefwaj m'ak chik tiskanejpe p'iya yämthilek õyachaje lew'atshancheyaj? ₂₇Tsi Hin'o Lhäs nämla tä ihi Lajcha lewujyaj, lhäy'e laka ángeles, wet hiw'enhihola laha elhpej m'ak tä iwoye. ₂₈Matche tä ofwen amhohen, Häp iyhäj amel tä lheyay kana athana, y'inhihent'ala yäk hiw'enlä Hin'o Lhäs tä nek tä Leniyatyaj ihi.