Mat 25

₁Wet Jesús äp yok:

–Häp Dios Niyatyaj mälhhiyeja iwoye täja: Iche atsinha lhutshay tä ihi diez, lhamel ichuma lechäkwis wet yikhen yämthilek ichutej hin'o tä tawhayey. ₂Cinco lhamel tä lehusey ihi, wet cinco iyhäj tä laj lehuseya. _3-4Wet iyhäj tä lehusey ihi ichäj lhamej lhip aceite yämthilek itsäyho che y'im tä ihi lechäkw. Mat iyhäj tä laj lehuseya ichäjit'a lhamej lhip aceite. ₅Wet tä pajlä che näm hin'o tä tawhayey, nahati ilänhen nilhokej lhamel wet imähen.

₆“Wet tä honaj chowej pitsaje n'ot'änyaj tä yok, ¡Nech'e nek hin'o tä tawhayey! ¡Mäyay hoyayhlä! ₇Wet nilhokej atsinha lhutshay nechephä wet yenwethä lechäkwis. ₈Wet lhamel tä laj lehuseya tahuyej iyhäj tä lehusey ihi wet yok, W'en n'ohohen lhiphaj aka aceite, ochäkwis eyte y'omhihen. ₉Mat häp lhutshay tä lehusey ihi nichulho iyhäj wet yok, Ow'enhit'a amhohen, tsi che ow'en amhohen w'awulhit'ala n'oyejen wet w'awulhit'ala amejen. Mat is che lehoye hin'o tä iwom aceite wet chäj lhip tä lewatlä.

₁₀“Wet tä lhamel yikhen tä t'ukwe, nech'e näm t'at hin'o tä fwetaj inihihlä. Wet iyhäj tä wak'alhen yikche tä tiyäj lech'oye hup, wet õhp'ohi lepe, wet ihoye n'okäjyaj.

₁₁“Tä paj wet nämhen lhutshay iyhäj tä pajche t'ukwe aceite. Wet hiw'en tä õhp'ohi lepe wet yok, ¡Iwuk, iwuk, fwoyenche lepe! ₁₂Mat lewuk nichulho wet yok, Matche tä ofwel amho, Ontäfwenhit'a amejen.”

₁₃Wet Jesús y'isej lhämet tä yok:

–Häp tä oyok, yej tekm'ahatwethä, tsi lehanhiyejt'a fwala tä lewhäy wok hora tä häpkhila.

₁₄“Häp Dios Niyatyaj hätet iwoye täja: Iche hin'o tä yik tä ihoye honhat elh, t'änehen lakawos wet ichutthaynej lham lakäw'äj. ₁₅Wet itetshan m'ak tä elhpej lhamel ikalhi wet ihanej iwoyneje. Wet häp tä hiw'enho elh cinco talentos tä wuj laha, wet hiw'enho täkwfwas häp elh, wet elh hiw'enho weihalha. Wet lham yik tä iwo lew'ekyaja. ₁₆Wet häp lakawo tä õhw'enho cinco talentos, yofwajkwet yik wet iwo tesa tä ichumyenlhi wet ikalheji iyhäj cinco. ₁₇Wet elh tä õhw'enho täkwfwas häte ichumyenlhi wet ikalheji iyhäj täkwfwas. ₁₈Mat häp elh tä õhw'enho weihalha yikchufwi wet tajänch'oye lewuk käw'äj wet iskat.

₁₉“Pitaj lewhäy, tä paj tapil lewuk wet itetshan m'ak tä lakawos iwoye. ₂₀Ichun tä näm elh tä lewuk hiw'enho p'ante cinco talentos, wet yok, Iwuk, lew'ente n'oho cinco. Athana onachaj ame wet op'ajtej cinco iyhäj tä okalheji.

₂₁“Lewuk nichulho wet yok, Wuj tä is, ahäpe okawo tä lehusek ihi lhäy'e tä afwtintsaj. Tä let'amajej m'ak tä niwuja, oayenla lewoyayej häp m'ak tä wuj. Mäh, hoye okäjyaj wet n'awo lhakäjyaja.

₂₂“Wet äp näm elh tä lewuk hiw'enho p'ante täkwfwas talentos, wet yok, Iwuk, lew'ente n'oho täkwfwas. Athana onachaj ame wet op'ajtej täkwfwas iyhäj tä okalheji.

₂₃“Lewuk nichulho wet yok, Wuj tä is, ahäpe okawo tä lehusek ihi lhäy'e tä afwtintsaj. Tä let'amajej m'ak tä niwuja, oayenla lewoyayej m'ak tä wuj. Mäh, hoye okäjyaj wet n'awo lhakäjyaja.

₂₄“Mat tä näm lakawo elh tä lewuk hiw'enho p'ante weihalha talento, tahuyej lewuk wet yok, Iwuk, ontäfwel amej tä ahäpe hin'o tä t'un, wet lelanhi lhay tä wak'alh tä tälhe iyhäj lechumet wet lehutwek m'ak tä kathatahchä. ₂₅Häp tä tamenej tä onoway ame wet otjänch'oye tä oskat akäw'äj. Athana onachaj ame m'ak tä alewuk, chuma.

₂₆“Mat lewuk nichulho wet yok, ¡Ahäpe okawo tä ni'isa tä n'etäjej lechumet! Tä lehanej tä olanhi iyhäj lechumet lhay tä wak'alh wet ohutwek m'ak tä n'am thatchä, ₂₇isin'aj che lehäne banco lewos okäw'äj, wet tä otpil, lhamel inachajin'e n'oye wet hip'ajthiyejn'e lhip.

₂₈“Wet lewuk nitilhake lhamel tä iyej wet yok, Soyej talento tä iyej, w'enho elh tä hiw'en diez. ₂₉Tsi elh che häpe tä hiw'en, õy'isiyeja lhip, wet lhäy'ehila lhip m'ak tä iyej. Mat häp elh tä niw'ena, õ'sohiyeja lhimphaj tä iyej. ₃₀Wet häp okawo tä ni'isa thate honataj tä alhoye, häpkhilek ihi lhafwyhayaj wet wuj tä äytaj.”

₃₁Wet Jesús tujlhache lhämet wet yok:

–Che näm Hin'o Lhäs tä ihihila lewujyaj, lhäy'e nilhokej ángeles, lham itayhiphäla'pe leniyatyaj tä isilataj. ₃₂Wet wichi tä ihiche nilhokej honhates lhaihutlawek tä ihi tä lham itayche, wet hiw'enhatla, mälhhiyeja iwoye tson'ataswo tä hiw'enhat leläy tson'atas tä iyej kayla lhayis. ₃₃Häp tson'atas itumthiyeja lhip tä lefwomkat, wet kayla lhayis itumthiyeja lets'amkat.

₃₄“Wet Niyat tahuyhiyeja lhamel tä ihi lefwomkat wet yohlak, Lhuyay, amel tä Ojcha iti amejen lakäpfwayaj tä is. Chumayhlä n'oniyatyaj tä õ'waklhat amhohen tälhe tä õyenlhi honhat. ₃₅Tsi tä ochuyu naji, lew'enay n'oho m'ak tä otufw. Ochim naji, wet lew'enay n'oho inät. Lajnaj ow'eta, wet lewoyay ow'eta. ₃₆Lajnaj ow'uya, wet lew'enay n'oho ow'uy. Äytaj ilännajn'o, wet lesikay n'oye. Oihinaj n'op'onthi, wet lehoyay n'oye.

₃₇“Wet häp lhamel tä isen yohlak, Iwuk, ¿atsin'aj ifwala tä olhamel oahiw'en tä lechuyu, wet ow'en amho m'ak tä letufw? ¿Wok lechim n'aji, wet ow'en amho inät? ₃₈¿Wok lajn'aj haw'eta, wet owo haw'eta? ¿Wok lajn'aj haw'uya, wet ow'en amho haw'uy? ₃₉¿Wok äytaj ailän n'aji, wok lhehi n'op'onthi, wet osikay ame?

₄₀“Wet Niyat nichulhihola, yohlak, Matche tä ofwel amhohen, Häp m'ak tä lewoyayeje elh at che häpe häp oiyhäjfwasna tä w'et m'ayhay t'at, olham t'at tä lewoyej n'oye.

₄₁“Wet nech'e Niyat tahuyhiyeja lhamel tä ihi lets'amkat wet yohlak, ¡Mäyay och'oye, amel tä awit'äy i'amejen! ¡Hoyaye t'at itäj tä n'oma tä õ'waklhatho ahättaj lhäy'e laka ángeles! ₄₂Tsi ochuyu naji, wet tek lew'enay n'oho m'ak che otufw. Ochim naji, wet tek lew'enay n'oho inät. ₄₃Lajnaj ow'eta, wet tek lewoyay ow'eta. Lajnaj ow'uya, wet tek lew'enay n'oho ow'uy. Äytaj ilännajn'o, wet äp oihinaj n'op'onthi, wet tek lesikay n'oye.

₄₄“Wet lhamel tay'ätshanhiyela Niyat wet yok, Iwuk, ¿atsin'aj ifwala tä olhamel oahiw'en tä lechuyu wok lechim, wok laj haw'eta wok laj haw'uya, wok äytaj ailän wok lhehi n'op'onthi, wet olhamel n'am tach'ot ame?

₄₅“Wet Niyat nichulhihola, yohlak, Matche tä ofwel amhohen, Tä niwohit m'ak che lewoyeje elh che häpe häp oiyhäjfwasna tä w'et m'ayhay t'at, olham t'at tä kawoyayej n'oye.”

₄₆Wet Jesús y'isej lhämet tä yok:

–Häp wichina tiyäjiyela n'otasnhayaj tä t'un, wet lhamel tä isen tiyäjiyela n'ow'atshancheyaj tä t'un.