Mat 27

₁Tä nech'e fwala nilhokej sacerdotes tä len'ohyajay ihiche, lhäy'e hin'ol tä thänhäy, lhamel y'ajwekej m'ak tä t'uhläk iwoyeje Jesús yämlek õ'län. ₂Wet yäyitlhi wet yikchufwi tä ihäne Pilato, häp gobernador tä Romano.

₃Judas, häp elh tä yachaj Jesús, tä hiw'en tä kalelhäj tä õ'tiyej letes Jesús, nech'e äytaj letichunhayaj. Wet yikchufwi chinaj t'äj tä treinta tä yachaje sacerdotes tä len'ohyajay ihiche lhäy'e hin'ol tä thänhäy, ₄wet yok:

–Owo och'isukyaja, oyachaje t'ilek hin'o tä lajit letesa.

Mat lhamel nichulho wet yok:

–Y'ajit'a n'oyehen täjtso. Alewuk t'at.

₅Tä Judas iläte lhamel, tachuma chinaj t'äj wet itsäy katsi tä ihi Dios Lew'et. Wet yik wet lhaifwuhatlhi.

₆Wet sacerdotes tachuma chinaj t'äjtso wet yok:

–Chinaj t'äjna, w'oyis tä laha, isit'a chik y'athate Dios t'awayhtes.

₇Tä mälhyejtso, y'ajwek letichunhayaj wet ichäjej n'olafwek tä lhey Iyätewow'et, yämlek wichi tä w'enha lhamejen lep'itseyhay lew'et t'at. ₈Häp tä tamenej tä yäk häp fwalasna n'olafwektso lhey t'at W'oyisw'et. ₉Wet mälhyejtso tä lhayäm matche profeta Jeremías lhämet p'ante yok, “Lhamel tachuma chinaj t'äj tä treinta, laha tä Israel lhayis itihi häp lham, ₁₀wet ichäjej n'olafwek tä lewuk iyätewo, mälhyej tä Lhawuk ne'tek owoye.”

₁₁Wet Jesús takasit tä ihi tä gobernador Pilato tatache. Wet Pilato tay'ätshane wet yok:

–¿Hä ahäpe Judío lhayis Kaniyat?

Jesús nichulho wet yok:

–Am t'at tä lewoyetso.

₁₂Wet sacerdotes tä len'ohyajay ihiche, lhäy'e hin'ol tä thänhäy, lhamel y'ithatejlhi letes, mat yok tam. ₁₃Wet häp tä Pilato tay'ätshane wet yok:

–¿Hä ämet ihichet'a? ¿Chiwoye m'ak tä lhamel y'ithatlhi amej?

₁₄Mat Jesús ihichet'a m'ak chik nichulho. Wet gobernador lhäy'e lhip tä iseltej.

₁₅Tä n'okäjyajpej tä Pascua, gobernador yen p'ante lakeya tä inuhatphä n'op'ok weihalha, häp elh chik häpe chik wichi tatshupiye. ₁₆Wet nekchämtso iche n'op'ok tä letoyaj ihi tä lhey Jesús Barrabás. ₁₇Tä mälhyejtso, tä wichi tä wuj lhaihutwek, Pilato tay'ätshane tä yok:

–¿Atsi elh tä let'uyayhläk onuhatphä? ¿Häp Jesús Barrabás, wok Jesús tä õyen lheya N'ofwayhthi tä Dios Chenek?

₁₈Tsi ihanej tä m'ak tä tamenej tä lhamel yachaje Jesús, häpe t'at t'äytenyaj tä itiyej.

₁₉Wet tä Pilato tatayphä tä ihi n'okalelhthayajw'et, lech'efwa iwo chenekaye tä yok:

–Yej amtejej hin'o tä is alhoho. Tsi lham tä tamenej tä wuj tä ni'isa ofwilhek honajche mathi wet wuj tä oyen tichunhayaja.

₂₀Mat sacerdotes tä len'ohyajay ihiche, lhäy'e hin'ol tä thänhäy, ikalhi t'at wichi tä ne'tek t'alhe Barrabás wet õ'län Jesús. ₂₁Wet gobernador yachajo tä tay'ätshane wichi wet yok:

–¿Atsi elh tä lewatayhläk oleyej?

Lhamel yok:

–¡Barrabás!

₂₂Wet Pilato äp yok:

–Chik mälhyejtso, ¿atsi m'ak chik owoyeje häp Jesús tä õyen lheya N'ofwayhthi tä Dios Chenek?

Nilhokej nichulho tä yok:

–¡P'ajtej cruz!

₂₃Wet Pilato yok:

–¿Mat atsin'aj m'ak tä ni'isa tä iwoye?

Mat lhamel lhäy'e lhip tä ifwitsenej tä t'änhen tä yok:

–¡P'ajtej cruz!

₂₄Tä Pilato hiw'en tä nikalhahi lhamel mat nem koyhyaj tä fwitses, wet t'alhch'oye inät, wet ilejchehen takweyey tä ihi tä lhamel itayche, wet yok:

–Otes ihihit'ahlä hin'ona t'ilek. Amel t'at tä alewuhuy.

₂₅Wet nilhokej lhamel yok:

–¡Matche, olewuhuy t'at, lhäy'e oles!

₂₆Wet nech'e Pilato inuhatphä Barrabás wet ne'tek sip'äl itasinlhi Jesús. Tä ileyej, yachaje lhamel yämlek hip'ajtej cruz.

₂₇Sip'äl ihäne Jesús häp gobernador lew'et wet ne'tek nilhokej sip'äl iyhäj lhaihutej. ₂₈Wet lhamel ilanhi Jesús lew'uyes wet hiw'uyyenhi elh tä ifwak'an. ₂₉Wet ifwinche ch'uthanil tä lhamel yen coronaya wet iti'pe Jesús lhetek, wet itihi takwey tä lefwomkat häp hal'ä. Wet itsinen lakamchetey tä ihi tä itayche, wet iläkwlhi tä yopej:

–¡Amtena, Judío lhayis Kaniyat!

₃₀Wet ifwats'unlhi wet y'ajejlhi lhetek hal'ä. ₃₁Tä ileyej tä iläkwlhi, wet ilanhi n'ow'uy tä ifwak'an wet yachajpe lham lew'uyes, wet yikchufwi yämlek hip'ajtej cruz.

₃₂Tä lhamel yikhen, nichutej hin'o tä Cirene lhele tä lhey Simón, wet ilhuhyenej Jesús laka cruz.

₃₃Wet lhamel ihäne lhip tä lhey Gólgota, wok õyok, N'olhetek Lhilew'et. ₃₄Tä nichäte, wet fwetaj hiw'enho vino tä õ'kasoyej m'ak tä tapay, mat tä yelhte, iyähiyejt'a.

₃₅Wet tä lhamel hip'ajtej cruz, ikoyej suerte yämthilek hiw'en lhamhomche lham lew'uyes. ₃₆Tä ileyej, wet tatachephä yämthilek t'uye häp lham.

₃₇Wet hip'ajtej cruz lhip tä tumphä tä i'pe Jesús lhetek häp n'olesaynek tä yäme m'ak tä tamenej tä õ'län tä yok, “HÄP TÄJA JESÚS, JUDÍO LHAYIS LAKA NIYAT.”

₃₈Wet iche hin'ol täkwfwas tä etantses tä tan'isej Jesús tä õhp'ajtej cruz, elh tumej lhip tä lefwomkat wet elh ihi lets'amkat.

₃₉Wet häp wichi tä nekche lhip iläkwlhi Jesús, wet ilanwethä lhethey tä ischeyhilhi leläkwyhanyaj ₄₀wet yok:

–Am let'un'ajläk lewasthi Dios Lew'et wet chik fwalas tres lefwetaj leneyhthiphäla. ¡Lhek afwayhat! Chik ahäpe Dios Lhäs, ¡lhek nuhchä tä lhe'pe cruz!

₄₁Wet häp sacerdotes tä len'ohyajay ihiche, lhäy'e hin'ol tä lhayen lewosayej Ley p'ante tälhe Moisés, lhäy'e hin'ol tä thänhäy, lhamel leläkwyhanyajay mälhyet iwoye iyhäj, wet yok:

₄₂–¡Lham ifwayhthen iyhäj mat ihanhiyejt'a iwoyneje chik lhaifwayhat! Fwetaj häpe Israel lhayis Kaniyatpa. ¡Is chik inuhchä athana tä i'pe cruz, häpkhilek y'achaye! ₄₃Ichaye Dios. ¡Is chik Dios ifwayhat athana, chik ihumin! Tsi lham yok, “Ohäpe Dios Lhäs.”

₄₄Wet häp etantses tä tan'isej häte itiyej leläkwyhanyaj.

₄₅Tälhe tä ifwala ikanhi yäk tres horas honatsi i'pe nilhokej honhat. ₄₆Wet tä hora tres tä honaj Jesús ifwitsenej tä t'än tä yok:

–Elí, Elí, ¿lema sabaktani?

(Häp lhämet tä yok, Ika Dios, ika Dios, ¿chipte tä lewomn'o?)

₄₇Wet häp wichi tä iyej, iche iyhäj tä iläte wet yok:

–Hin'oni t'änch'oye profeta Elías.

₄₈Häpet tä mälhyejtso, elh lhamel inu alhoho tä yike esponja, wet y'uytho vino tä tapay, wet yäytej kanohi wet ipiyne Jesús wet yok:

–Ts'uhi.

₄₉Mat iyhäj yok:

–Teji, elat näm Elías wet ifwayhat p'iya.

₅₀Jesús yachajo tä ifwitsenej tä t'än wet y'il. ₅₁Häpet tä mälhyejtso, häp Dios Lewukwech'o lep'ot tä sak'al nech'e hikw'esche, tälhe tä tumphä yäk nichäte tä honhate. Wet honhat w'ahu, wet tuntey tä wus ipofwohen. _52-54Wet häp sip'äl kaniyat tä t'uye Jesús lep'itsek, lhäy'e sip'äl iyhäj tä iyej, tä lhamel hiw'en häp honhat w'ahu lhäy'e m'ak tä mälhyejtso, lhamel wuj tä nowayhen wet yok:

–¡Matche tä hin'oni häpe Dios Lhäs!

Wet n'op'itseyhay lehis tafwochehen wet wujpe Dios laka wichi tä pajche y'inhen nech'e yachajo tä iläyhen. Wet tä äp nichäte ifwala tä Jesús inuphä tä tälho n'op'itseyhay, häte lhamel, wet tiyäjo Jerusalén, hupuy tä Dios T'amajchet, wet wujpe wichi hiw'en.

₅₅Häte iche wujpe atsinhay tä atofweho, iyahne t'at Jesús tä y'il. Häpehen lhamel tä pajche nekche Jesús tä tälhe Galilea wet tach'ote. ₅₆Iyej lhamel María Magdalena, lhäy'e Zebedeo lech'efwa, lhäy'e elh María tä leles Santiago lhäy'e José.

₅₇Tä tatäy lhimphaj chik fwala y'uy, näm hin'o tä lhey José. Lham häpe elh tä hiw'en m'ayek, tälhe hupuy tä Arimatea, wet häte häpe t'at elh tä yen lehäneka Jesús. ₅₈Hin'otso ihoye Pilato wet t'alhe Jesús lep'itsek, wet Pilato ne'tek õhw'enho. ₅₉Wet José tachuma wet ikäfwlejche sak'al lhota tä ipelaj tä najit lech'ohleya. ₆₀Wet yikchufwi, ihäne lep'itsekw'et tä lham tä lewuk tä ihi chenaj, pajichet'a tä wak'alh, wet häp tä itihi. Wet ihutho lepe tunte tä wuj, wet yik. ₆₁Wet María Magdalena lhäy'e elh María tatachephä t'at tä ihi tä n'op'itsekw'et tatache.

₆₂Tä ifwala elh, häp ifwala tä n'ot'elakw'et, häp sacerdotes tä len'ohyajay ihiche lhäy'e Fariseo lhayis, lhamel ihoye Pilato ₆₃wet ifwenho tä yok:

–Ika niyat, olhamel ohusekch'oye häp kantsajtso lhämet n'aji tä iwoye tä kamaj iläy tä yok, “Chik tajyäme tres ifwalas, onuhiphäla tä otälho n'op'itseyhay.” ₆₄Häp tä is chik lechene sip'äl yämthilek lhäy'e lhip tä t'uye häp n'op'itsekhitso yäk tres ifwalas. Tsi elat nämhen lechufwenkay wet t'etane lep'itsek, wet ifwenhihola wichi tä yok, “Inuphä.” Wet chik lepese n'otkanyajtso hich'atej, inuhla'pe elh tä ichun.

₆₅Pilato nichulho lhamel wet yok:

–Eh, tä amel lehanej, mähen, hoyaye n'op'itsekw'et, lhäy'e sip'äl, wet uhyene.

₆₆Wet lhamel yikhen. Tä nichäte, wet yäm t'unhi tunte tä õhp'oyeji lepe, wet itiyej sello wet hin'äyej sip'äl yämthilek t'uye.