Mat 5

₁Tä Jesús hiw'en wichi tä wuj, iho'pe chenaj wet tatayphä. Wet lechufwenkay ihoye, ₂wet lham iwo tesa tä iwo lechufwenyaja wet yok:

₃–Dios lakäpfwayaj tä is iyejen lhamel tä ihanej ihi tä ts'ilak Dios lep'altsenyaj tä isej, wet yok, “Matche tä owatlä.” Lhamel häpehen t'at Leniyatyaj lewuhuy.

₄“Dios lakäpfwayaj tä is iyejen lhamel tä lefwitajayaj ihi. Dios ikäsyenlawethä lhamel.

₅“Dios lakäpfwayaj tä is iyejen lhamel tä lhayene iyhäj tä w'et m'ayhay t'at. Lhamel ikathiyeja honhat tä Dios ifwenho.

₆“Dios lakäpfwayaj tä is iyejen lhamel tä hätet iwoyek ichimejen wet ichuyuhlä tä iwatlä m'ak tä Dios ihuminche. Dios yipsaynhiyejena m'ak tä iwatlätso.

₇“Dios lakäpfwayaj tä is iyejen lhamel tä hip'altsenhen iyhäj. Dios hip'altsenhenla lhamel.

₈“Dios lakäpfwayaj tä is iyejen lhamel tä lehusey ts'ilak. Lhamel hiw'enla Dios.

₉“Dios lakäpfwayaj tä is iyejen lhamel tä yenlhi iyhäj letamsek. Lham yohlak, Oles lhameltsi.

₁₀“Dios lakäpfwayaj tä is iyejen lhamel tä wichi itiyej laka'tshayaj tä lhamel iwoye m'ak tä lham ihuminche. Lhamel häpehen t'at Leniyatyaj lewuhuy.

₁₁“Dios lakäpfwayaj tä is i'amejen chik wichi ailäkwethä tä lehänn'o, wet iti amejen laka'tshayaj lhäy'e lesufwkanyajay tä w'enhahiche. ₁₂Wo akäjyaja, akäsyenwethä, tsi wujla awayhat tä ipuleye. Tsi mälhyej'attso profetas p'ante pajche, wichi itiyej p'ante laka'tshayaj.

₁₃“Amel ahäpehen nisoy yämthilek nilhokej wichi tä i'pe honhat isej. Mat chik nisoy nem nosoy, ihanhiyejt'a lhaiwoyneje yämthilek yachajo tä nosoy. Oyok, nemhit is, õ'wom wet wichi t'äsche.

₁₄“Amel ahäpehen wichi tä i'pe honhat laka isi. Hupuy tä i'pe chenaj tä atojphä, ihanhiyejt'a chik lhaiskat. ₁₅Wok hin'o chik iwun lechäkw, wet tek hip'o'pe, mat itonitphä yämthilek ihutunpe nilhokej wichi tä ihi lew'et. ₁₆Wet amel is chik amälhyet iwoye täjtso, aka isi ihutunpe tä ihi tä wichi itayche, häpkhilek lhamel hiw'en m'ak tä is tä lewoyaye wet iwunit Ajchayay tä ihi pule.

₁₇“Yej lhenayek onek yämthilek otäyhat häp Ley p'ante tälhe Moisés wok n'ochufwenyajay tä tälhe profetas. Tek otäyhat, mat otäfwnhatej wichi m'ak tä lhamya tä häpe tähestso. ₁₈Matche tä ofwen amhohen, Chik kamaj iche pule lhäy'e honhat, nofwit'ala Ley p'ante tälhe Moisés, wok letrafwaj wok puntofwaj chik häpe, yämthilek lhayäm matche nilhokej m'ayhay. ₁₉Häp tä tamenej, chik elh chik häpe inäk'äs weihalha n'olhämtes p'antetso, tej chik niwuja, wet ichufwenej wichi m'ak tä lham iwoye, oyok, õyenla häpeya hin'o tä niwuja tä ihi Dios Niyatyaj. Mat häp elh chik iwoye wet ichufwenejen wichi, õyenla häpeya hin'o tä wuj tä ihi Dios Niyatyaj. ₂₀Wet häp tä ofwen amhohen, Chik ha'isyaj tä lewoyaye ninuya'pe Fariseo lhayis le'isyaj, lhäy'e hin'ol tä lhayen lewosayej Ley p'ante tälhe Moisés, tek lechäthihola Dios Niyatyaj.

₂₁“Amel lelätache n'olhämet p'ante õ'fwenho lhachätilis tä õyok, Yej lelän aelh, tsi elh chik ilän elh õ'hänhiyela n'okalelhthayajwos yämthilek itiyej letes. ₂₂Mat olham ofwen amhohen tä oyok, Elh chik häpe chik tawäkwäye lepuhfwa, letes ihi. Wet elh chik yen w'et m'ayeka lepuhfwa, õ'hänhiyela Concilio tä Lhamya tä ihi Jerusalén. Wet elh chik yen isuka lepuhfwa, õ'chätyenhihola n'oteläythayaj tä t'un lew'et tä häpe itäj.

₂₃“Tä mälhyejtso, chik lewo t'awayhata Dios, wet ahusekch'oye tä iche m'ak tä tamenej tä apuhfwa ayen tayhfwaya, ₂₄n'äy ayejwhäye Dios t'awayhat häp altar tä ihi Dios Lew'et, wet chunkat hoye ayej apuhfwa wet a'isyene. Wet chik leleyej, äple Dios Lew'et wet nech'e lhachaje Dios m'ak tä lhen t'awayhata.

₂₅“Chik iche elh tä iti amej ates wet ihän ame n'okalelhthayajw'et, is chik yofwajkwet ale'isyene tä kamaj lheyayhi n'äyij. Tsi chik nimälhyayejtso, ayachajiyela n'okalelhthayajwo, wet n'okalelhthayajwo ayachajiyela n'op'onthiwo, wet ithat amho n'op'onthi. ₂₆Matche tä ofwen amho, Tek lenuhiphäla pajla'tha noj aka chinaj t'äj tä letiskanej atape.

₂₇“Amel lelätache n'olhämet p'ante pajche tä yok, Yej wo akain'oyaja. ₂₈Mat olham ofwen amhohen tä elh chik häpe chik iyahin atsinha wet ikäne, oyok, hin'otso lehusek iwoyeje lakain'oyaj.

₂₉“Tä mälhyejtso, chik atelho tä afwomkat tamen amej tä lechätho asukyaj, lanhi wet wom, häpkhilek nitmenayej mälhewek asan chik õ'thatho n'oteläythayaj tä t'un lew'et. ₃₀Wet chik akwey tä afwomkat tamen amej tä lechätho asukyaj, iset wet wom, häpkhilek nitmenayej mälhewek asan chik õ'thatho n'oteläythayaj tä t'un lew'et.

₃₁“Häte õyop'antekwe, Hin'o chik häpe chik iwom lech'efwa, is tä hiw'enho papel tä yäme tä iwom atsinha. ₃₂Mat olham ofwen amhohen tä oyok, Tajlhame chik lech'efwa häpe atsinha tä matche tä elh t'at tä neya katsik häpe, häp tä is tä ileyej. Mat chik kahäpeya täjtso chik tamenej tä iwom, lham tä tamenej atsinha tä iwo lakain'oyaja. Wet hin'o chik yen lech'efwaya atsinha tä n'owomek, häte iwo lakain'oyaja.

₃₃“Häte lelätache n'olhämet p'ante õ'fwenho lhachätilis tä õyok, M'ak at chik häpe chik let'untejche ämet tä lhachaje häp Lhawuk, iwohiyet'ak ka'äma matche häp ämet. ₃₄Mat olham ofwen amhohen tä oyok, Yej t'untejche ämet m'ak at chik häpe. Yej wo lheya pule tä let'unhatche ämet, tsi Dios Niyatyaj t'at, ₃₅wok honhat, tsi Dios lepach'ol tä lew'et, wok häp Jerusalén, tsi Niyat tä Lhamya tä häpe Dios, häp tä laka hupuy. ₃₆Wet yej katlä etek chik let'unhatche ämet, tsi lehanhiyejt'a lewoyneje yämthilek lepelnhat wok lechalnhat weihalhafwaj haw'ole. ₃₇Mat ämet at chik häpe chik lhoyaykwe, Ey'a, is tä lhäm matche. Wok ämet chik lhoyaykwe, Kha, is chik häpe t'at tä lhok, Kha. Tsi m'ak chik lenuhatpe tähestso, tälhe ahättaj.

₃₈“Amel lelätache n'olhämet p'ante pajche tä yok, Wo haya, chik aelh ilanhi ate, wet lanhi aelh lete. Wok chik aelh ilanhi atsote, wet lanhi aelh letsote. ₃₉Mat olham ofwen amhohen tä oyok, Yej wo hayahlä aelh chik iwoyej ame m'ak tä ni'isa. Chik y'aj hach'alo tä afwomkat, tumtejlä elh tä hats'amkat yämthilek äp y'aj. ₄₀Wok chik elh t'uhläk iso amej akay'uche wet ihän ame n'okalelhthayajwo, ch'anlhaye chik hip'ajtej haw'uy tä iso amej. ₄₁Wok chik sip'ä ne'tek letilhäj lelhuk yäk lechäte kilómetro weihalha, oyok, p'ajtej elh kilómetro. ₄₂Elh chik häpe chik t'alhej ame m'ayek, w'enho t'at. Wet elh chik t'uhläk lecheyjäntej m'ak tä alewuk, yej n'äyejo.

₄₃“Häte lelätache n'olhämet p'ante pajche tä yok, Humin aelh wet n'äyiho atayhfwa. ₄₄Mat olham ofwen amhohen tä oyok, Humnhen atayhfwas wet alhyene Dios häp lhamel tä iti amejen laka'tshayaj. ₄₅Chik lewoye täjtso, ahäpkhihena leles häp Ajchayay tä ipuleye. Tsi lham inuhatphä ifwala, wet ichen pelhay, yämthilek wichi tej tä ni'isahen isej t'at, lhäy'e iyhäj tä isen. ₄₆Tsi chik lets'ilkat lhamel tä aihumnhen tä letiyej ahumnhayaj, ¿atsi m'ak tä awayhathila? Tsi lhek yahinya, häte lhamel tä lechumet impuestos tä Romano lhayis t'alhpe, iwoye t'at täjtso. ₄₇Wok lets'ilkat apuhfwas tä len'okwiyej, ¿hä aw'enha lhamejlä wichi iyhäj? Tsi lhek yahinya, häte lhamel tä nitäfwelayej Dios tä matche iwoye t'at täjtso. ₄₈Wet häp tä oyok, Amälhtejwek ha'isyaj, mälhyej Ajchayay tä ipuleye imälhewek le'isyaj.