Mat 9

₁Wet Jesús tiyäjo chalana wet hap'alakpe lewomek, wet nichäte hupuy tä lew'et. ₂Wet iyhäj ihäne hin'o tä k'efwitas länek tä i'pe lehowet. Wet tä Jesús hiw'en lhamel t'ekhahyaj, tahuyej häp k'efwitas länek wet yok:

–¡Yäs, akhajyen! Tatäy amej asukyajay.

₃Wet häp elhpej hin'ol tä lhayen lewosayej Ley p'ante tälhe Moisés, tä lhamel iläte Jesús tä iwoyetso, wet letichunhayaj yok, “¡Häp hin'otsi lhämtes iläkwlhi Dios!” ₄Mat Jesús nitäfwelej letichunhayaj wet yok:

–¿Chipte tä ni'isa m'ak tä ihi amel ahusey? ₅¿Atsi m'ak tä lhäy'e lhip tä ni'thaya? ¿Häpe p'iya tä oyok, “Tatäy amej asukyajay”, wok häp chik oyok, “Nephä, w'eleklhi”? ₆Lhek yahinya, opäyen amehen häpkhilek lehanej tä Hin'o Lhäs len'ohyaj ihi tä ihonhatena yämlek itäyhthen wichi lesukyajay.

Wet nech'e tahuyej k'efwitas länek wet yok:

–Nephä, chuma ahowet, mäh äple haw'et.

₇Wet hin'o nephä wet yäpil. ₈Tä wichi hiw'en, inuhat lhamhohen, wet iwunit Dios tä hiw'enho hin'ol yämlek ikalhi tä yenlhi m'ayhay tä mälhyeja.

₉Jesús yikch'oye täjtso wet hiw'en hin'o tä lhey Mateo, lham tatayphä tä ihi lew'et tä ihutpejwek impuestos laha tä niyatey Romano lhayis t'alhpe. Wet Jesús tahuyej tä yok:

–Ache n'okwe.

Tä Mateo iläte, nephä wet yikche.

₁₀Tä paj Jesús lhäy'e lechufwenkay t'ekhen tä ihi Mateo lew'et. Wet nämhen wujpe iyhäj hin'ol tä impuesto lewos lhäy'e wichi tä õyämejwethä tä ni'isahen, wet lhamel tachufwiyej. ₁₁Tä Fariseo lhayis hiw'en, tay'ätshane Jesús lechufwenkay tä yok:

–¿Chipte tä awuk tachufwiyej häp impuesto lewos lhäy'e iyhäj tä ni'isahen tä t'ekhen?

₁₂Mat tä Jesús iläte, wet yok:

–Häp wichi tä t'inhayaj länhay, häp tä iwatlä kachawo. Iyhäj tä newache t'inhayaj tek iwatlä. ₁₃Mäyay wet achufwenej m'ak tä häpe Dios lhämet p'ante yok:

₁₄Häp Juan Bautista lechufwenkay ihoye Jesús wet tay'ätshane tä yok:

–¿Chipte tä am achufwenkay lhaknichuyhatahen? Tsi olhamel lhäy'e Fariseo lhayis wuj tä owoyepej täjtso.

₁₅Jesús nichulho wet yok:

–¿Chiwoye wichi tä ihoye elh tä tawhayey tä iwo lakäjyaja? ¿Hä is chik iwo lefwitajayaja tä hin'o tä whayenaj kamaj iyej lhamel? ¡Kha! Mat nichäthiyela ifwala tä õ'soyej lhamel häp whayenaj, nech'e häpkhilek lhaichuyhathen.

₁₆“Nehit katsik itseklhi lew'uy wumek wet hip'oyeji wesaj lhip tä nech'ayek. Tsi lep'ot tä nech'ayek yäpnho wet itonhi, wet nem koyhyaj tä wasi lew'uy. ₁₇Häte õ'tsäyhihot'a hat'es tä nech'ayek häp tsänt'äj tä lewumek. Tsi chik y'ohi hat'es, ipofwohila wet itsäy hat'es lhäy'e lehi tatäy. Tä mälhyejtso, is chik õ'tsäyho hat'es tä nech'ayek häp lehi tä nech'ayek, häpkhilek newache lewit'äyhyaj.”

₁₈Tä kamaj Jesús yämlhi, näm hin'o tä len'ohyaj ihi wet takhoschufwi wet yok:

–Olhäse nech'e tä y'il. Mat ache n'okwe wet tila'pe akwey, wet iläyhla.

₁₉Tä Jesús iläte, nephä wet yikche, lhäy'e lechufwenkay. ₂₀Tä yik, wet iche atsinha tä t'inhayaj ihi, w'oytaj tä ilänpej, wet ichespej, mat yachajopej, pajtha doce nekchämes tä mälhyejpejtso. Wet lham iho w'echehi Jesús wet itsok lew'uy lhip, ₂₁tsi letichunhayaj yok, “Tejlak lew'uy lhip chik okatej, ochesla.” ₂₂Wet Jesús nitilhakhi wet hiw'en atsinha, wet tahuyej tä yok:

–¡Yäse, akhajyen! Ekhahyaj tä aichesat.

Häpet tä iwoyetso, atsinha iches t'at.

₂₃Tä Jesús tujlhache len'äyij, nichäte hin'o tä len'ohyaj ihi lew'et, wet hiw'en wichi tä iwo huyaja tä tafwchehchä lhäy'e hin'ol tä iwo lefwolisa tä iyej lhamel. ₂₄Wet ifwenho tä yok:

–¡Mäch'oye! Lhutsha y'inhit'a, imäfwaj t'at.

Tä lhamel iläte, ischeyejen. ₂₅Mat õ'chen alhoye lhamel, wet Jesús ihoho hupch'o tä lhutsha ihi, wet tachuma takwey, wet lhutsha nephä.

₂₆Wet m'ak tä Jesús iwoyetso, letoyaj y'ajpe nilhok honhattso.

₂₇Tä Jesús yikch'oye täja, iche täkwfwas hin'ol tä asnamis tä ihän len'äyij wet t'änhen tä yok:

–¡David Lhäs, p'altsen n'ohen!

₂₈Wet tä Jesús tiyäjchufwi hup, lhamel ihoye, wet Jesús tay'ätshane wet yok:

–¿Hä lechayaye tä ohanej owoyneje yämthilek oaiw'enyenche honhat?

Lhamel nichulho wet yok:

–Ey'a, Iwuk.

₂₉Wet Jesús ichumpe lhamel letelhoy wet yok:

–Is tä i'amejen mälhyej tä lechayaye.

₃₀Wet lhamel nech'e hiw'enche honhat. Mat Jesús yäm äytajejche lhämet tä iwoyeje lhamel wet yok:

–Yej fwenhola elh chik häpe.

₃₁Matkat häpet tä lhamel inukwephä tä tälhchufwi hup, y'ajthi wichi tä nilhokpe honhattso häp m'ak tä Jesús iwoyeje.

₃₂Tä lhamel yikhen, wichi ihäne Jesús häp hin'o tä isuk tä ahät länek. ₃₃Wet Jesús inuhatphä ahät wet hin'o nech'e tahuy. Wet wichi wuj tä iseltejen wet yok:

–¡Tälhe fwalas tä pajche ihichet'a m'ak tä mälhyeja tä ihi Israel!

₃₄Mat häp Fariseo lhayis yok:

–Ahät lhayis kaniyat, häp tä hiw'enho lakhajyhayaj yämthilek inuhatchephä lhamel.

₃₅Jesús ilunche nilhokej hupuy lhäy'e wichi lew'etesas tä iwo lechufwenyaja tä ihiche lhamel laka n'ohusew'etes. Yen lhämeta Dios Silätyaj tä Is tä häpe Leniyatyaj, wet isoyej wichi nilhokej t'inhayajay lhäy'e m'ak at chik häpek lewit'äyhyaj, wet ichesen. ₃₆Tä iyahin wichi, wet yok:

–Matche tä p'elitses.

Tsi hätet iwoye tson'atas tä laj lewoya, nikalelhäja len'äyij wet lajit lakhajyhayaja. ₃₇Tä mälhyejtso, tahuyej lechufwenkay wet yok:

–Wuj yachuyaj chik õ'lanhi, mat nitäkwit'a chumhas. ₃₈Häp tä tamenej, alhaye yachuyaj Lewuk yämthilek ichen lewos tä ilanhi.