Miq 7

₁¡Wuj tä olhakli ihi!

Ohätet iwoye hin'o tä fwetaj t'ukwe hal'ä lhay

tä tajyäme lewhäy tä iche.

Onchuyuhlä hal'ä lhay,

mat onlhokhiyet'a tsi nofw.

₂Honhatna nemhit iche hin'o tä t'ifwtiyej häp Dios.

Tatäy wichi tä isen m'ak tä iwoye.

Nilhokej lhamel elh tefwajpejni

yen tichunhayaja chik ilän elh.

₃Matche tä lhamel ihanej lakey tä ni'isa tä iwoye.

Niyatey inityenej chik iyhäj

hiw'enho m'ak tä iwatlä.

Wet n'okalelhthayajwos hits'ilkat

elh tä tis tä lhamel tach'ote.

Wet wichi tä len'ohyaj ihiche

iwoyet m'ak tä lhamel ihuminche.

Nilhokej lhamel ikänchi häp m'ak tä is.

₄Tej elh chik is thayej,

kamaj tet iwoye ch'uthanil

wok hal'ä tälhe tä lhey ihi.

Mat nek t'at lewhäy tä ikathiyeja laha

lakeyis tä ni'isa tä iwoye,

mälhyej tä silätwos pajche ifwenhopej lhamel,

wet nemhit lhamel ihanhiyeja m'ak chik iwoye.

₅Yej t'ekhaye apuhfwa

wet yej t'ekhaye aelh.

Tej chik hach'efwa, tha a'äm hin'ohlä,

ikanla amej p'iya.

₆Tsi hin'o iwohit'a haya lajcha,

wet atsinha tatayhlä lako,

wet lecheyäs ko tatayhlä lakatela,

wet hin'o letayhfwas häpe t'at lew'et lheley.

₇Mat olham otihiyeja oniwhayaj

häp Lhawuk Dios tä Ofwayhthi,

tsi häp tä lham tach'ahuhilat n'oye chik ot'alhe.

₈Amel tä ahäpehen olhamel otayhfwas,

yej a'käjejlhi owit'äyhyaj tä in'oyejen.

Olhamel onchätnaj katsi,

mat oneyhiphäla.

Olhamel oihi honatsi,

mat Owuk Dios häpe oka isi.

₉Olhamel owonaj och'isukyaja

wet ottayhlä häp Owuk Dios.

Häp tä tamenej tä wuj olhamel oteläythayaj,

tsi Owuk tä tawäkwäy n'oyehen.

Mat itetshanhila m'ak tä tamen n'oyejen,

ikalelhthila n'oyejen m'ak tä is alhoho.

Itihla n'ohiche häp isi,

wet olhamel ow'enla häp m'ak tä is alhoho

tä lham iwoyej n'oyehen.

₁₀Olhamel otayhfwas chik hiw'enla,

lhamel wuj tä len'äfwlhi ihihila.

Lhamel iläkwlhinaj n'ohen wet yok:

“¿Chi tä ihi Awuk Dios?”

Mat okäjiyejlhila lewit'äyhyaj

chik ihiyejena lhamel,

tsi letayhfwas t'äsichela lhamel,

hätehlat iwoye iyhät tä õt'äsche

tä ichehen hup kawayhil.

₁₁Jerusalén, nämla ifwala

tä õyenlhi alafwek tä tuntey,

wet aka honhat lepesey õy'ayhthichetshila.

₁₂Nämla ifwala tä wichi

tä tälhe nilhokej honhatil ihohla ame.

Tälhe Asiria, Egipto,

wet tewokitaj tä lhey Nilo,

wet tewokitaj tä lhey Éufrates,

wet lewomekitas wet lhäy'e häp chenhas.

₁₃Honhat nech'e ts'anisla t'at,

häp wichi lakeyis tä ni'isahen

tä lhamel iwoye tä tamenej.

₁₄Iwuk, uye aka wichi,

häpe t'at tson'atas tä am tä aläy.

Lhamel ts'ilkas t'at tä ihi tayhi

wet iwhäye honhat tä is.

Is chik lhokose hup tä ihi Basán lhäy'e häp Galaad,

hätet iwoye ifwalas tä pajche tä lechunhanwethä.

₁₅Päyne m'ak tä lhamel t'iseltejen,

hätet iwoye ifwalas p'ante letonphä tä tälho Egipto.

₁₆Is chik wichi tä i'pe honhat hiw'en,

häpkhilek lhamel wuj tä len'äfwlhi ihi

wet nemhit takhajayhen.

Hätehlat iwoye ch'isukwis tä nhanayej tahuyhen,

wet hätehlat iwoye wichi tä nilätachehen honhat,

häp len'äfwlhi tä tamenej nem yämlhi.

₁₇¡Is chik lhamel tufw honhat,

hätet iwoye amlhäs tä tufw at honhat,

wet hätet iwoye iyhäj m'ak tä lhaitonchehen honhat!

Is chik tachettiyejchehen lenowayhyaj

tä inukwephä tä tälhomche

honhat lhipey tä leletnhawtes,

wet iho ame tä ahäpe Lhawuk Dios.

₁₈Ihichet'a Dios chik häte iwoye häp am,

tsi häp tä letäyhtej letes

aka wichi iyhäjfwas tä imälhehi.

Lehumin tä leti n'oyejen hap'altsenyaj,

wet leleche awäkw tä leti n'oyejen.

₁₉Achajo tä leti n'oyejen hap'altsenyaj,

potpe nilhokej olhamel okeyis

tä ni'isahen tä in'oyejen.

Is chik letafwomej och'isukyajay

wet thate lewomekitaj tä pitoj.

₂₀Ti n'oyejen ahumnhayaj lhäy'e afwtihyaj,

mälhyej tä lefwenho p'ante olhamel otetsel

Abraham lhäy'e Jacob tä lehumnhila n'ohen.