Mar 14

₁Tatäy p'ante ifwalas täkwfwas che nichäte lewhäy Judío lhayis lakäjyaj tä Pascua tä lhamel tuj pan tä levadura newahi. Wet häp sacerdotes tä len'ohyajay ihiche, lhäy'e hin'ol tä lhayen lewosayej Ley p'ante tälhe Moisés, lhamel t'ukwe t'akanyaj che iwoye yämlek itsoklhi Jesús wet õ'län. ₂Mat iyhäj lhamel yok:

–Isit'ak y'atihi n'okäjyaj häp m'ak tä y'awoye, häpkhilek letamsek ihi t'at wichi.

₃Jesús ihoye Betania wet iyej Simón lew'et, häp hin'o tä õyen lheya Amosteyis. Wet tä Jesús t'ek, näm atsinha tä ichäj hal'ä t'i tä lenij akäjche tä wuj laha, ihi lehi tä tuntemok. Wet y'ajo lehi wet itsäype häp Jesús lhetek. ₄Wet iyhäj tä iyej lewäk ihi tä hiw'en täja wet yok:

–¿Chipte tä w'et iwom m'ak tä wuj laha? ₅Isin'ek õ'wom, wet laha kolhki tä lhäy'e lhip tä wuj õhch'otyeneje wichi tä p'elitses.

Wet lhamel inokwajejlhi'pe atsinha täjtso.

₆Mat Jesús ifwenhomche tä yok:

–Tejtsi atsinha, ch'anlhayeje m'ak tä iwoyej n'oye tsi wuj tä is. ₇Häp wichi tä p'elitses ipej amejen, wet alewuhuy t'at che let'uhläk lech'otyenejepej m'ak che isej. Mat olham pitajit'a tä oi'amejen. ₈Häp atsinhana iwoye t'at m'ak tä ikalhi. Lham ilänej ot'isan häp lakacha tä lenij akäjche, iwaklhat n'oyej che õtjänlahlä op'itsek. ₉Matche tä ofwel amhohen, Häp honhat at che häpe che õyen lhämetahi Dios Silätyaj tä Is, häte õyämhiyela m'ak tä atsinhana iwoyene, häpkhilek õyen tichunhayaja lham.

₁₀Wet nech'e Jesús lechufwenkay tä ihi doce elh tä lhey Judas Iscariote, yik tä ihoye häp sacerdotes tä len'ohyajay ihiche, lham t'uhläk yachaje Jesús häp lhamel. ₁₁Tä lhamel iläte, akäswethä wet ifwenho Judas tä yok:

–Is t'at, che mälhyejtso olhamel ow'enla amho laha.

Wet tälhe täjtso Judas t'ukwe m'ak che iwoye yämlek yachaje Jesús häp lhamel.

₁₂Nichäte Judío lhayis lakäjyaj tä lhamel tuj pan tä levadura newahi. Wet ifwala tä ichun, mälhyej lakeypej, õ'län tson'atas leles tä Pascua lhäk. Wet Jesús lechufwenkay tay'ätshane Lewuk wet yok:

–Tä häpe Pascua, ¿atsi lew'et tä lehumin yämlek olhamel ohoye wet owaklhat amho äk?

₁₃Jesús ichen täkwfwas lhamel wet ifwenho tä yok:

–Mäyay hoyaye hupuy, wet che lhämay kanhi, lew'enla hin'o tä tilhäj lhäkwe tä inät ihi. Mäkwela ₁₄wet che lechäte hup tä tiyäjchufwi, ätshanela hin'o tä hup lewuk, olak, “Maestro tay'ätshanej ame tä yok, ¿Chi tä ihi awukwech'o elh tä häpkhilek oihi tä ot'ek tä Pascua, lhäy'e ochufwenkay?” ₁₅Wet lham ipäynhila amehen lech'o elh tä tsajo tä tumphä wet pajche wak'alh t'at, häpkhilek lewaklhat m'ak che y'atufwila.

₁₆Lechufwenkay yikhen tä ihoye hupuy. Tä nichäte, wet hiw'en mälhyet iwoye tä Jesús ifwenho, wet lhamel ihi tä iwaklhat lhäk tä Pascua. Tä wak'alh, wet yäple Jesús.

₁₇Tä nech'e honatsi lham ihoye huptso, lhäy'e lechufwenkay tä ihi doce. ₁₈Wet tä t'ekhen, ifwenho lhamel wet yok:

–Matche tä ofwel amhohen, Elh amel tä tachufwi n'oyej tä ot'ek yachajilan'o.

₁₉Tä lhamel iläte, wet yen lefwitajayaja, wet nech'e elhpej tay'ätshaneje wet yok:

–¿Elat olham p'iya?

₂₀Jesús nichulho lhamel wet yok:

–Häp amel tä doce elh tä lhahiw'afwlhat n'oyej tä oy'uytho pan häp lhalhäk, häp tä yachajilan'o. ₂₁Hin'o Lhäs nichäthihola leteläythayaj lhäy'e t'ilek, mälhyej tä Dios lhämtes tä ihi Lehi yämeje. Mat ¡p'elitsaj t'at hin'o tä yachajila, lewit'äy ihihila! ¡Isi p'ante che newache!

₂₂Tä lhamel t'ekhen, Jesús tachuma pan, wet iwo graciasayej Dios, wet hich'esajen wet hiw'enho lechufwenkay wet yok:

–Chumaye, häp täja ot'isan.

₂₃Wet äp tachuma n'olhäthi tä vino ihi, wet iwo graciasayej Dios, wet hiw'enho lhamel wet nilhokej iyäyej. ₂₄Wet ifwenho lhamel wet yok:

–Häp täja ow'oyis tä nitsäyhchä häpkhilek wujpe wichi tä isej, wet äp yäm kalelhäj häp Dios lhämet tä hit'unteji m'ak tä iwoye. ₂₅Matche tä ofwel amhohen, Nemla oyäyej vino yäk nichäte lewhäy häp Dios Niyatyaj, nech'ehilak oyäyej vino tä nech'ayek.

₂₆Wet lhamel ichoywethä tä iten salmos. Tä ileyej, yikhen tä ihoye häp chenaj tä Oliwachat. ₂₇Wet Jesús ifwenho lhamel wet yok:

–Lhek yahinya, lelhokej amel lewomayhlan'o. Mälhyejtso Dios lhämet p'ante ihi Lehi tä yok, “Olänla tson'ataswo wet leläy ifwtsatla'pe honhat.” ₂₈Mat chik õ'nuhthiphälan'o che otälho n'op'itseyhay, lew'enayhlan'o kanhi Galileaye tsi pajichela oihi.

₂₉Pedro yok:

–Tejlak nilhokej iyhäj aiwom, mat olham ohätehit'ala.

₃₀Mat Jesús tahuyej wet yok:

–Matche tä ofwel amho, Honajchena ho'o y'iphila. Mat chik kamaj nachajaho, ihihila tres chik lhäme tä katäfwela n'oyej.

₃₁Mat Pedro inityen tä yok:

–Tejlak otn'is amej chik y'at'inhen, mat oyohit'alak, “Tek ontäfwelej.”

Wet nilhokej lhamel tä lhämet mälhyejtso.

₃₂Wet Jesús lhäy'e lechufwenkay ihoye lhip tä lhey Getsemaní. Tä nichäte, Jesús ifwenhomche lhamel wet yok:

–Tachephä ayej kana. Olham oyik ayej tä owo ot'alhyaja.

₃₃Wet ichäj lhamche Pedro lhäy'e Santiago lhäy'e Juan. Wet nech'e ilät lhame tä wuj tä äytaj lelhakli lhäy'e lefwitajayaj. ₃₄Wet tahuyej lhamel wet yok:

–Olät lhame tä ofwitajayaj wuj tä ilänn'o. Mälhe ayej kana amel, mat yej lemähen.

₃₅Wet yik tä lhaitontehlä lhimphaj häp lhamel, wet takhos katsi wet lhahip'altsene Dios tä yok:

–Ijcha, che lehanej lewoyneje, yej chätyen o'pe oteläythayaj. ₃₆Ijcha, am lehanej at lewoyneje nilhokej m'ayhay. Fwayhat n'oyej olhät tä tapayna tä häpe oteläythayaj. Mat oyok, woye m'ak tä am anech'ethayaj, isit'ak häpe olham onech'ethayaj.

₃₇Tä ileyej, wet tapile lechufwenkay wet hiw'en tä imähen. Wet tahuyej Pedro wet yok:

–Simón, ¿hä lemä? ¿Hä tek lekalhi che kamäya lhimphaj? ₃₈Yej lemähen amel, mat woyay alhyaja häpkhilek nikalha amhihen n'olhelhtshayaj. Tsi ohanej tä let'uhläk lewoyaye olhämet, takhajayhen t'at ahusey, mat asanis tek takhajayhen.

₃₉Wet yachajo tä äp yik wet iwo t'alhyaja, yachajo lhämtesn'e pajche iwoye. ₄₀Tä ileyej, wet tapile lechufwenkay wet hiw'en tä äp yachajo tä imähen, tsi nahati ihiche t'at tatey. Wet tä tahuyejen, lhamel ihanhiyejt'a lhämet che nichulho. ₄₁Wet yachajo tä yik, wet tä äp tapile lechufwenkay wet yok:

–¡Kamaj lemäfwasen t'at wet lewo elakw'etesa! Naya t'at. Nech'e nichäte lewhäy tä õyachaje Hin'o Lhäs häp wichi tä ni'isahen takweyey. ₄₂Neyachephä, n'ekhen. Lhek yahinya, näm alhoho häp elh tä yachajn'o.

₄₃Tä kamaj yämlhi Jesús, näm häp Judas tä häpe lechufwenkay tä ihi doce elh, lhäy'e wujpe wichi tä tälhe sacerdotes tä len'ohyajay ihiche, lhäy'e tä tälhe hin'ol tä lhayen lewosayej Ley p'ante tälhe Moisés, lhäy'e tä tälhe hin'ol tä thänhäy. Wet lhamel ichäjwethä lefwajnhates lhäy'e hal'äy. ₄₄Wet Judas pajche iwo letetnekayej tä ifwenho wichitso wet yok:

–Häp elh che ots'u lech'alo, häpe lham. Tsokaylhila wet a'ämayhlä ahin'olwethä che lechäj.

₄₅Wet tatshupiye t'at Jesús wet yok:

–¡Maestro!

Tä iwoyetso, hits'u lech'alo. ₄₆Tä iyhäj hiw'en, tachuma Jesús wet itsoklhi.

₄₇Mat häp Jesús let'unfwas elh itonhi lefwajnhat, ifwajej Sacerdote tä Lhamya lakawo wet ilanhi lech'ote.

₄₈Jesús tahuyej häp wichi wet yok:

–¿Chipte tä lewoyay afwajnhatesa wet lechäjaywethä hal'äy tä lenekhen yämlek letsokaylhin'o, letech'ayenay n'oyej hin'o tä anikoy? ₄₉Nilhokej ifwalas tä oinaj amejen tä oihi Dios Lew'et, wet tek letsokaylhin'o. Mat owit'äyhyajna häpkhilek lhayäm matche Dios lhämtes tä ihi Lehi.

₅₀Wet nilhokej lechufwenkay nech'e iwom wet inukwe alhoho tä yikhen. ₅₁Wet iche mamse tä ihän len'äyij Jesús tä õ'chäj, wet lham taw'uyhi wesaj. Häte lhamel t'uhläk itsoklhi lham, ₅₂mat tä ikatej lew'uy, wet lham iwom wet inu alhoho tä ts'ilakche.

₅₃Wet lhamel ihäne Jesús häp Sacerdote tä Lhamya, wet nilhokej sacerdotes tä len'ohyajay ihiche tä lhaihute, lhäy'e häp hin'ol tä thänhäy, lhäy'e hin'ol tä lhayen lewosayej Ley p'ante tälhe Moisés. ₅₄Wet Pedro ihän t'at mat tek lhaitott'ayne, wet nichätho Sacerdote tä Lhamya laka alhotaj, wet lhaihutunlhi tä iyej sip'äl tä t'uye Dios Lew'et tä lhamel tatayho itäj.

₅₅Wet sacerdotes tä len'ohyajay ihiche, lhäy'e nilhokej Concilio, lhamel t'ukwe m'ak che kalelhäj yämlek yen tesayej Jesús wet ne'tek õ'län, mat nilhokhiyet'a. ₅₆Tsi tej tä wujpe wichi tä yäme lhämtes tä kamatachehen tä t'uhläk iwit'äynej Jesús, mat elhpej yäme m'ak tä w'enha lhamejlä häp m'ak tä elh yäme. ₅₇Wet nech'e iyhäj nechephä tä fwetaj yen tesayej Jesús wet yok:

₅₈–Olhamel oläte naji tä yok, “Owasthihila Dios Lewukwe tä n'otkwey lhenek, wet che tres ifwalas oneyhthiphäla elh tä kahäpeya n'otkwey lhenek.”

₅₉Mat häte täjtso tek w'awulhejchä lhämtes tä iwoye. ₆₀Wet nech'e Sacerdote tä Lhamya nephä tä ihi iyhäj lechowej, wet tay'ätshane Jesús wet yok:

–¿Hä ihichet'a ämet? ¿Chiwoye m'ak tä õy'ithatlhi amejna?

₆₁Mat Jesús yok tam, niwohit m'ak che nichulhejlä. Wet häp Sacerdote äp yok:

–¿Hä ahäpe N'ofwayhthi tä Dios Chenek? ¿Hä alhäs häp Dios tä le'isyaj ihi?

₆₂Wet Jesús nichulho tä yok:

–Ohäpe. Wet lew'enayhlä Hin'o Lhäs tä tatayhiphä lhip tä lefwomkat häp Dios tä Takhajay, wet tä nek i'pe pules.

₆₃Tä Sacerdote tä Lhamya iläte, hich'esajche lham lew'uyis tä ihi tä Jesús tatache, tä yen tetnekayej tä wuj tä lewäk ihi. Wet tahuyej iyhäj tä yok:

–¡Naya t'at! ¡Tek y'awatlä iyhäj che yäme letes! ₆₄Amel lelätaye t'at lhämtes tä iläkwiyejlhi Dios. ¿Atsi m'ak tä lewoyaye?

Wet nilhokej lhamel y'ajwek tä yok:

–Letes ihi. T'uhawetej che õ'län.

₆₅Wet nech'e elhpej lhamel ifwats'unlhi, wet hip'o'pe lham tatey wet inhäpäjlhi wet yok:

–¡Lhek n'älte atsi tä ay'aj!

Wet häp sip'äl tä t'uye Dios Lew'et lhamel y'ajejlhi takweyey Jesús tate'pe.

_66-67Wet Pedro ihi t'at häp lhip tä tumchä tä i'alhoye, lhaihutunlhi tä iwhäye itäj. Wet näm häp Sacerdote tä Lhamya lakawo'tsinha elh. Tä hiw'en Pedro, wet iyahin t'at wet tahuyej tä yok:

–Häte am lhewej naji Jesús, häp Nazaret lhele.

₆₈Mat Pedro lhaifwon wet yok:

–Ohanhiyejt'a. ¿Atsi m'ak tä lhäme?

Wet ihoye lepe, wet nech'e ho'o y'ip.

₆₉Wet atsinhatso äp yachajo tä hiw'en Pedro, wet ifwenho iyhäj wet yok:

–Lhamel elh häp hin'otsi.

₇₀Mat Pedro yachajo tä lhaifwon. Tä pajfwaj wet häte wichi tä iyej tahuyej lham wet yok:

–Matche tä ahäpe lhamel elh, tsi am häte letälhe Galilea.

₇₁Wet nech'e Pedro yäm äytajche lhämet tä iyetlhi wet yok:

–¡Is che Dios yen tesa n'oyej che kamatache olhämet tä oyok, Otäfwenhiyejt'a hin'o tä lhämäyetso!

₇₂Häpet tä malhyejtso, wet ho'o yachajo tä y'ip. Wet Pedro nech'e lehusekch'oye Jesús lhämet tä ifwenho m'athi tä yok, “Che ho'o kamaj nachajaho tä y'ip, ihihila tres che lhäme tä katäfwela n'oyej.”

Tä Pedro itichunch'oye täjtso, wet lhafwyhayaj tapoyej, wuj tä tafwlhi.