Mar 5

₁Tä paj wet lhamel nichät lewomek lhip elhe, häp honhat tä lhey Gerasa. ₂Tä Jesús inuhchä tä tälho chalana, iche hin'o tä welantas länek tä ihoye, tälhe n'op'itseyhayw'etes, ₃tsi häp tä yen lew'eta. Wet ihit'a katsik ihanej chik itsoklhi, ₄tej tä õyäytejpej chinhas häp takäläy lhäy'e takweyey, mat yisthenpej, iwasthiche, wet newache elh tä lakhajyhayaj ihi chik ifwihat. ₅Wet ifwalapej honatsipej ilunche t'at häp chenhas lhäy'e n'op'itseyhayw'etes, wet t'änlhi t'at wet lhayistejlhipej tunte lhipey. ₆Tä hiw'enlä Jesús tä kamaj atofwehlä, inu alhoho tä yistejlä. Tä nichäte, takhoschufwi ₇wet ifwitsenej tä t'än tä yok:

–¿Chipte tä katach'anlhaya n'oye, Jesús, Dios tä N'owujtaj Lhäs? Häp tä isej Dios, olhaip'altsen ame, ¡yej wit'äyenn'o!

₈M'ak tä tamenej tä iwoynejetso lhämet, häp tä Jesús tahuye ahät tä ihi tä yok:

–¡Ahät, mäch'oye hin'otsi!

₉Jesús tay'ätshane hin'o tä yok:

–¿Chiwoye ey?

Lham nichulho wet yok:

–Olhey Wujpey, tsi owujpey olhamel.

₁₀Wet wuj tä lhaip'altsene Jesús wet yok:

–¡Yej chen olhamel tä ahät lhayis tä oihi lhipna!

₁₁Iche p'ante wujpe kutsi lhayis tä t'ekwethä tä iwhäye chenaj. ₁₂Wet ahät lhayis lhahip'altsene Jesús tä yok:

–¡Chen n'oyehen kutsi lhayis l'ini, ch'anlha n'oyehen yämthilek otiyäjomche lhamel!

₁₃Jesús iwahnej t'at, wet ahät lhayis inukwephä, tiyäjomche kutsi lhayis, wet lhamelna tä dos mil inukwe alhoho tä tälhpe tä nistakchä, yäk nichätho lewomek wet hich'ahen.

₁₄Wet häp hin'ol tä t'uyehen kutsi lhayis, tä lhamel hiw'en tä mälhyejtso, nowayhen wet inukwe alhoho. Tä nichäte hupuy, ifwenho wichi, lhäy'e iyhäj tä ilhipe hupuy, wet wichi yikhen tä iyahne m'ak wit'äyna. ₁₅Tä lhamel nichäte Jesús, hiw'en welantas länek tä tatayphä t'at, nech'e lew'uy ihi, is t'at, nemhit häpe hin'o tä welan. Wet wichi wuj tä nowayhen. ₁₆Wet lhamel tä hiw'enej m'ak tä iyej welantas länek lhäy'e kutsi lhayis, ifwenhomche iyhäj. ₁₇Wet yäme Jesús wet yok:

–Olhaip'altsen ame, ¡mäch'oye oka honhatna!

₁₈Tä Jesús tiyäjo chalana, wet hin'o tä pajche welantas länek lhahip'altsene tä yok:

–Che letach'anlha n'oye, ot'uhläk oyik amche.

₁₉Mat Jesús nichulho wet yok:

–Kha. Mat mäh äple haw'et lhäy'e apuhfwas, wet fwenhola nilhokej m'ak tä Lhawuk iwoyejne ame lhäy'e tä ahip'altsen.

₂₀Tä mälhyejtso, yik häp hin'o wet ifwenhomche wichi tä ihi honhattso tä lhey Diez Ciudades häp m'ak tä Jesús iwoyeje. Wet nilhokej lhamel wuj tä iseltejen.

₂₁Wet Jesús ihi chalana tä yäple ufw tä pajche tälhe. Tä nichäte, wujpe wichi tä lhaihute tä i'pe inät lhip. ₂₂Wet näm hin'o elh tä itetshan n'ohusew'et lechumet, lhey Jairo, lham hiw'en Jesús wet takhoschufwi, ₂₃wet wuj tä lhahip'altsene tä yok:

–Olhäsefwaj tatäy lhimphaj chik y'il. Lhuu, nek ayej n'okwe, tila'pe akweyey yämlek iches wet iläy.

₂₄Tä Jesús iläte, yikche, wet wuj wichi tä ihän, lhamel lhäy'e lhip tä hip'ajtit tä yik. ₂₅Wet iche atsinha tä t'inhayaj ihi, w'oytaj tä ilänpej, wet ichespej, mat yachajopej, pajtha doce nekchämes tä mälhyejpejtso. ₂₆Wet wujpe kachawos tä lham pajche ihoye, wet lhäy'e lhip tä leteläythayaj iyeji m'ak tä lhamel iwoyejepej. Iwom nilhokej m'ak tä iyej mat lechesyaj ihihit'a, nem koyhyaj t'inhayaj tä ilän. ₂₇Wet tä pajche iläte tä õyämejlhi Jesús, häp tä tamenej tä lhailhahtej wichi, wet iho w'echehi Jesús wet itsok lew'uy lhip. ₂₈Tsi letichunhayaj yok, “Tejlak lew'uy lhip che okatej, ochesla.” ₂₉Häpet tä mälhyejtso, lew'oyis takasit wet ilät lhame tä noj t'inhayaj. ₃₀Wet Jesús nech'e ilät lhame tä inuphä lhip lakhajyhayaj, wet nitilhaklä wichi wet tay'ätshane tä yok:

–¿Atsin'e tä häpe tä itsok ow'uy lhip?

₃₁Mat lechufwenkay yok:

–¿Chipte tä lhok, “¿Atsin'e tä itsokn'o?” Lew'en tä wichi ahip'ajtit.

₃₂Mat lham tujlhache tä iyahinch'oye elh tä häpe tä itsokn'e. ₃₃Wet atsinha tachettiyejche lenowayhyaj tsi lham ihanej t'at häp m'ak tä iwoyene. Wet nech'e ihoye wet takhoschufwi, wet ifwenho nilhokej m'ak tä lewit'äyhyaj lhäy'e tä nech'e iches. ₃₄Tä ileyej, wet Jesús yok:

–Yäse, ekhahyaj tä aichesat. Mäh, atamsek ihi, noj anhayaj.

₃₅Tä kamaj Jesús yämhoplhi atsinha, nämhen iyhäj tä tälhe Jairo lew'et, lhamel ifwenho Jairo tä yok:

–Äse pajchene ileyej honhat. Yej lhaklitejlhi häp Maestro.

₃₆Mat Jesús tach'ahuhiyet'a lhämtes, wet tahuyej Jairo wet yok:

–Yej nuhat amho, mat ekhaye.

₃₇Wet yikhen, tajlhama Pedro lhäy'e Santiago lhäy'e lech'inij Juan tä ichäj lhamche. ₃₈Tä nichäte Jairo lew'et, hiw'en wichi tä iwo huyaja, lhamel wuj tä tafwchehchä wet t'änwethä. ₃₉Wet Jesús tiyäjchufwi hup wet tahuyej lhamel tä yok:

–¿Chipte tä lewoyay huyaja wet letafwchehchä? Lhutsha y'inhit'a, imäfwaj t'at.

₄₀Tä wichi iläte, t'ischeyejen. Mat lham ichen alhoye nilhokej, wet ichäj lhamche häp lhutsha lajcha lhäy'e lako, lhäy'e lham let'unfwas, wet tiyäjo hupch'o tä lhutsha ihi. ₄₁Wet tachuma takwey wet tahuyej tä yok:

–Talita, kum.

(Häp lhämtesna yok, Lhutsha, am tä oyäm ame, oyok, Nephä.)

₄₂Wet lhutsha tä hiw'en doce nekchämes, nephä wet w'eleklhi. Wet wichi wuj tä t'iseltejen. ₄₃Mat Jesús yäm äytajejche lhämet tä ifwenhomche tä yok:

–Yej fwenhola elh at che häpe. Mat athana w'enho lhutsha m'ak che tuj.