Wichi tä ihi p'ante Jerusalén
1Häp hin'ol tä wichi laka niyatey ihi t'at Jerusalén. Mat iyhäj wichi diezpej tä iwek tä lhalepuhfwas, lhamel ikoyej p'ante suerte yämthilek kalelhäj iyhäj tä suerte taj, wet häp tä ihoho Jerusalén, lhäy'e lew'et lheley, wet yen lew'eta häp hupuy tä n'ot'amajchet. Wet häp iyhäj tä nueve elh weihalhapej, lhäy'e lew'et lheley, lhamel ihiche t'at lew'etes tä ihiche. 2Wet nech'e wichi t'alhe Dios chik itiyej lakäpfwayaj tä is nilhokej lhamel tä yen tichunhayaja yämthilek yen lew'eta Jerusalén.
3Häp tähesna niyatey tä yen lew'eta Jerusalén. Mat häp iyhäj tä imälhehi Judá, elhpej ihi t'at laka honhat tä lew'et, häp Israel lhayis, lhäy'e sacerdotes, lhäy'e Leví lhayis, lhäy'e hin'ol tä tach'ote Lhawuk Lew'et lechumet, lhäy'e wichi tä lechätilis p'ante häpehen rey Salomón lakawos.
4Häp wichi tä tälhe letes Judá tä lhamel yen lew'eta Jerusalén, iche niyat tä lhey Ataías tä häpe Uzías lhäs wet lechätilis lheyis Zacarías, Amarías, Sefatías, Mahalalel, wet lhamel tälhe hin'o p'ante lhey Fares.
5Wet elh niyat tä iyej Judá lhayis häpe Maasías tä häpe Baruc lhäs wet lechätilis lheyis Col-hozé, Hazaías, Adías, Joyarib, Zacarías, lhäy'e Siloni.
6Tä nilhokej Fares leles tä imälhehi Jerusalén, iche cuatrocientos sesenta y ocho (468). Nilhokej häpehen hin'ol tä ihanej n'oka'tshayaj.
7Wet häp wichi tä tälhe letes Benjamín tä lhamel yen lew'eta Jerusalén, iche niyat tä lhey Salú tä häpe Mesulam lhäs wet lechätilis lheyis Joed, Pedaías, Colaías, Maasías, Itiel, lhäy'e Isaías. 8Wet Salú lech'inhis iyej t'at, lhamel lheyis Gabay lhäy'e Salay. Tä nilhokej Benjamín lhayis, iche novecientos veintiocho (928). 9Wet lhamel laka niyat häpe Joel tä Zicri lhäs, lhäy'e Judá tä Senúa lhäs tä häpe hin'o tä lech'otfwa tä ihi hupuy.
10Wet sacerdotes tä ihi Jerusalén häpehen Jedaías tä häpe Joyarib lhäs, lhäy'e Jaquín, 11lhäy'e Seraías tä häpe Hilcías lhäs wet lechätilis lheyis Mesulam, Sadoc, Merayot, lhäy'e Ahitub tä häpe Dios Lew'et kaniyat. 12Wet häte iche lepuhfwas tä häpehen hin'ol tä tach'ote Dios Lew'et lechumet. Tä nilhokej, iche ochocientos veintidós (822).
Wet iche Adaías tä häpe Jeroham lhäs wet lechätilis lheyis Pelalías, Amsi, Zacarías, Pasur, lhäy'e Malquías. 13Wet häte iche lepuhfwas tä häpehen wichi kaniyatey. Tä nilhokej, iche doscientos cuarenta y dos (242).
Wet iche Amasay tä häpe Azarel lhäs wet lechätilis lheyis Azay, Mesilemot lhäy'e Imer. 14Wet häte iche lepuhfwas tä häpehen hin'ol tä ihanej n'oka'tshayaj. Nilhokej lhamel iche ciento veintiocho (128), wet laka niyat Zabdiel tä häpe Gedolim lhäs.
15Wet Leví lhayis tä ihi Jerusalén iche Semaías tä häpe Hasub lhäs wet lechätilis lheyis Azricam, Hasabías lhäy'e Binuy. 16Wet Sabetay lhäy'e Jozabad häpehen niyatey tä iyej Leví lhayis, wet häp tä itetshan n'ochumtes tä newahi Dios Lew'et.
17Wet häte iche Matanías tä häpe Micaías lhäs wet lechätilis lheyis Zabdi lhäy'e Asaf, lham tä lewuk iyhäj tä ichoywethä tä itenpej letenek tä iwo graciasa.
Wet häte iche Bacbuquías tä häpe hin'o tä ichunche lechila Matanías, lhäy'e Abda tä häpe Samúa lhäs wet lechätilis lheyis Galal lhäy'e Jedutún.
18Tä nilhok Leví lhayistso, iche doscientos ochenta y cuatro (284) häp lhamel tä imälhehi Jerusalén, häp hupuy tä n'ot'amajchet.
19Wet hin'ol tä t'uye Dios Lew'et tä lhamel ihi Jerusalén, häpehen Acub, Talmón, lhäy'e lepuhfwas. Tä nilhokej, iche ciento setenta y dos (172).
20Wet iyhäj Israel lhayis, lhäy'e iyhäj sacerdotes, lhäy'e Leví lhayis, lhamel yen lew'etesa häp wichi lew'etes tä ihi Judá. Elhpej ihi t'at laka honhat.
21Häp hin'ol tä tach'ote Dios Lew'et lechumet, lhamel yen lew'eta Jerusalén lhip tä lhey Ofel. Wet laka niyatey häpehen hin'ol tä lheyis Siha lhäy'e Gispa.
22Wet Leví lhayis tä ihi Jerusalén, laka niyat lhey Uzi tä häpe Bani lhäs wet lechätilis lheyis Hasabías, Matanías lhäy'e Micaías. Uzi tälhe letes Asaf p'ante, wet häpe t'at Asaf laka wichi tä itetshan n'otenkay tä wichi itenpej tä ihi Dios Lew'et. 23Wet iche rey lhämet tä itäfwnhatej lhamel häp m'ak tä is chik iwoye ifwalapej ifwalapej.
24Wet häp elh tä ihoyepej rey chik iche m'ak chik häpe, lhey Petaías tä häpe Mesezabel lhäs, tä tälhe letes p'ante Zera tä häpe Judá lhäs.
Iyhäj hupuy tä wichi ihiche p'ante
25Iche wichi iyhäj tä tälhe letes Judá, lhamel yen lew'eta hupuy tä lhey Kiriat-arba, lhäy'e wichi lew'etes tä iwhäye. Iyhäj ihi Dibón lhäy'e wichi lew'etes tä iwhäye, iyhäj ihi Jekabseel lhäy'e wichi lew'etes tä iwhäye. 26Iyhäj ihi Jesúa, Molada, hupuy tä lhey N'oletnhawet, 27M'awow'et, Beerseba, 28Siklag, Mekona, 29En-rimón, Sora, Jarmut, 30Zanoa lhäy'e Adulam, lhäy'e wichi lew'etes tä iwhäye, lhäy'e Lakis lhäy'e honhates tä iwhäye, lhäy'e N'ojäkw lhäy'e wichi lew'etes tä iwhäye. Tä mälhyejtso, lhamel yen lew'eta honhat, tälhe Beerseba tä ihi lhip tä tapinhiye pajtha nichäte lakawayhi tä lhey Hinom tä ihi lhip tä tafwojnhiye.
31Wet wichi tä tälhe letes Benjamín, lhamel yen lew'eta Geba, Mikmas, Aías, Betel, lhäy'e wichi lew'etes tä iwhäye. 32Iyhäj ihi Anatot, Nob, Ananías, 33Hasor, Ramá, Gitaim, 34Hadid, Seboím, Nebalat, 35Lod, Ono, lhäy'e lakawayhi tä lhey N'ochumetwos kahonhat. 36Häte iche iyhäj Leví lhayis tä t'aye Benjamín kahonhat.
