Neh 4

₁Tä Sambalat ihanch'oye tä olhamel onech'aynhi n'olafwek tä Jerusalén lep'ot, wuj tä lewäk ihi wet iläkwlhi olhamel. ₂Wet lham ihi tä iyhäj lhäy'e sip'äl tä lew'et Samaria tatache, wet yok:

–¿Atsitas m'ak tä iwoye Judío lhayis? ¡M'ak iwotasiyet'a! ¿Fwetajtas at p'i äp yachajiholak ilänhen itshätäy, yenek õ'wahnhiyeja p'iya lhamel? ¿Wok lhamel fwetaj yohifwajakwet wak'alh lechumet tä iwoye? ¿Lhamel fwetaj at p'i tachuma tuntey tä wasiche lhäy'e tä õ'wunhomche wet yen häpeya m'ak tä nech'ayek?

₃Wet Tobías tä häpe Amón lhayis elh, lham iwhäye Sambalat wet yok:

–¡Lhek yahin n'olafwek tä lhamel yenlhi! ¡Tejlat chik m'awo chik taw'ulhpe, nichätla kanhi!

₄Tä mälhyejtso, owo ot'alhyaja wet oyok:

–Dios tä ahäpe olhamel oka Dios, leläte t'at wichi tä iläkwlhi olhamel. Is chik lhachajpe lhamel häp leläkwyhanyajay tä iti n'oyejen. Wet is chik letayhfwas ikalhi yämthilek õyen kwenkaya wet ihi honhat tä w'enha lhamej. ₅N'älit m'ak tä ni'isachehen tä lhamel iwoye wet yej täyhtejen letes. Tsi lhamel tatayhlä wichi tä yenlhi n'olafwek tä inech'aynhi.

₆Wet olhamel otujlhache t'at tä oyenlhi n'olafwek tä Jerusalén lep'ot, wet nichätho lechowej tä oneyhatphä tsi wichi wuj tä lhaikhajyenhen. ₇Matkat Sambalat lhäy'e Tobías, lhäy'e Árabe lhayis, lhäy'e wichi tä lew'et Amón, lhäy'e iyhäj tä lew'et Asdod, tä lhamel ihanch'oye tä olhamel n'am leyej tä oyenlhi n'olafwek wet op'ohiche lhipey tä wasiche, lhamel wuj tä lewäk ihi. ₈Wet nilhokej lhamel iwo lehuseya tä t'uhläk inuye Jerusalén, yämthilek nemhit kalelhäj m'ak tä wichi iwoye. ₉Tä mälhyejtso, olhamel owo ot'alhyaja, ot'alhe olhamel oka Dios. Wet ofwenho hin'ol tä oyok:

–Is chik let'uyaye Jerusalén tä ifwala lhäy'e tä honatsi, häpkhilek lhatayhfwas niselkata n'ohen.

₁₀Wet Judá laka wichi yok:

–Hin'ol tä talhunej n'olafwek lhipey tä iwom, lhamel y'enhen, wet kamaj wuj tä imälhehi, wet olhamel ohanhiyejt'a owoyneje tä ofwetaj oyenlhi.

₁₁Wet wichi tä tatayhlä olhamel yok:

–Isit'ak lhamel ihanej wok nitäfwelej m'ak tä y'awoye, häpkhilek y'asakanho lhamel wet y'alänhen wet ilehiyeja lechumet.

₁₂Mat häp Judío lhayis tä lew'et iwhäye lhamel, ifwelpej n'ohohen tä yok:

–Wichitso inuhla amehen, t'uhläk lhailafwlhi amejen.

₁₃Tä mälhyejtso, one'tek nilhokej iyhäjpej tä lhalepuhfwas lhaip'ajtitwek. One'tek ihiche n'olafwek lhipey tä ni'tosachephä lhäy'e lhipey tä tatoyhen, wet iwo takwelheleya lefwajnhates lhäy'e lehunis lhäy'e lelutses hal'äy. ₁₄Wet tä oleyej tä oyahinlhi n'olafwek, otahuyej hin'ol tä iyhäj kaniyatey, lhäy'e hin'ol tä kalelhäjiche, lhäy'e nilhokej wichi, wet oyok:

–Yej nowaye lhatayhfwas. Tichunache tä Lhawuk takhajay wet lajit letumfwaya. Akhajyenhen wet wo aka'tshayaja'pe aiyhäj, lhäy'e ales, lhäy'e hach'efwas, lhäy'e haw'etes.

₁₅Wet tä otayhfwas ihanej tä olhamel olhaiwaklhatlä lhamel wet Dios nitch'anlhayaye m'ak tä lhamel fwetaj iwoye, ileche. Tä mälhyejtso, olhamel otujlhache ochumet tä oyenlhi n'olafwek. Elhpej yäpnho t'at lechumet tä pajche yenlhi. ₁₆Wet tälhe ifwalatso, lhip wichi yenlhi t'at n'olafwek, wet lhip wichi lhamel tek tachumwethä mat lhaiwaklhat t'at yämthilek iwo laka'tshayaja. Wet iwo takwelheleya tä häpe lehunis, lhäy'e lefwamthis, lhäy'e lelutses hal'äy, lhäy'e lakay'uchelis tä tsänt'ähes. Wet niyatey iyej t'at lhamel tä itetshan ₁₇tä lhamel yenlhi n'olafwek. Wet häp iyhäj tä talhunej n'olafwek lhipey tä wasi, lhamel tujlhache t'at lechumettso mat ichäj'atwethä takwelheley. ₁₈Wet nilhokej hin'ol tä tachumwethä y'uyitchechufwi lakawak häp lefwajnhates. Wet in'oyej häp elh tä yafwutche lefwol tä tson'ataj ch'u. ₁₉Wet ofwenho hin'ol tä iyhäj kaniyatey, lhäy'e hin'ol tä kalelhäjiche, lhäy'e nilhokej wichi, wet oyok:

–Lhachumtesna häpe t'at m'ak tä wuj wet äp pites, wet y'ap'akhit'awek, n'a'atoswek tä y'enlhi n'olafwek. ₂₀Tä mälhyejtso, chik leläte tson'ataj ch'u, ahutay n'oyejen, wet lhaka Dios tach'otla n'amehen wet tatayhlahlä lhatayhfwas.

₂₁Wet mälhyejtso tä olhamel owoye tä otchumwethä ifwala mälhewek. Wet lhip wichi tek tachumwethä mat lhaiwaklhat t'at tä iwo takwelheleya yämthilek iwo laka'tshayaja. ₂₂Häte ofwenho wichi tä oyok:

–Elh weihalhapej, lhäy'e lakawo tä yen lech'otfwaya, is chik ilech'oye n'olafwek tä honatsi yämthilek t'u n'oyehen, wet tachumwethä tä ifwala. ₂₃Wet olham lhäy'e opuhfwas, lhäy'e iyhäj tä och'otfwas, lhäy'e hin'ol tä iwo ot'unfwaya, ohanhiyejt'a chik olhamel olanche ow'uyis. Mat elhpej ichäjlhi t'at lehun tä laka'tshayajcha.