1-2Wet ifwala tä ichun, häp iwel'a siete, wichi lhaihutwek tä ihi Jerusalén lhip tä iwhäye lepe tä tataye inät. Wet lhamel tahuyej sacerdote Esdras wet yok:–Chäj alhoho Moisés lesaynek tä häpe Lhawuk lhämtes tä hiw'enho Israel.
Lhamel iwoynejetso lhämet tsi Esdras häpe hin'o tä lhayen lewoyayej Lhawuk lhämtestso. Tä mälhyejtso, lham ichäje wichi tä lhaihutwek, hin'ol, atsinhay, lhäy'e nilhokej lhamel tä lhethey nit'una yämthilek ihanej m'ak tä õyahyen. 3-5Wet Esdras takasitpe m'ak tä õyen n'ot'äsaweta tä õyenlhi. Wet hin'ol tä takasitwhäye tä tumej lefwomkat häpehen Matatías, Sema, Anías, Urías, Hilcías, lhäy'e Maasías. Wet hin'ol tä takasthen tä tumej lhip tä lets'amkat häpehen Pedaías, Misael, Malquías, Hasum, Hasbadana, Zacarías, lhäy'e Mesulam. Wet nech'e Esdras hich'enhi n'olesaynek. Wet tä wichi hiw'ene, tsi atojphä n'ot'äsawet tä i'pe, wet nilhokej takasthen. Wet tälhe tä nech'e fwala pajtha ifwala ihi lechowej tä Esdras yahyen n'olesaynek. Ihi t'at lhip tä yiwithi lepe tä tataye inät. Wet nilhokej wichi tä tach'ahuye häp Dios lhämet tä Esdras yahyen. 6Wet Esdras iwunit Lhawuk, häp Dios tä lajit letumfwaya. Wet nilhokej wichi ipiyenchephä takweyey wet yok:
–¡Amén! ¡Amén!
Wet t'upechehchä pajtha letachol tajiche honhat tä n'okwiyej Lhawuk. 7Wet Leví lhayis tä lheyis Josué, Bani, Serebías, Jamín, Acub, Sabetay, Hodías, Maasías, Kelita, Azarías, Jozabad, Hanán, lhäy'e Pelaías, lhameltso häp tä ichufwenej wichi häp Dios lhämtes. Wet tä kamaj wichi takasthen, 8lhamel ifwitsenej lechos tä yahyen Dios lhämet. Wet elhpej tä nhanayej Hebreo lhämet, lhamel y'ithatho m'ak tä yäme. 9Wet tä wichi iläte Lhawuk lhämet, lhamel tafwchehchä. Tä mälhyejtso, gobernador Nehemías, lhäy'e Esdras tä häpe sacerdote wet äp hin'o tä lhayen lewoyayej Lhawuk lhämtes, lhäy'e häp Leví lhayis tä ichufwenej wichi häp Lhawuk lhämtes, lhamel tahuyej wichi wet yok:
–Yej fwitajwethä wet yej tafwchehchä. Tsi ifwalana Lhawuk Dios t'amajchet. 10Mähen, tufway äk tä wuj tä is wet yäyej hat'es tä hak'onek. Wet tisiche aiyhäj tä niw'ena lhäk, tsi ifwalana n'amel y'en lhat'amajchetayej Lhawuk. Yej fwitajwethä, tsi chik a'akäjejlhi Lhawuk, häp tä amel akhajyhayaj.
11Wet Leví lhayis tahuyej wichi wet yok:
–Wo atamsekisa, yej tafwchehchä. Tsi ifwalana Lhawuk t'amajchet.
12Wet nech'e nilhokej wichi yäpnhomche lew'etes, t'ekhen wet iyä, häte tisiche lhäk häp iyhäj. Wet wuj tä is lakäjyaj tä iwoye, tsi lhamel ihanej m'ak tä õ'chufwenejen.
N'okäjyaj tä lhey N'ohupelis
13Tä ifwala elh nilhokej hin'ol tä thänhäy, lhäy'e sacerdotes, lhäy'e Leví lhayis, lhamel lhaihutwek tä iyej Esdras wet lhamel lhaichufwenejen häp Lhawuk lhämtes. 14Wet lhamel hiw'en n'olesaynek tä yäme tä Lhawuk ifwenho p'ante Moisés tä yok:
–Chik nichätepej iwel'a siete, is chik Israel lhayis ichechufwi lehupelis tä lhamel yen lakäjyaja n'oyej.
15Tä mälhyejtso, õ'wo silätayej nilhokej wichi tä ihiche lhipey tä lew'etes, lhäy'e Jerusalén, õyok:
–Is chik lehoye tayhi, ukwe hal'ä lhachal tä wuj tä lew'ole ihi, olivo, fwitsuk, wet enawethä ahupelis, mälhyej tä N'olesaynek yäme.
16Wet nilhokej wichi yikhen tä t'ukwe, wet ihäne lew'etes wet yenwethä lehupelis. Iyhäj itiche'pe lewukwey, wet iyhäj itihiche laka alho, wet iyhäj itihi Dios Lew'et ka'alho, wet iyhäj itihi lhip tä yiwite lepe tä tataye inät, wet iyhäj itihi lhip tä yiwite Efraín lepe. 17Wet nilhokej wichi tä tapinhomche lhipey tä lew'etes tä lhamel tafwayej tä õyen kwenkaya, lhamel yenwethä lehupelis wet ichechufwi. Tälhe ifwala p'ante Josué, Nun lhäs, nem iche, nemhit wichi yenpejwethä lehupelis. Wet tä lhamel iwoye täja, lhamel wuj tä lakäjyaj ihi. 18Wet siete ifwalas tä wichi yen lakäjyaja tä iwujyen Dios. Wet ifwalapej, tälhe ifwala tä lhamel iwo tesa pajtha nichäte ifwala tä lepes, Esdras yahyen Dios lhämet. Wet tä tajyäme siete ifwalastso, lhamel lhaihutwek tä häpe ifwala tä lepes lhamel lakäjyaj, mälhyej tä Dios lhämet ne'tek iwoye.
