Núm 11

₁Israel lhayis iwoyeje lhämtes tä ni'isachehen, yäme tä isit'a m'ak tä Lhawuk iwoyeje lhamel. Tä Lhawuk iläte, wuj tä lewäk ihi wet ichene itäj yämthilek ilunej lhamel lew'et. ₂Wet wichi t'änhen, ne'tek Moisés tach'ote. Tä mälhyejtso, Moisés lhaip'altseneje Lhawuk häp lhamel, wet y'om itäj. ₃Häp tä tamenej tä õyen lheya Tabera häp lhiptso, häp n'olhämet tä yok, Y'uho. Tsi häp tä itäj tä tälhe Lhawuk y'uho tä ihi wet ilunej lhamel.

₄Iche wichi tä w'enhache lhamej tä lhayej Israel lhayis, wet ts'ilak at lhäk tä yen tichunhayaja. Wet Israel lhayis iten m'ak tä lhamel iwoye, wet tafwchehchä wet yok:

–¿Atsihilak hiw'en n'amhohen itshäwet t'isan yämthilek y'atufw? ₅¡Tä y'ehinaj Egipto, athahiyejt'a w'ahat tä y'atufw, lhäy'e lhay chik häpe chik y'awatläk y'atufw, iche t'at! ₆¡Mat athana nehläs n'ailänhen, y'achuyuhlä iyhäj n'olhäk, y'at'elejen tä ts'ilak maná tä y'atufw!

₇Maná hätet iwoye lhoy tä lelemsas tä ipelas, wet äp ika'tuhen, hätet iwoye hal'ä lhits'i. ₈Wet wichi yikhenpej tä ihutwek wet ichofwajiche, wok tajlhama tä iwasthiche, wet ipen wok yen pana. Wet akäj tä õyen tortillaya, lakäjyaj hätet iwoye harina tä õ'kasoyej aceite. ₉Tä honatsi tä nitsäyhchä ayas, häte nitsäyhchä maná.

₁₀Moisés iläte Israel lhayis tä lhamel tafwchehchä tä ihiche lewukwey lepelis. Wet wuj tä lewäk ihi Lhawuk, wet Moisés häte tek akäjejlhi m'ak tä wichi iwoye. ₁₁Wet tahuyej Lhawuk wet yok:

–¿Chipte tä kat'amaja n'oyej tä ohäpe akawo? ¿Hä iche m'ak tä aknikäjayejlhi tä owoye, wet tamenej tä hach'atkanyaj n'oyej tä lene'tek olham t'at tä otetshan wichina? ₁₂Ohäpkhit'a lajcha wok lako tä lene'tek otch'awejwethä, hätet iwoye nä'tshas tä õ'häläkwiwethä, pajla'tha nichäte honhat tä lefwenho p'ante lhamel letetsel. ₁₃¿Chi otälhthi itshäwet t'isan yämthilek ow'enhomche wichi häpkhilek lhamel tufw? Tsi lhamel ihopej n'oye wet tafwlhi n'ohi wet yok, “¡W'en n'ohohen itshäwet t'isan!” ₁₄Okalhihit'ak otch'otehen nilhokej lhamel, tsi wujpey. ₁₅Chik mälhyej'atna m'ak tä lewoyej n'oye, ot'alhek lep'altsenn'o. So n'oyej ow'atshancheyaj, chik matche tä a'akäjlhi n'oyej, häpkhilek mälhyej ninäma n'oye m'ak tä ni'isa.

₁₆Lhawuk nichulho Moisés wet yok:

–Hutwek setenta hin'ol tä thänhäy tä lhetheyej Israel lhayis, wet hänela lhamel häp carpa tä okasthawet. Wet am lhäy'e lhamel niwhila n'ohlä. ₁₇Onuhlahchä wet otahuyhila amej. Wet otchumhiyela lhip Espíritu tä i'atape, wet ow'enhihomchela lhamel yämthilek tach'ot ame tä letetshan häp wichina, häpkhilek nemhit atefwajejni achumet.

₁₈“Fwenho wichi, Is chik iwo lelejyaja lhamejen elh weihalhapej tä letetnekej tä häpehen ot'amajchetes, häpkhilek wak'alhen chik ifwala yämthilek tufw t'isan. Oläte lhamel tä tafwchehchä wet yok, ¿Atsihilak hiw'en n'amhohen t'isan yämthilek y'atufw? ¡Is naji tä y'ehi Egipto!

“Tä mälhyejtso, ow'enhihola t'isan yämthilek lhamel tufw. ₁₉Mat tajlhamhiyet'ala chik fwala, wok ifwalas täkwfwas, wok cinco, wok diez, wok veinte ifwalas. ₂₀Mat iwel'a weihalhahilak tufw, pajla'tha tapilchehen lenhutsuy wet ikokyenhiyela. Tsi lhamel yenn'o w'et m'ayeka tä ohäpe Lewuk Dios tä oiyej lhamel, wet tafwchehchä tä ihi tä ottache, wet lhamel yok, ¿Chipte tä y'anuphä tä y'ehi Egipto?”

₂₁Wet Moisés nichulho wet yok:

–¡Wichi tä nek n'okwe iche seiscientos mil (600.000) hin'ol, wet lhok, “Iwel'a weihalhahilak ow'enho t'isan”! ₂₂¿Chip ihi w'asetas tä wuj lhäy'e tson'atas chik õ'länhen yämthilek w'awulhej wichi? ¡Oyenek tej chik y'aw'enho nilhok w'ahat tä ihi lewomekitaj, mat w'awulhiyejt'a!

₂₃Mat Lhawuk yok:

–¿Hä lefwetaj lepes iche okhajyhayaj? Lew'enla chik matche m'ak tä oyäme, wok kamatache.

₂₄Moisés yik tä iwo silätaye wichi häp Lhawuk lhämet tä ifwenho lham. Wet ihutwek setenta Israel lhayis tä thänhäy, wet ne'tek lhamel lhaihute carpa tä Lhawuk lakasthawet, wet lhamel ilunej tä takasthen. ₂₅Wet Lhawuk ihi pule wet inuhchä wet tahuyej Moisés. Wet nech'e tachuma lhip Espíritu tä i'pe Moisés wet hiw'enhomche häp hin'ol tä thänhäy tä ihi setenta. Wet tä Espíritu nichätpe lhamel, nech'e lhämtes hätet iwoye profeta lhämtes. Mat weihalhache t'at täjtso.

₂₆Wet iche täkwfwas lhamel, elh lhey Eldad wet elh lhey Medad, häte Espíritu nichätpe lhamel. Mat ihiyejt'a iyhäj tä iyej carpa tä Lhawuk lakasthawet, mat ihi t'at wichi lew'et. Wet tä Espíritu nichätpe lhamel, wet lhämtes hätet iwoye profeta lhämtes. ₂₇Wet yik hin'o mamse tä iwo silätaye Moisés wet yok:

–¡Eldad lhäy'e Medad häte iwoye profeta lhämtes tä yämwethä, lhamel ihi t'at wichi lew'et!

₂₈Wet Josué, Nun lhäs tä häpe Moisés lech'otfwa tälhe tä mamse, lham yok:

–¡Iwuk Moisés, fwoneje lhamel!

₂₉Mat Moisés nichulho wet yok:

–¿Hä alhen aschentsaja n'o'pe? ¡Wuj tä is chik Lhawuk hiw'enhomche laka Espíritu nilhokej laka wichi, yämthilek hätet iwoye profetas!

₃₀Wet Moisés lhäy'e hin'ol tä thänhäy lhamel yäple wichi lew'et.

₃₁Wet Lhawuk itälhtho lewomekitaj yafwthitaj tä äytaji, wet ichäje wichi tä ihi lew'et wujpey afwenchey tä lhey codornices. Wet i'pe honhat mälhyej chik treinta kilómetros tä ilunej häp wichi lew'et, wet noventa centímetros tä iche letape. ₃₂Wet täkwfwas ifwalas wet honatsi weihalha tä wichi ihutchewek häp afwencheytso. Elh tä niwuja tä ihutwek, leskonhay iche diez. Wet lhamel hich'esajiche wet itihlä ifwala yämthilek tamchäy, wet lhamel iye wichi lew'et lhip.

₃₃Matkat tä Israel lhayis iwo tesa tä tufw afwenchey, wuj tä lewäk ihi Lhawuk, wet ilänej lhamel häp t'inhayaj tä matche tä ni'isa, wet wujpey wichi tä y'inhen. ₃₄Häp tä tamenej tä õyen lheya häp lhiptso Kibrot-hataava, tä yok, N'ochuyaj. Tsi õyetnej tä õtjänhich'oye lep'itseyhay häp wichi tä ts'ilak lhäk tä yen tichunhayaja.

₃₅Israel lhayis yikch'oye täjtso, wet lhamel tujlhache len'äyij pajtha nichäte lhip tä lhey Alhotas, wet häp tä iwo lakasthawetahi.