Moisés tatshupiye hin'ol yämthilek iyahinpe honhat tä Canaán
1Lhawuk tahuyej Moisés wet yok:
2–Chen iyhäj hin'ol yämthilek lhamel iyahinpe Canaán, häp honhat tä ow'enhihola Israel lhayis. Is chik hin'o weihalhapej tä tälhehen doce letetsel, wet is chik häpe elh tä len'ohyaj ihi.
3Wet Moisés ichen hin'ol tä tälhe ts'anis tä Parán tä lhamel ihi, mälhyej tä Lhawuk ne'tek iwoye. Nilhokej häpehen hin'ol tä len'ohyajay ihiche tä iyej Israel lhayis. 4Wet häp tähesna lheyis:
Samúa, Zacur lhäs, tä tälhe wichi tä tälhe letes Rubén.
5Safat, Horí lhäs, tä tälhe wichi tä tälhe letes Simeón.
6Caleb, Jefone lhäs, tä tälhe wichi tä tälhe letes Judá.
7Igal, José lhäs, tä tälhe wichi tä tälhe letes Isacar.
8Oseas, Nun lhäs, tä tälhe wichi tä tälhe letes Efraín.
9Palti, Rafú lhäs, tä tälhe wichi tä tälhe letes Benjamín.
10Gadiel, Sodi lhäs, tä tälhe wichi tä tälhe letes Zabulón.
11Gadi, Susi lhäs, tä tälhe wichi tä tälhe letes Manasés, häp José lhäs.
12Amiel, Gemali lhäs, tä tälhe wichi tä tälhe letes Dan.
13Setur, Micael lhäs, tä tälhe wichi tä tälhe letes Aser.
14Nahbi, Vapsi lhäs, tä tälhe wichi tä tälhe letes Neftalí.
15Geuel, Maqui lhäs, tä tälhe wichi tä tälhe letes Gad.
16Häp tähestso lheyis häp hin'ol tä Moisés ichen yämthilek iyahinpe honhat. Wet Oseas tä Nun lhäs, Moisés ilehatche lhey Oseas wet nech'e lhey Josué.
Hin'oltso iyahinpe honhat
17Moisés ichene hin'oltso honhat tä Canaán yämthilek iyahinpe. Wet tahuyej tä yok:
–Mähen, hoye honhat tä Négueb wet tiyäja'pe lhip tä chenhas. 18Wet yahina'pe honhattso wet lew'enla wichi tä ihi, chik häpe wichi tä takhajayhen wok nitkhajayahen. Lew'enlak häpe wichi tä wujpey wok niwuja'pe. 19Tetshana chik hupuy tä lhamel ihiche häpehen hupuy tä lelafwey ihi wok newache. Wet tetshana chik häpe honhat tä is wok ni'isa. 20Chik häpe honhat tä is, chik yachuyaj ihi, wok ni'isa. Lew'enla hal'äy chik ihi wok newahi. Yej nowayhen, wet chäja kana lhay chik häpe tä tälho honhattso.
Wet ifwalastso häpe t'at tä lewhäy tä y'o uvas. 21Wet yikhen hin'ol tä iyahinpe honhat, tälho ts'anis tä lhey Zin tä tumej tapinhiye, pajtha nichäte lhip tä lhey Alhotaj tä tumej tafwojhiye, tä iwhäye chenhas kawayhi tä ihi Hamat. 22Lhamel inukwe honhat tä Négueb pajtha nichäte Hebrón, häp honhat tä gigante Anak leles Ahimán, Sesay, lhäy'e Talmay, yen lew'eta. Hebrón pajchey tä iche. Tälhe nekchäm p'ante õyenlhi pajtha siete nekchämis, wet nech'e õyenlhi p'ante hupuy tä lhey Soan tä ihi Egipto.
23Wet hin'oltso nichäte p'ante tewok n'äyij tä lhey Eskol. Wet häp p'ante tä lhamel yisthen uva lhachal tä lhay ihi, wet y'uyitche hal'ä wet tilhäj. Häte ichäj higos lhäy'e lhay tä wus tä itolajen tä lhey granadas. 24Wet tewok n'äyijtso õyen lheya Eskol, häp tä õyetnej uva lhachal tä lhay ihi tä Israel lhayis yisthen.
Hin'ol yäpil wet yäme tä honhat tä lhamel iyahinpe wuj tä ni'isa
25-26Tä lhamel ileyej tä iyahinpe honhat cuarenta ifwalas, lhamel yäple Kadés, häp lhip tä ihi ts'anis tä Parán tä Moisés lhäy'e nilhokej Israel lhayis ihi. Tä lhamel nichäte, ifwenho wichi tä lhamel hiw'enpe imälhewek lhipey, wet ipäyne wichi häp lhay tä tälhe honhattso. 27Wet ifwenho Moisés wet yok:
–Olhamel ohoyenaj honhat tä lene'tek oyahinpe. Ow'en tä matche t'at, häpe honhat tä wuj tä is, t'os lhäy'e akäyek tet iwoye inät, iläfwelchehen tä ihi. Wet lhay tä ihi, häp täja tä ochäj ame. 28Mat lhek tetshan, olhämet yok, Wichi tä ihi wuj tä takhajayhen, wet hupuy tä ihi lhäy'e lhip tä wus wet n'olafwey tä lep'ot lhäy'e lhip tä t'un. Ow'en gigante Anak leles, häp tä ihi. 29Wet wichi tä ihi Négueb häpe t'at Amalek lhayis, wet wichi tä yen lew'eta lhip tä chenhas häpehen Het lhayis, lhäy'e Jebús lhayis, lhäy'e Amorreo lhayis. Wet Canaán lhayis lhamel iwhäye lewomekitaj lhäy'e tewok Jordán.
30Mat hin'o tä lhey Caleb ifwone wichi tä ihi tä Moisés tatache, wet yok:
–Mäh n'ekhen, n'alhayen lewuhuya. Y'akalhihila.
31Mat nech'e häp hin'ol tä lhäy'es naji nichulho wet yok:
–¡Kha, y'akalhihit'ala chik y'afwetaj y'anuye häp wichitso! ¡Y'aw'awulhihit'a, wuj tä takhajayhen!
32Wet häp hin'oltso ifwenhomche Israel lhayis tä yäme tä honhat tä lhamel iyahinpe wuj tä ni'isa. Wet yok:
–Häp honhat tä olhamel oyahinnajpe ilänhen wichi tä ihi, wet nilhokej hin'ol tä ow'en lhäy'e lhip tä pites. 33Häte ow'en gigantes tä häpe Anak leles. Tä oiwhäye, olhaiw'en tä ohätet iwoye chol tä lelemsas, wet häte lhamel mälhyej'attso tä iyahin n'ohen.
