M'ak tä is chik elh iwoye tä iwo t'awayhata Lhawuk
1Lhawuk tahuyej Moisés wet yok:
2–Fwenho Israel lhayis olhämetna, oyok, “Chik amel lechätho honhat tä ow'enla amhohen yämthilek lhenay haw'eta, 3wet ihichela ifwalak lhen otw'ayhata w'asetaj wok tson'ataj tä lelän wet õ'wunho yämthilek lewujyenn'o wet lenij ikänitlhin'o. Häp m'ak tä tamenej tä elh iwoye täjtso, elat imatitche lhämet tä iwoyej n'oye, wolak letichunhayaj t'at tä t'uhläk iwo otw'ayhata, wolak häp ifwala tä n'okäjyaj tä iwujyen n'oyej. 4Elh tä iwoye täjtso, is chik hip'ajtej dos kilos harina tä wuj tä is tä õ'lheteji un litro aceite. 5Häp itshätäy tä õ'länhen, is chik õhp'ajtej un litro hat'es tä õyen otw'ayhata elh weihalhapej tson'ataj lhäs tä õ'wunho. 6Wet chik asnak tson'ataj tä õ'län, is chik õhp'ajtej cuatro kilos harina, wet un litro y medio aceite tä õ'lheteji, 7wet un litro y medio hat'es, tä otw'ayhat yämthilek lenij ikänitlhin'o. 8Wet chik w'asetaj chik õ'wunho tä lhen han'okhayaja n'oyej, wolak lelän yämthilek ale'isyen n'oye, wok häp tä lematitche ämet tä lewoyej n'oye, 9is chik lep'ajtej seis kilos harina tä lelheteji dos litros aceite, 10wet dos litros hat'es, wet õ'wunho yämthilek lenij ikänitlhin'o.
11“Häp tähestso m'ak tä is chik wichi hip'ajtej w'asetaj weihalhapej, wok tson'ataj tä asnak, wok tson'ataj lhäs, wok kaylafwaj, chik lhamel yen otw'ayhata. 12Is chik hiw'awlhatej t'at chik nitäkw wok nintäkwa.
13“Nilhokej Israel lhayis iwohiyet'ak niwoyaye lakeyis tä oyämetso chik lhamel iwunhomche m'ayhay tä yen otw'ayhata yämthilek lenij ikänitlhin'o. 14Wet hin'o tä kahäpeya Israel wet yen lew'eta amel, wok takasit ayej amejen, chik lham ihumin chik iwo otw'ayhata wet õ'wunho yämthilek lenij ikänitlhin'o, iwohiyet'ak niwoyaye lakeyis tä oyämetso, mälhyej amel.
15“Häp tähestso häpkhilek amel lewoye, häte wichi tä kahäpeya Israel lhayis. Yej leyej tä lhenay akeya, pajla'tha nichäte ales tä lepes lheley. 16Tähestso y'aje amel lhäy'e wichi iyhäj tä i'amejen, w'enhahit'a lhamej.”
Lhawuk t'awayhat tä häpe pan tä ichun
17Wet Lhawuk tahuyej Moisés wet yok:
18–Fwenho Israel lhayis olhämetna, oyok, “Chik amel lechätho honhat tä ohän amehen, 19wet letufway pan tä lekalhi tä tälho, w'enhata n'oyej elh tä lew'en n'oho. 20Wet chik lhenla otw'ayhata lhip trigo tä ichun, häte ena otw'ayhata harina tä ichun tä õ'lheteji aceite wet enlhila n'oho pan tä otw'ayhat. 21Häp täjtso tä is chik amel lhenlhipej, pajla'tha nichäte ales tä lepes lheley.
Elh tä iwoye lech'isukyaj tä lewetahayaj
22-23“Wet chik amel lep'ethatlä elh chik häpe häp m'ayhay tä ofwenho Moisés, tälhe ifwalahte lham ifwel amhohen olhämtestso, wet lewohiyet'a, wet chik ifwalas tä tatay alhoho ales häte iwohiyet'a, oyok, 24Chik häpe wichi lech'isukyaj tä lewetahayaj, is chik lhamel yen otw'ayhata w'asetaj tä ilän wet õ'wunho yämthilek lenij ikänitlhin'o, lhäy'e m'ayhay tä hip'ajtej tä häpe otw'ayhtes tä yachuyaj lhay lhäy'e hat'es, mälhyej tä one'tek wichi iwoye. Häte is chik yen otw'ayhata kayla tä asnak tä õyen lahaya lhamel lech'isukyajay. 25Wet is chik sacerdote yachaj n'oye nilhokej m'ayhayna häpkhilek otäyhat letes nilhokej Israel lhayis, tsi lech'isukyajay tä iwoye häpe t'at lewetahayajay. Wet häp tä hiw'en n'oho otw'ayhat tä häpe itshäwet tä ilän tä laha lech'isukyajay. 26Otäyhthila lech'isukyajay nilhokej Israel lhayis, lhäy'e wichi tä kahäpeya Israel lhayis tä iyej lhamel, chik m'ak tä ni'isa tä iwoye kahäpeya lenech'ethayaj.
27“Wet chik hin'o tefwajni tä iwoye m'ak tä ni'isa tä kahäpeya lenech'ethayaj, is chik tiskanejpe lech'isukyaj kaylafwaj tä atsinha tä hiw'en nekchäm tefwajni. 28Wet is chik sacerdote yachaj n'oye häpkhilek otäyhat letes, tsi hin'otso lech'isukyaj häpe t'at lewetahayaj. 29Häp olhämtesna y'aje amel tä ahäpe Israel lhayis tä lewoye hach'isukyajay tä awetahayajay, lhäy'e wichi iyhäj tä kahäpeya Israel lhayis tä i'amejen.
30“Mat chik Israel, wok tej chik hin'o tä kahäpeya Israel, lenech'ethayaj t'at tä iwoye m'ak tä ni'isa, iläkwlhin'o. Tä mälhyejtso, is chik õ'soyej hin'otso tä iyej wichi, 31tsi yen w'et m'ayeka olhämet wet iwohiyet'a m'ak tä one'tek wichi iwoye. Õ'sohiyeja wet lham t'at tä tilhäj lech'isukyaj.”
Õ'län elh tä nena t'amajcheta ifwala tä n'ot'elakw'et
32Tä Israel lhayis ihi ts'anis, iche hin'o tä t'ukwe hal'äy tä lelhet huk häp ifwala tä n'ot'elakw'et. 33Wet hin'ol tä hiw'en elhtso ihäne Moisés lhäy'e Aarón, wet ihi tä wichi tatache. 34Wet lhamel iyahin t'at m'ak chik õ'woyeje hin'otso. 35Wet Lhawuk tahuyej Moisés wet yok:
–Is chik õ'län hin'otsi. Is chik nilhokej Israel lhayis ihän alhoye tä ihi wichi lew'et, wet ithatejlhi tuntey.
36Wet lhamel iwoye, ihän alhoye häp hin'otso wet ithatejlhi tuntey pajtha y'il, mälhyej tä Lhawuk ne'tek Moisés ifwenho wichi yämthilek ilän.
N'ow'uy lhawol tä õ'tolnhathen
37Lhawuk tahuyej Moisés wet yok:
38–Fwenho Israel lhayis olhämetna, oyok, “Amel lhäy'e ales, is chik ipätsinchehen m'ak tä y'it wet itolnhathen tä yen lew'uy lhawola, wet is chik itichehen lew'uy lhipey. 39Häpkhilek amel lew'en wet lhen atichunhayaja nilhokej olhämtes tä olham tä ohäpe Awuk Dios ow'en amhohen wet lewoye, wet lewohiyet'a m'ak tä amel atichunhayajay, wok m'ak tä amel lehuminche wet lekäne. 40Yahinpej haw'uy lhawoltso, häpkhilek lhenpej atichunhayaja wet lewoye nilhokej olhämtes, wet alhenay ot'amajchetesa tä ohäpe aka Dios. 41Ohäpe amel Awuk tä oaitonphä tä lhehi honhat tä Egipto, yämthilek ohäpe aka Dios. Ohäpe t'at Awuk Dios.”
