Israel lhayis ikalhi Horma
1Iche p'ante rey tä Canaán lhayis elh tä lew'et hupuy tä lhey Arad tä ihi honhat tä ts'anis tä lhey Négueb. Wet tä lham ihanch'oye tä Israel lhayis nekhen tä tälhche n'äyij tä inukwe lhip tä lhey Atarim, lham yik tä ihoye yämthilek iwo laka'tshayajayej, wet yen kwenkaya iyhäj Israel lhayis. 2Wet Israel lhayis iwoyeje lhämet häp Lhawuk wet yok:
–Chik letach'ot n'oyehen yämthilek okalhi häp wichitso, wet owasthihichela nilhokej laka hupuy.
3Wet Lhawuk iwoye, hiw'enho t'at m'ak tä lhamel t'alheje, wet tach'ote yämthilek ikalhi Canaán lhayis. Wet Israel lhayis itäyhat nilhokej lhamel lhäy'e laka hupuy. Wet õyen lheya Horma häp honhattso, häp n'olhämet tä yok, N'otäyhyaj.
Amlhätaj tä bronce
4Israel lhayis yikch'oye chenaj tä lhey Hor wet inukwe n'äyij tä tiyäje Lewomekchät, lhamel ilunej honhat tä Edom. Wet tä lhamel hiw'en tä pitaj len'äyij, 5lhamel iwoyeje lhämtes tä ni'isa häp Dios lhäy'e Moisés, wet yok:
–¿Chipte tä amel letonphänaj olhamel tä oihi Egipto? ¿Hä let'uhläk oy'inhen tä oihi ts'anisna? Inät ihichet'a, lhäy'e olhäk. ¡Olhamel oy'elej olhäk tä newache elh!
6Wet Lhawuk ichene amlhäs tä n'ot'ilek ihiche wet yokwajen wichi, wet wujpe Israel lhayis tä y'inhen. 7Wet wichi ihoye Moisés wet yok:
–Olhamel otes ihi tä owoyeje olhämtes tä ni'isa tä ottayhlä Lhawuk wet äp ottay ahilä. Alhyen n'oyehen Lhawuk yämthilek itiyej kanhi amlhäs.
Wet Moisés iwo t'alhyaja'pe wichi, 8wet Lhawuk tahuyej Moisés wet yok:
–Enlhi amlhätaj tä chinaj, wet tila'pe hal'ä wet tshänahchä. Wet elh chik häpe chik amlhäj yokwaj is chik iyahin amlhätaj tä i'pe hal'ä, häpkhilek n'ila.
9Wet Moisés yenlhi amlhätaj tä bronce, wet iti'pe hal'ä wet itshänchä. Wet elhpej tä amlhäj yokwaj iyahin amlhätaj tä bronce wet y'inhit'a.
Israel lhayis tujlhache lew'ekyaj
10Israel lhayis tujlhache len'äyij. Tä nichäte p'ante lhip tä lhey N'ohusey, lhamel iwo lakasthawetahi. 11Tälhe N'ohusey wet tujlhache len'äyij pajtha nichäte honhat tä lhey Iye-abarim tä ihi ts'anis, tumej honhat tä Moab lhip tä ifwala tälhche. Wet häp tä iwo lakasthawetahi. 12Tälhe lhipna tujlhache len'äyij pajtha nichäte tewok n'äyij tä lhey Zered. Wet häp tä iwo lakasthawetahi. 13Tälhe lhipna wet tujlhache len'äyij pajtha nichäte tewok tä lhey Arnón, wet tumej ufwey wet iwo lakasthawetahi. Häp tewokna inukwe ts'anis tä tälhe Amorreo lhayis kahonhat, wet inukwe lechowej. Wok oyok, Amorreo lhayis kahonhat tumej lhip elh, wet honhat tä Moab tumej lhip elh. 14Wet häp n'olesaynek tä lhey “Lhawuk Laka'tshayajay” yäme tähestso wet yok:
“Olhamel onukwe lhip tä lhey Waheb tä ihi Sufá,
lhäy'e tewok n'äyhäy,
lhäy'e tewok Arnón.
15Wet onukwehen tewok n'äyhäy
tä tiyäje honhat tä Ar,
pajtha nichäte honhat tä Moab.”
16Wet tälhe tewok Arnón lhamel tujlhache len'äyij pajtha nichäte honhat lhip tä lhey N'opek. Wet häp p'ante tä Lhawuk tahuyej Moisés wet yok:
–Hutwek wichi, ow'enhihola inät.
17Wet Israel lhayis yen teneka tä ichoywethä wet yok:
“¡Opek, nuhatphä inät!
¡N'en lhateneka häp opek!
18Häp opek tä niyatey p'ante yenlhi,
wet hin'ol tä len'ohyaj ihi tä iyej wichi,
inuhtejphä inät häp letsutes.”
Wet Israel lhayis yikch'oye ts'anis wet tujlhache len'äyij pajtha nichäte Matana. 19Tälhe Matana wet nichäte lhip tä lhey Dios Katewok. Tälhe Dios Katewok wet nichäte lhip tä lhey Atoschephä. 20Tälhe Atoschephä wet tiyäje lakawayhi tä ihi honhat tä Moab, tä tataye chenaj tä lhey Pisga. Häp lhipna n'äle t'at häp ts'anis.
Israel lhayis ikalhi rey Sehón
21Israel lhayis ichene iyhäj hin'ol yämthilek ihäne lhämet häp rey Sehón, Amorreo lhayis kaniyat. Wet yok:
22–Olhamel ot'uhläk onukwe aka honhat. Mat tek otiyäjihola lhipey tä akäsw'etes wok n'olafwey tä uvas ihiche. Häte tek oyähiyeja inät tä alewuhuy. Olhamel onuhikwelat n'äyij tä is alhoho pajla'tha otfwayej aka honhat.
23Matkat Sehón iwohiyet'a, tek iwahnej Israel lhayis yämthilek inukwe laka honhat. Wet ihutwek laka nifwotaj wet ihoye Israel lhayis tä ihi ts'anis. Wet tä nichäte lhip tä lhey Jahas, lhamel inuye Israel lhayis. 24Mat Israel lhayis tatayhlä wet ikalhi. Wet isoyej laka honhat tälhe tewok Arnón pajtha nichäte tewok Jabok, wok oyok, pajtha nichäte Amón lhayis kahonhat lepes tä wuj sip'äl tä t'uye. 25Wet Israel lhayis ihiche nilhokej hupuy tä lewuk p'ante Amorreo lhayis. Wok oyok, häp Hesbón, häp hupuy tä lhamya, lhäy'e nilhokej hupuy iyhäj tä tott'ahomche tä lewuk Amorreo lhayis. Wet Israel lhayis yen lew'etesa. 26Hesbón häp tä rey Sehón, Amorreo lhayis kaniyat, lew'et p'ante. Ifwalas tä pajche lham tatayp'antehlä rey tä ihi Moab, wet isoyej laka honhat pajtha nichäte tewok Arnón. 27Häp tä tamenej tä poeta lhayis yok:
“¡Lhuyay, hoye Hesbón,
Sehón kahupuy tä lhamya!
¡Nech'aynhi, äm takhajay!
28“Itäj tä y'uho tälho p'ante
Sehón kahupuy Hesbón.
Wet itäyhat hupuy tä Ar tä lewuk Moab,
lhäy'e chenhas tä iwhäye Arnón.
29¡Wuj tä ap'elitses, Moab lheley!
¡Attäy, amel tä len'okwiyej Quemós!
Aka diostso tach'othiyet'a
aka hin'ol wet inukwe alhoho,
wet hach'efwas Sehón yen kwenkaya.
30“Mat athana noj lakhajyhayaj Hesbón,
wet nilhokej honhat wasi t'at,
tälhe Dibón yäk nichäte Nofa,
itäj iwunhomche hupuy pajtha nichäte Medeba.”
Israel lhayis ikalhi Og, rey tä ihi Basán
31Mälhyej p'antetso tä Israel lhayis ihi Amorreo lhayis kahonhat. 32Häte Moisés ichen hin'ol iyhäj yämthilek iyahinlhi hupuy tä Jazer. Wet Israel lhayis ikalhi hupuytso, lhäy'e hupuy tä tott'ahomche, wet yokweschephä Amorreo lhayis tä ihiche. 33Tä lhamel ileyej, wet yikhen wet tiyäje honhat tä Basán. Matkat Og, rey tä ihi, yik, lhäy'e laka nifwotaj, yämthilek iwo laka'tshayajayej Israel lhayis tä ihi Edrey. 34Wet Lhawuk tahuyej Moisés wet yok:
–Yej nowaye niyattso. Tsi olham oyachaj ame, lhäy'e nilhok laka nifwotaj, lhäy'e laka honhat. Wet is chik letech'aynhiyeja Sehón, Amorreo lhayis kaniyat tä ihi Hesbón.
35Wet Israel lhayis ilän Og, lhäy'e leles tä hin'ol, lhäy'e nilhok laka nifwotaj. Wet niwohit elh chik imälhehi, wet lhamel lhayen lewuhuya laka honhat.
