1Wet Balaam tahuyej Balac wet yok:
–Enlhi n'oho siete altares, wet chäja siete w'asetas tä asnakis wet siete tson'atas tä asnakis.
2Wet Balac yenlhi m'ak tä Balaam ifwenho, wet lhamel ilänpej weihalha w'asetaj wet weihalha tson'ataj, wet iti'pe elhpej altar pajtha w'awulho siete altares. 3Wet Balaam tahuyej Balac wet yok:
–Mälhe kana, ewhäye itshätäy tä lewunhomche. Olham oyik, otetshan chik Owuk Dios ihohla n'oye. Wet ofwenla amho m'ak chik lham ipäyen n'oye.
Wet Balaam iho'pe chenaj, 4wet Dios ihoye. Wet Balaam tahuyej wet yok:
–Pajche oyenlhi siete altares, wet elh weihalhapej oti'pe w'asetaj tä asnak lhäy'e tson'ataj tä asnak wet owunhomche.
5Wet Lhawuk itihi lak'aj häp lhämet yämthilek iwoye. Wet tahuyej wet yok:
–Äple Balac, fwenhola olhämet tä ofwel amho.
6Wet Balaam yäple Balac tä takasitwhäye itshätäy tä iwunhomche, lhäy'e Moab lhayis kaniyatey. 7Wet Balaam ifwenho Dios lhämet wet yok:
“Balac, rey tä ihi Moab,
t'än n'oye tä oihi Aram.
Ne'tek ohoye tä otälhe chenhas tä tumej hichä.
Yok, Lhuu, ch'ot n'oye,
käpfwayeje m'ak tä ni'isa häp Israel.
T'uhläk lewit'äy ihi Jacob laka wichi.
8¿Mat chiwoyek otkäpfwayeje m'ak tä ni'isa
m'ak tä Dios takäpfwayeje m'ak tä is?
¿Chiwoyek ot'uhläk lewit'äy ihi
m'ak tä Owuk Dios t'uye?
9Tä oi'pe chenhas tä atoschephäna oyahne t'at.
Ow'en tä häpe wichi tä w'enha lhamej,
tek häte iwoye wichi tä i'pe honhat.
10Wet wujpey, wet nehit katsik ihanej chihätefwas,
tsi hätet iwoye holo,
wet nehit katsik ihanej chik iwo t'ufwahtesa.
Chik oy'il, is chik ohätet iwoye wichi tä isentso,
wet is chik okapes hätet iwoye lhamel lakapes.”
11Wet Balac ihumnhichet'a m'ak tä Balaam iwoye. Wet yok:
–¿Atsi m'ak tä lewoye? Olham oaihän kana tä ot'uhläk letakäpfwayeje m'ak tä ni'isa häp otayhfwas. Mat athana letakäpfwayeje t'at m'ak tä is.
12Balaam nichulho wet yok:
–Pajchemat ofwel amho tä oyomat, “Oyämhiyelat m'ak chik Owuk Dios ne'tek oyäme.”
Balaam yachajo tä takäpfwayeje m'ak tä is häp Israel lhayis
13Balac inityen wet yok:
–Is chik lenek n'okwe, n'ahoye lhip elh wet lew'enla lhip wichi tä Israel lhayis. Häp tä is chik letakäpfwayeje m'ak tä ni'isa häp lhamel.
14Wet Balac yikchufwi Balaam wet ihäne lhip tä lhey Honhat tä Isphä tä i'pe chenaj tä lhey Pisga. Tä nichäte, yenlhi siete altares, wet ilänhen w'asetas tä asnakis lhäy'e tson'atas tä asnakis. Wet itiche'pe elhpej altar weihalha w'asetaj wet weihalha tson'ataj. 15Wet Balaam tahuyej Balac wet yok:
–Mälhe kana, ewhäye itshätäy tä lewunhomche. Olham oyik yämthilek onchutej Dios.
16Wet Lhawuk ihoye Balaam, wet itihi lak'aj häp lhämet tä is chik iwoye. Wet tahuyej wet yok:
–Äple Balac, fwenhola olhämet tä ofwel amho.
17Balaam yäple Balac tä takasitwhäye itshätay tä iwunhomche, lhäy'e Moab lhayis kaniyatey. Wet Balac tay'ätshane Balaam wet yok:
–¿Chiwoye lhämet Awuk Dios?
18Wet Balaam ifwenho Dios lhämet wet yok:
“Balac, Sipor lhäs, ch'ahu n'oye.
19Dios tek häte iwoye hin'ol,
tek w'et yämlhi.
Iwohit'a elha letichunhayaj,
wet m'ak tä iwoye, iwoye t'at.
Chik iwoye lhämet chik häpe, yäm at matche,
wet chik ifwel m'ak chik häpe, imatitche t'at.
20In'oyej lhämtes yämthilek
oyen käpfwayajayej m'ak tä is.
Tä mälhyejtso,
chik lham iwoye lakäpfwayaj tä is,
tek ottayhlä.
21Ihichet'a elh chik hiw'en Israel t'akanyaj
wok m'ak chik ni'isa tä iwoye
häp Jacob laka wichi.
Lhamel Lewuk Dios iyej t'at,
wet lhamel yen häpeya laka Niyat.
22Häp Dios tä itonphä tä tälho Egipto,
iwopej laka'tshayaja'pe lhamel,
hätet iwoye w'asetaj tä fwitsaj.
23Ihichet'a hiyawu wok han'ältshantsaj
chik ihanej chik tatayhlä lhamel.
Athana õyämhiyela Israel, õyohlak,
¡Wujpey m'ayhay tä äyteschehen
tä Dios iwoye tä tach'ot amehen!
24Wichina nephä, hätet iwoye t'owalhaj
tä t'uhläk iwo läneka.
Chik nisakanayej lelänek, imähit'a,
wet iyäyej lelänhay w'oyis.”
25Tä Balac iläte Balaam, wet yok:
–¡Tä katakäpfwayayeje m'ak tä ni'isa häp wichina, häte yej takäpfwayeje m'ak tä is!
26Balaam nichulho wet yok:
–¿Hä n'am fwelmat amho tä oyomat, “Oyämhiyelat m'ak tä Owuk Dios ne'tek oyäme”?
Balaam äp yachajo tä takäpfwayeje m'ak tä is häp Israel lhayis
27Balac nichulho wet yok:
–Lhu, ohän ame lhip elh. Elat Dios tach'anlhaye chik letakäpfwayeje m'ak tä ni'isa häp Israel chik lhehi lhiptso.
28Wet Balac ichäj Balaam wet ihänpe chenaj tä lhey Peor, häp lhip tä n'älpe ts'anis. 29Tä lhamel nichätpe, Balaam tahuyej Balac wet yok:
–Enlhi n'oho siete altares, wet chäja siete w'asetas tä asnakis wet siete tson'atas tä asnakis.
30Wet Balac iwoye Balaam lhämet tä ifwenho, wet ilänpej weihalha w'asetaj wet weihalha tson'ataj, wet iti'pe elhpej altar pajtha w'awulho siete altares.
