Yachajo tä õ'wo t'ufwahtesa Israel lhayis
1Tä tajyäme m'ak tä ilänhen wichi, Lhawuk tahuyej Moisés lhäy'e sacerdote Eleazar, Aarón lhäs, wet yok:
2–Wo t'ufwahtesa Israel lhayis. Lesayen nilhokej lheyis iyhäjpej tä lhalepuhfwas, tälhe lhamel tä hiw'en veinte nekchämis, lhäy'e iyhäj tä laka nekchämis inu'pe veinte, häp lhamel tä takhajayhen yämthilek iwo laka'tshayaja.
3-4Wet Israel lhayis ihi honhat tä Moab lhip tä w'awulhchä tä tumej tewok Jordán lhip tä tatayhlä hupuy tä Jericó. Wet Moisés lhäy'e Eleazar ne'tek õ'lesayen lheyis nilhokej hin'ol tä hiw'en veinte nekchämis, lhäy'e iyhäj tä laka nekchämis inu'pe veinte, mälhyej tä Lhawuk ne'tek Moisés iwoye.
Häp tähesna häp Israel lhayis p'ante tälho honhat tä Egipto:
5-6Iche wichi tä tälhehen letetsel p'ante lheyis Enoc, Falú, Hesrón, lhäy'e Carmi, tä häpehen Rubén leles. Rubén häpe Jacob lhäs tä lechunkatsek p'ante. 7Wet tä nilhok Rubén kawichi, iche cuarenta y tres mil setecientos treinta (43.730) hin'ol.
8Falú iwo lhäsa wet lhey Eliab, 9wet Eliab leles lhey Nemuel, Datán, lhäy'e Abiram. Wet Datán lhäy'e Abiram häpe p'ante consejeros tä tatayhlä Moisés lhäy'e Aarón, wet lhaip'ajtej Coré wet tatayhlä Lhawuk. 10Mat honhat tatoy wet lhameltso tiyäjche chowej, lhäy'e Coré, lhäy'e lhamel laka wichi, wet tatäy. Häte doscientos cincuenta (250) hin'ol tä itäj hip'ohen. Lhawuk ipäyne täjtso Israel lhayis yämthilek lhamel nowaye. 11Mat häp Coré leles y'inhihent'a p'ante.
12-13Wet iche wichi tä tälhehen letetsel p'ante lheyis Nemuel, Jamín, Jaquín, Zera, lhäy'e Saúl, tä häpehen Simeón leles. 14Tä nilhok, iche veintidós mil doscientos (22.200) hin'ol.
15-17Wet iche wichi tä tälhehen letetsel p'ante lheyis Sefón, Hagui, Suni, Ozni, Eri, Arod, lhäy'e Areli, tä häpehen Gad leles. 18Tä nilhok, iche cuarenta mil quinientos (40.500) hin'ol.
19-20Wet iche wichi tä tälhehen letetsel p'ante lheyis Sela, Fares, lhäy'e Zera, tä häpehen Judá leles. Häp Judá leles iyhäj tä lheyis Er lhäy'e Onán lhamel y'inhen p'ante tä ihi honhat tä Canaán. 21Wet Fares kawichi letetsel häpehen Hesrón lhäy'e Hamul. 22Wet tä nilhok Judá kawichi, iche setenta y seis mil quinientos (76.500) hin'ol.
23-24Wet iche wichi tä tälhehen letetsel p'ante lheyis Tola, Puvá, Jasub, lhäy'e Simrón, tä häpehen Isacar leles. 25Tä nilhok, iche sesenta y cuatro mil trescientos (64.300) hin'ol.
26Wet iche wichi tä tälhehen letetsel p'ante lheyis Sered, Elón, lhäy'e Jahleel, tä häpehen Zabulón leles. 27Tä nilhok, iche sesenta mil quinientos (60.500) hin'ol.
28Wet iche wichi tä tälhehen letetsel p'ante lheyis Manasés lhäy'e Efraín tä häpehen José leles. 29Manasés lhäs häpe Maquir, wet Maquir lhäs Galaad, 30-32Wet iche wichi tä tälhe hin'otso Galaad tä lhamel letetsel lheyis Jezer, Helec, Asriel, Sikem, Semida, lhäy'e Hefer. 33Wet hin'o tä lhey Zelofehad tä Hefer lhäs, leles ihichet'a, tajlhama leles tsinhay. Wet lheyis Mahla, Noa, Hogla, Milca, lhäy'e Tirsa. 34Tä nilhok Manasés kawichi, iche cincuenta y dos mil setecientos (52.700) hin'ol.
35Wet iche wichi tä tälhehen letetsel p'ante lheyis Sutela, Bequer, lhäy'e Tahán, tä häpehen Efraín leles. 36Wet Sutela kawichi letes häpe Erán. 37Tä nilhok Efraín kawichi, iche treinta y dos mil quinientos (32.500) hin'ol.
Häp tähestso José kawichi tä tälhehen letetsel.
38-39Wet iche wichi tä tälhehen letetsel p'ante lheyis Bela, Asbel, Ahiram, Sufam, lhäy'e Hufam, tä häpehen Benjamín leles. 40Wet Bela kawichi letetsel häpehen Ard lhäy'e Naamán, häp tä lhamel lajcha Bela. 41Tä nilhok Benjamín kawichi, iche cuarenta y cinco mil seiscientos (45.600) hin'ol.
42Wet iche wichi tä tälhe letes p'ante lhey Suham tä häpe Dan lhäs. 43Tä nilhok Suham kawichi, iche sesenta y cuatro mil cuatrocientos (64.400) hin'ol.
44Wet iche wichi tä tälhehen letetsel p'ante lheyis Imna, Isuy, lhäy'e Bería, tä häpehen Aser leles. 45Wet Bería kawichi letetsel Heber lhäy'e Malquiel. 46Wet Aser lhäse iche tä lhey Sera. 47Tä nilhok Aser kawichi, iche cincuenta y tres mil cuatrocientos (53.400) hin'ol.
48-49Wet iche wichi tä tälhehen letetsel p'ante lheyis Jahseel, Guni, Jezer, lhäy'e Silem, tä häpehen Neftalí leles. 50Tä nilhok, iche cuarenta y cinco mil cuatrocientos (45.400) hin'ol.
51Wet tä nilhok Israel lhayis tä õ'lesayen lheyis, iche seiscientos un mil setecientos treinta (601.730) hin'ol.
Häp täja lakeyis honhat tä Israel lhayis hiw'en lhamhomche
52Lhawuk tahuyej Moisés wet yok:
53–Is chik lew'enhomche honhat häp wichina. W'awlhateja wichipej tä wujpe wok niwuja'pe, mälhyej tä ihi lehi tä õ'lesayen. 54Wichi tä wujpe is chik lhäm wuj honhat tä lew'enho. Wet iyhäj chik niwuja'pe is chik wujit'a honhat chik lew'enho. 55Mat wola sorteaya chik lew'enhomche honhat, yämthilek iyhäjpej ikathiyeja honhat tä lewuhuy. 56Wola sorteaya chik lew'enhomche honhat häp wichi, häp iyhäj tä wujpe lhäy'e iyhäj tä niwuja'pe.
Õ'wo t'ufwahtesa Leví lhayis
57Wet Leví lhayis tä õ'lesayen lheyis, letetsel häpehen Gersón, Coat, lhäy'e Merari. 58Wet lhamel tä tälhe letetsel Libni, Hebrón, Mahli, Musi, lhäy'e Coré, nilhokej häpehen t'at Leví lhayis.
Coat lhäs Amram, 59wet Amram yen ch'efwaya p'ante Leví lhäse tä lhey Jocabed. Lham nichätchä p'ante tä Leví ihi Egipto. Amram lhäy'e Jocabed häp tä leles Aarón, Moisés lhäy'e Miriam. 60Wet Aarón leles häpehen Nadab, Abihú, Eleazar, lhäy'e Itamar. 61Nadab lhäy'e Abihú y'inhen p'ante tä iwunhen m'ak tä lenij akäjche tä Lhawuk kalhämetayej.
62Tä nilhok hin'ol tä Leví lhayis, tälhe elh tä hiw'en iwel'a tefwajni pajtha nichäte iyhäj tä thänhäy, iche veintitrés mil (23.000). Lhamelna lheyis ihiyejt'a iyhäj Israel lhayis lheyis tä õ'lesayen, tsi tek õhw'enhomche honhat tä lewuhuy.
63Häp täjtso tä nilhok Israel lhayis tä Moisés lhäy'e sacerdote Eleazar iwo t'ufwahtesa, tä lhamel ihi p'ante honhat tä Moab lhip tä w'awulhchä tä tumej tewok Jordán lhip tä tatayhlä hupuy tä Jericó. 64Mat häp iyhäj p'ante Moisés lhäy'e Aarón ilesayen tä ihi ts'anis tä Sinaí, niwohit elh lhamel chik imälhehi. 65Tsi pajche y'inhen t'at tä ihi ts'anis, mälhyej tä Lhawuk yäme tä yok, “Y'inhihena.”
Tajlhama Caleb, Jefone lhäs, lhäy'e Josué, Nun lhäs, häp lhamelna tä n'ilahen p'ante.
