Núm 3

₁Häp täja lheyis wichi tä tälhe lechätilis Aarón lhäy'e Moisés häp ifwalas p'ante Lhawuk tahuyej Moisés tä i'pe chenaj Sinaí. ₂Aarón leles häpehen Nadab tä häpe elh tä n'ochunkatsek, wet lech'inhis Abihú, lhäy'e Eleazar, lhäy'e Itamar. ₃Cuatro lhamel tä õyen Lhawuk t'amajchetesa, wet õhw'enho lhamel yämthilek iwoye sacerdotes lechumet. ₄Matkat Nadab lhäy'e Abihú y'inhen p'ante tä ihi tä Lhawuk tatache. Tä lhamel ihi p'ante ts'anis tä Sinaí, lhamel iwun m'ak tä lenij akäjche, wet wuj tä iwäkyhayen häp Lhawuk tä kalhämetayej lhamel. Wet lhameltso newache leles. Tä mälhyejtso, Eleazar lhäy'e Itamar iwoye lechumet tä häpehen sacerdotes, wet Aarón lhamel lajcha häp tä itetshan lhamel.

₅Wet Lhawuk tahuyej Moisés wet yok:

₆–Äne Leví lhayis yämthilek iwoye sacerdote Aarón lhämet wet tach'ote. ₇Is chik iwoye lechumet tä ihi carpa tä owukwe, yämthilek tach'ote Aarón lhäy'e wichi. ₈Is chik t'uye m'ayhay tä ichufwi owukwe wet tach'ote Israel lhayis. ₉W'enhola Leví lhayis häp Aarón, wet lhachaje lechumet tä tach'ote Aarón lhäy'e leles tä lepes lheley. ₁₀Wet tihila Aarón takwey häp sacerdote lechumet, lhäy'e leles. Mat elh chik kahäpeya sacerdote, chik yenlhi sacerdote lechumet, letes ihi wet iwohiyet'ak õkniläna.

₁₁Lhawuk tahuyej Moisés wet yok:

₁₂–Olham ottshupiyehen Leví lhayis tä lhayej Israel lhayis tä oyen lahaya Israel lhayis leles hin'ol tä lechunkatshay. Olewuk t'at Leví lhayis, ₁₃tsi nilhokej nä'tshas tä n'ochunkatshay Olewuk t'at. Tä olänhente Egipto lheley leles tä lechunkatshay, oyen at t'amajcheta Israel leles tä lechunkatshay lhäy'e leläy tä lechunkatshay. Olewuk t'at. Ohäpe Dios tä matche.

₁₄Lhawuk tahuyej Moisés tä ihi ts'anis tä Sinaí, wet yok:

₁₅–Wo t'ufwahtesa Leví lhayis. Lesayen lheyis lajchalis lhäy'e leles, häp iyhäjpej tä lhalepuhfwas. Lesayen lheyis häp nilhokej hin'ol, tälhe elh tä hiw'en iwel'a weihalha lhäy'e iyhäj tä thänhäy.

₁₆Wet Moisés iwoye, iwo t'ufwahtesa wet ilesayen lheyis, mälhyej tä Lhawuk ne'tek iwoye.

₁₇Häp tähesna Leví leles lheyis: Gersón, Coat, lhäy'e Merari.

₁₈Wet Gersón leles häpehen Libni lhäy'e Simey, wet wujpey wichi tä tälhe.

₁₉Wet Coat leles häpehen Amram, Ishar, Hebrón, lhäy'e Uziel, wet wujpey wichi tä tälhe.

₂₀Wet Merari leles häpehen Mahli lhäy'e Musi, wet wujpey wichi tä tälhe.

Häp tähestso Leví leles, häp iyhäjpej tä lhalepuhfwas.

₂₁Gersón leles häpehen Libni lhäy'e Simey, wet wujpey wichi tä tälhe. ₂₂Wet tä nilhok hin'ol, tälhe tä hiw'en iwel'a weihalha lhäy'e iyhäj tä thänhäy, iche siete mil quinientos (7.500). ₂₃Wet wichitso iti w'echehi lakasthawet häp carpa tä Lhawuk lewukwe lhip tä tumej tä ifwala y'uy. ₂₄Lhamel laka niyat häpe Eliasaf, Lael lhäs. ₂₅Wet õy'uhyene lhamel häp carpa tä Dios lewukwe, lhäy'e lep'ot, lhäy'e n'oyik tä lepe p'ot, ₂₆lhäy'e wesas tä iche laka alho tä ilunejlhi häp Dios lewukwe lhäy'e altar, lhäy'e wesaj tä ihi alho lepe, lhäy'e niyhäy tä õ'chumyenwethä.

₂₇Wet Coat leles häpehen Amram, Ishar, Hebrón, lhäy'e Uziel, wet wujpey wichi tä tälhe. ₂₈Wet tä nilhok hin'ol, tälhe tä hiw'en iwel'a weihalha lhäy'e iyhäj tä thänhäy, iche ocho mil trescientos (8.300). Wet õy'uhyene lhamel häp Dios lew'et lhip tä T'amajchet, ₂₉wet itihi lakasthawet häp carpa tä Dios lewukwe lhip tä tapinhiye. ₃₀Lhamel laka niyat häpe Elisafán, Uziel lhäs. ₃₁Wet õy'uhyene lhamel häp Arca tä N'ot'amajchet tä Dios lhämtes ihi, lhäy'e mesa, lhäy'e n'ochäkwhis, lhäy'e altares, lhäy'e m'ayhay tä n'ot'amajchetes tä õhch'otyeneje Dios lechumet, lhäy'e sak'al tä tumejlä Dios lewukwech'o tä N'ot'amajchet tä Lhamya, lhäy'e nilhokej m'ayhay tä õ'chumyenwethä.

₃₂Häp sacerdote Aarón lhäs tä lhey Eleazar, häp tä Leví lhayis kaniyat, wet itetshan lhamel tä t'uye Dios lew'et.

₃₃Wet Merari leles häpehen Mahli lhäy'e Musi, wet wujpey wichi tä tälhe. ₃₄Wet tä nilhok hin'ol, tälhe tä hiw'en iwel'a weihalha lhäy'e iyhäj tä thänhäy, iche seis mil doscientos (6.200). ₃₅Lhamel laka niyat häpe Suriel, Abihail lhäs, wet lhamel itihi lakasthawet häp carpa tä Dios lewukwe lhip tä tafwojnhiye. ₃₆Wet õy'uhyene lhamel Dios lewukwe laka tablas, lhäy'e lemäynhay, lhäy'e lech'utey lhäy'e t'äsawetes, lhäy'e nilhokej m'ayhay tä iyej tä õ'chumyenwethä, ₃₇lhäy'e letsutes tä ilunejlhi laka alho, lhäy'e t'äsawetes, lhäy'e chinhas tä t'akw'etes, lhäy'e niyhäy.

₃₈Wet lhip tä tumej hichä tä ifwala tälhche tä tatayhlä carpa tä Dios lewukwe, häp tä Moisés lhäy'e Aarón, lhäy'e Aarón leles, lhamel itihi lakasthawet. Wet lhamel itetshan Dios lechumet tä ihi lewukwe yämthilek Israel lhayis isej. Wet elh chik kahäpeya sacerdote, chik yenlhi sacerdote lechumet, letes ihi wet iwohiyet'ak õkniläna.

₃₉Tä mälhyejtso, Moisés lhäy'e Aarón iwo t'ufwahtesa häp Leví lhayis, häp iyhäjpej tä lhalepuhfwas, mälhyej tä Lhawuk ne'tek lhamel iwoye. Wet tä nilhok hin'ol, tälhe tä hiw'en iwel'a weihalha lhäy'e iyhäj tä thänhäy, iche veintidós mil (22.000).

₄₀Lhawuk tahuyej Moisés wet yok:

–Wo t'ufwahtesa Israel lhayis leles tä lechunkatshay tä hin'ol, tälhe tä hiw'en iwel'a weihalha, wet lesayen lheyis. ₄₁Wet en lahaya Leví lhayis wet en amajcheta n'oyej yämthilek Olewuk t'at. Ohäpe Dios tä matche. Häte lhamel leläy tä lechunkatshay, en lahaya Leví lhayis leläy wet en amajcheta n'oyej yämthilek Olewuk t'at.

₄₂Wet Moisés iwo t'ufwahtesa Israel lhayis leles tä lechunkatshay, mälhyej tä Lhawuk ne'tek iwoye. ₄₃Wet tä nilhokej häp hin'ol tä n'ochunkatshay tä õ'lesayen lheyis, tälhe han'äfwaj tä hiw'en iwel'a weihalha, iche veintidós mil doscientos setenta y tres (22.273).

₄₄Wet Lhawuk tahuyej Moisés wet yok:

₄₅–Chuma Leví lhayis tä Israel lhayis leles tä lechunkatshay laha, lhäy'e Leví lhayis leläy tä Israel lhayis leläy laha. Leví lhayis Olewuk t'at. Ohäpe Dios tä matche. ₄₆Mat häp Israel lhayis leles tä lechunkatshay wujpey, inu'pe Leví lhayis. Wet imälhehi doscientos setenta y tres (273), wet Leví lhayis w'awulhiyejt'a tä õtiskanejpe elh weihalhapej. ₄₇Tä mälhyejtso, alhe elh weihalhapej häp hin'ol tä imälhehi, is chik iwom letape cinco chinaj t'äj. Chumyenlhi chinaj t'äj tä sacerdotes ichumyenlhi. ₄₈Wet chinaj t'äjtso w'enhola Aarón lhäy'e leles, häp Israel leles tä imälhehi laha.

_49-50Tä mälhyejtso, Moisés ihutwek chinaj t'äj tä laha Israel lhayis leles tä lechunkatshay tä imälhehi. Tä lhamel tiskan letapehen, ichumyenlhi chinaj t'äj tä sacerdotes ichumyenlhi. Wet iche mil trescientos sesenta y cinco (1.365) chinaj t'äj tä õ'hutwek. ₅₁Wet Moisés hiw'enho häp Aarón lhäy'e leles, mälhyej tä Lhawuk ne'tek iwoye.