M'ak tä is chik elh iwoye chik iwoyeje lhämet häp Lhawuk
1Moisés tahuyej hin'ol tä Israel lhayis kaniyatey wet yok:
–Lhawuk ne'tek wichi iwoye lhämetna, yok, 2“Chik iche elh chik iwoyej n'oye lhämet wet yok, Owohiyela, wet hit'unhatche n'oyej lhämet, is chik imatitche lhämet tä iwoye, isit'ak nimattache.
3“Wet chik atsinha lhutsha tä kamaj iyej t'at lajcha, wet iwoyej n'oye lhämet wet yok, Owohiyela, 4wet chik lajcha ihanej m'ak tä t'uhläk iwoye mat tek n'äyejo, chik mälhyejtso, lhutsha is chik imatitche lhämet, isit'ak nimattache. 5Mat chik lajcha ihanej m'ak tä t'uhläk iwoye wet yok, Isit'a, - tä mälhyejtso, isit'ak imatitche lhämet. Tsi lajcha ihumnhichet'a. Häte olham Dios onityenhiyejt'a yämthilek imatitche.
6“Wet elat iche atsinha lhutsha tä iwoyej n'oye lhämet wet yok, Owohiyela täjtso, wok iwoye letichunhayaj tä iläfwel. Mat tä paj wet iwo lech'efwaya, 7wet chik hin'o tä yen lech'efwaya ihanej tä pajche iche m'ak tä atsinha t'uhläk iwoyej n'oye, wet yok, Is t'at, - tä mälhyejtso, nech'e is chik imatitche t'at. 8Mat chik lech'efwa ihanej m'ak tä t'uhläk iwoye, wet yok, Isit'a, - tä mälhyejtso, isit'ak imatitche. Häte olham Dios onityenhiyejt'a yämthilek imatitche.
9“Wet chik atsinha tä iwoye lhämet häpe tesa, wok lech'efwa ileyej, is chik imatitche t'at m'ak tä t'uhläk iwoye.
10“Wet elat atsinha tä pajche lech'efwa ihi iwoyej n'oye lhämet tä ihi lech'efwa lew'et wet yok, Owohiyela täjtso, wet hit'unhatche n'oyej lhämet. 11Wet elat lech'efwa ihanej m'ak tä t'uhläk iwoye, wet ihuminche t'at, wet newache lhämet tä yok, Isit'a. Chik mälhyejtso, is chik atsinha imatitche t'at lhämet tä iwoye, isit'ak nimattache. 12Mat chik lech'efwa ihanej wet n'äyejo chik imatitche, tä mälhyejtso, isit'ak imatitche, tsi lech'efwa tä n'äyejo. Häte olham Dios onityenhiyejt'a yämthilek iwoye.
13“Chik iche atsinha lhämet chik iwoyej n'oye wet yok, Owohiyela, wet chik hit'unhatche lhämet wet äp y'isej tä yok, Olhaichuyhatla, - chik mälhyejtso, lech'efwa t'at tä ihanej m'ak tä is alhoho chik yohlak, Is t'at, wok yok, Isit'a m'ak tä let'uhläk lewoye. 14Wet chik hin'o newache lhämet chik tatayhlä m'ak tä lech'efwa t'uhläk iwoye, tej tä lham ihanej mat ihichet'a lhämet pajtha nitäkw ifwalas, tä mälhyejtso, atsinha iwohiyet'ak nimattache m'ak tä t'uhläk iwoye. 15Mat chik tajyäme ifwalas wet hin'o nech'e tä yok, Isit'a, - tä mälhyejtso, lham t'at tä letes tä atsinha nimattache lhämet.”
16Häp tähestso Lhawuk lhämtes tä hiw'enho Moisés yämthilek hin'o lhäy'e atsinha tä lech'efwa iwoye, lhäy'e tä hin'o lhäy'e lhäse iwoye tä kamaj lhutsha iyej lajcha lew'et.
