Wichi tä tälhehen letetsel Rubén lhäy'e Gad, lhamel t'uhläk yen lew'eta tewok Jordán lhip tä tumej hichä
1Wichi tä tälhe letes Rubén lhäy'e iyhäj tä tälhe letes Gad, wuj leläy tä iyej lhamel. Wet tä lhamel hiw'en honhates tä lheyis Jazer lhäy'e Galaad häpe honhates tä wuj tä is chik itshätäy ihi, 2tä mälhyejtso, lhamel ihoye Moisés lhäy'e sacerdote Eleazar lhäy'e hin'ol tä wichi kaniyatey, wet tahuyej tä yok:
3–Lhek yahin häp hupuy tä lheyis Atarot, Dibón, Jazer, Inätw'et, Hesbón, Dios Wujyaj, Sebam, Nebo, lhäy'e Beón. 4Häp ifwalasnaj Lhawuk tach'ot n'amehen, wet y'akalhi honhatestso yämthilek n'alewuhuy tä n'ahäpe Israel lhayis. Wet wuj hup tä itshätäy lhäk ihi wet wuj olhamel oläy. 5Chik lehuminche, w'en n'ohohen honhatestso wet n'äy n'ohihen tewok Jordán lhip elhna.
Moisés itiyej lewäk häp wichi tä iwoyetso
6Moisés nichulho lhamel wet yok:
–¿Hä let'uhläk lemälhe kana amel tä aiyhäj iwo laka'tshayaja? 7¿Chipte tä let'uhläk letamenayej Israel lhayis chik ifwune honhat tä Lhawuk hiw'enho lhamel? 8Letenay t'at m'ak tä ajchalis iwoyehte tä olham ochen tä tälhe Kadés-barnea tä ot'uhläk lhamel iyahinlhi honhat. 9Tä lhamel nichäte p'ante tewok n'äyij tä lhey Eskol, wet lhamel iyahinpe honhat. Mat tä lhamel nämhen, iwoye lhämtes tä tamenej Israel lhayis tä ifwune honhat tä Lhawuk hiw'enho lhamel. 10Wet ifwalatso Lhawuk wuj tä itiyej lewäk häp wichi. Wet hit'unhatche lhämet tä yok, 11“Häp wichi tä laka nekchämis inu'pe veinte tä lhamel tälhohte Egipto, nilhokej lhamel tek nichäthihola honhat tä ot'untejchehte olhämet tä ofwenho Abraham lhäy'e Isaac lhäy'e Jacob tä oyok, Ow'enhihola ales. Tsi häp tä lhamel ileyej tä ihänlhin'o. 12Tajlhama Caleb tä lajcha Jefone tä häpe Kenaz lhayis elh, lhäy'e Josué tä lajcha Nun, lhamelna nichäthiholat honhattso, tsi ilehiyejt'a tä ihänlhin'o.” 13Wet tä Lhawuk itiyej lewäk Israel lhayis, ilunkathi ts'anis pajtha cuarenta nekchämis, wet y'inhen nilhokej lhamel tä iwoye m'ak tä ni'isachehen.
14“¡Wet athana amel tä aleles häp lhamel tä n'och'isukyaj länhay, let'uyayhläk letenay m'ak tä lhamel iwoye tä ni'isa, wet Lhawuk äp yachajihola lewäk chik itiyej Israel lhayis! 15Lhek tetshan. Chik leleyayej häp lham, äp y'isiyeja lhip tä pitaj lewhäy chik Israel lhayis ihi ts'anis, wet amenlak letamenayej chik nofwej lhamel.”
Wichi tä tälhehen letetsel Rubén lhäy'e Gad, lhamel yok, “Olhamel otch'othiyela opuhfwas”
16Tä lhamel iläte Moisés, wet ihowhäye wet tahuyej tä yok:
–M'ak tä olhamel ot'uhläk owoye, oyenwethä lehis oläy, häte oyenwethä hupuy yämthilek olhamel ow'et lheley lewukwey ihi. 17Wet chik wak'alhen, olhamel owohla otkwelheleya wet olhamenlak otchunlä opuhfwas Israel lhayis, pajla'tha ochätyenho honhat chik lewukla lhamel. Mat olhamel oles lhäy'e och'efwas imälhehihila hupuy, yämthilek wichi tä lew'et honhatna nhanayej iwoyneje chik iwoyeje lewit'äyhyaj. 18Olhamel otpinhit'ala pajla'tha nilhokej Israel lhayis ihi t'at laka honhates wet lhayen lewuhuya. 19Wet tä olhamel oka honhatla häp honhat tä tumej ufwna, häp tewok Jordán lhip tä tumej hichä, olhamel tek ot'alhiyela honhates tä tumej Jordán lhip elh wok häp lhipey iyhäj tä iw'echehi.
Moisés ihuminche lhamel letichunhayaj
20Moisés nichulho lhamel wet yok:
–Is t'at, ämayla matche ämettso. Awaklhathena yämthilek lehoye n'oka'tshayaj wet woyayela Lhawuk lenech'ethayaj. 21Wet nilhokej amel hin'ol woyayla akwelheleya wet isthola tewok Jordán, wet woyayela Lhawuk lhämet tä ne'tek lewoyaye. Wet eyayhila t'at honhat tä apuhfwas ihi, pajla'tha Lhawuk yokwes nilhokej letayhfwas 22wet lekalhayhi laka honhat. Wet chik leleyayej tä lewoyaye nilhokej m'ak tä Lhawuk ne'tek lewoyaye wet letach'ote t'at Israel lhayis, wet nech'ehilak letapilaye haw'et. Wet matche, Lhawuk ayenla häpeya lewuhuy honhatna.
23“Mat chik kamatthichelak lewoye täjtso, hach'isukyajla t'at wet letatayhlä Lhawuk. Wet ifwala chik häpe itihla amejen letasnhayaj. 24Athana is t'at, enwethä hupuy yämthilek haw'et lheley letamsekis ihi, wet enwethä lehis aläy. Mat äma matche ämet.”
25Tä mälhyejtso, wichi tä tälhe letes Gad lhäy'e iyhäj tä tälhe letes Rubén, lhamel nichulho wet yok:
–Olhamel ohäpehen akawos. Owohiyela ämet tä lene'tek olhamel owoye. 26Olhamel ow'et lheley, och'efwas, oles, lhäy'e oläy, imälhhila kana. Lhamel ihihichela häp hupuy tä ihi Galaad. 27Mat olhamel owohla otkwelheleya yämthilek oyistho tewok wet owo oka'tshayaja, mälhyej Lhawuk lenech'ethayaj tä am lene'tek olhamel owoye.
28Wet Moisés tahuyej sacerdote Eleazar, lhäy'e Josué, lhäy'e nilhokej hin'ol tä wichi kaniyatey tä tälhehen doce letetsel. 29Wet yok:
–Chik nilhokej hin'ol tä tälhe letes Gad, lhäy'e iyhäj tä tälhe letes Rubén, yik amchehen tä iwo takwelheleya tä amel lhistho tewok Jordán, wet iwoye Lhawuk lhämet, wet iwo laka'tshayaja pajla'tha lekalhayhi honhat, nech'ehilak lekalelhät tä honhatna tä Galaad lewuk t'at lhamel. 30Mat chik lhamel niwoya takwelheleya wet yikhit'a amchehen, w'enholat honhat lhip tä iyej amel aka honhates tä ihi Canaán.
31Wet wichi tä tälhe letes Gad lhäy'e iyhäj tä tälhe letes Rubén, lhamel nichulho Moisés wet yok:
–Olhamel tä akawos n'ohen owohiyela Lhawuk lhämet tä ne'tek owoye. 32Oyisthihola tewok Jordán, wet owohla ka'tshayajayej honhat tä Canaán. Owohiyela t'at Lhawuk lhämet tä ne'tek olhamel owoye. Mat olhamel olewuhuyla häp honhatna tä Jordán lhip elh tä tumej hichä.
Moisés yachaje honhat tä Jordán lhip tä tumej hichä häp wichi tä t'alhe
33Mälhyej p'antetso tä Moisés hiw'enho honhatestso häp wichi tä tälhe letes Gad, lhäy'e wichi tä tälhe letes Rubén, lhäy'e lechowej wichi tä tälhe letes Manasés. Häpe t'at honhates tä pajche lewuk p'ante Amorreo lhayis laka rey tä lhey Sehón, lhäy'e honhates tä pajche lewuk p'ante Og, rey tä ihi Basán, lhäy'e hupuy tä ihiche, lhäy'e yachuyajw'etes. 34-36Wet wichi tä tälhe letes Gad, lhamel inech'aynhiche tä yenwethä wet yäm takhajayhen häp hupuy tä lheyis Dibón, Atarot, Aroer, Atarot-sofán, Jazer, Atojphä, Inätw'et, lhäy'e Bet-arán. Häte lhamel yenwethä leläy lehis.
37Wet wichi tä tälhe letes Rubén, lhamel yenwethä wet inech'aynhiche wet yäm takhajayhen häp hupuy tä lheyis Hesbón, Dios Wujyaj, Hupuy Täkwfwas, 38Nebo, Ba'al-meón, lhäy'e Sibma. Iche honhates tä wichi tä inech'aynhiche iwo iyhäja lheyis tä itiyej.
39Wet wichi tä letes Maquir, Manasés lhäs, lhamel tiyäjo Galaad wet lhayen lewuka, wet yokwes Amorreo lhayis tä ihi. 40Tä mälhyejtso, Moisés hiw'enho Maquir kawichi häp honhat tä Galaad, wet lhamel yen lew'eta. 41Wet Jaír tä häpe elh tä letes p'ante Manasés, lham lhayen lewuka iyhäj Amorreo lhayis lew'etes, wet yen lheya Jaír Kahupuy. 42Wet Noba lhayen lewuka honhat tä lhey Kenat, lhäy'e wichi lew'etes tä iwhäye, wet yen lheya lham lhey Noba.
