Dios ne'tek õ'tiyej kanhi wichi tä kok'ayeje m'ak chik häpek ni'isa
1Lhawuk tahuyej Moisés wet yok:
2–Fwenho Israel lhayis, Iwohiyet'ak nokwesa alhoye elh tä kok'ayeje amostas, wok elh tä nitsäyhchä m'ak tä tälho, wok häp elh tä itsok n'op'itsek. 3Nemhit is chik iyej wichi, häpkhilek nitmenayej chik kok'aye ow'et.
4Wet Israel lhayis iwoye t'at Lhawuk lhämet tä ifwenho Moisés, wet ichen alhoye iyhäj tä ihi wichi lew'et tä t'inhayaj mälhyejentso.
M'ak tä Dios ne'tek elh tä iwit'äyen elh kam'ayek iwoye
5Lhawuk tahuyej Moisés wet yok:
6–Fwenho Israel lhayis, Chik iche hin'o tä niwoyaye olhämet, wok atsinha, wet iwoye m'ak tä ni'isa tä iwit'äyen m'ak tä lewuk elh, kalelhäj letes ihi elhtso. 7Is chik nikachuya wet yok, “Matche t'at.” Is chik tiskanpe m'ak tä iwit'äyen tä lewuk elh, wet is chik y'isej lhip. 8Wet chik y'il häp hin'o tä elh iwit'äyen laka m'ayek, wet newache lepuhfwa chik tachumlä laha, is chik õyachaj n'oye yämthilek sacerdote tä isej, wet õhp'ajtej tson'ataj tä õ'länpe lech'isukyaj tä iwoye yämthilek otäyhat letes.
9“Nilhokej n'otw'ayhtes tä Israel lhayis yen t'amajcheta n'oyej, is chik hiw'enho sacerdote yämthilek isej. 10Lham t'at tä lewuk.”
M'ak tä is chik õ'woye chik hin'o fwetaj lech'efwa iwo lakain'oyaja
11Lhawuk tahuyej Moisés wet yok:
12–Fwenho Israel lhayis, Elat iche atsinha tä nifwunahi tä lech'efwa ihi 13wet iwo lakain'oyajayej hin'o elh. Mat lech'efwa ihanhiyejt'a, tej tä matche, iwoye t'at m'ak tä lhaikokyeneje. Mat tä newa katsik hiw'enej, iskat t'at lakeytso. 14Mat elat hin'o yok, “Oyenek och'efwa iche m'ak tä iwoye”, wet hin'o lhayen aschentsaja'pe lech'efwa. Mat elat atsinha niwohit m'ak chik iwoye.
15“Tä mälhyejtso, is chik hin'o ihäne lech'efwa häp sacerdote, wet ichäj dos kilos harina tä cebada lemok tä yen t'awayhata n'oyej. Mat isit'ak itsäype aceite, wet isit'ak itsäype incienso. Tsi n'ot'ischenyaj tä tamenej tä õyen otw'ayhata yämthilek n'älpe m'ak tä ni'isa. 16Wet is chik sacerdote ne'tek atsinha ihowhäye, wet ihi tä olham ottache. 17Wet is chik sacerdote tachuma inät tä n'ot'amajchet tä ihi lehi tä iyäte, wet äp tachuma honhat mok tä ichufwi owukwe wet ikasoyej inät. 18Wet is chik ne'tek atsinha takasthi tä olham ottache. Wet sacerdote itsäyhlahchä atsinha lew'ole, wet itihla'pe atsinha takweyey häp harina tä õyen otw'ayhata'pe n'ot'ischenyaj, yämthilek n'älpe m'ak tä ni'isa. Wet is chik sacerdote tachuma inät tä tapay tä n'owit'äyhyaj tälhe. 19Wet ne'tehlak atsinha tach'ahuye lhämet tä yok, Chik niwoya hin'ok imä amej, mat lehumin t'at hach'efwa wet let'ifwtiyej, wet tek lewoyeje akain'oyaj hin'o elh yämthilek tamen amej tä akok'aye, chik mälhyejtso, is chik lajit awit'äyhyajak leyäyej inät tä tapayna tä n'owit'äyhyaj tälhe. 20Mat chik lewoyeje akain'oyaj hin'o elh tä hach'efwa ihi wet lewoye t'at m'ak tä ikokyen ame, 21is chik Lhawuk hit'ukhat hats'e wet isit'a alhoho äs, häpkhilek nilhokej wichi ayen lhämeta tä akni'isa. 22Awit'äyhyajtso ihla amej chik leyäyej inät tä tapayna tä n'owit'äyhyaj tälhe.
“Wet chik atsinha ileyej tä tach'ahuye sacerdote lhämettso, iwohiyet'alak nit'untayejche lhämet tä nichulho wet yok, Amén, is chik mälhyejtso. 23Wet is chik sacerdote ilesayen n'okäpfwayajay tä ni'isachehenna, wet y'uytho inät tä tapay yämthilek noj lelesaynek. 24Wet iyäynhiyeja inät häp atsinha yämthilek äytaj lets'e. 25Wet nech'e tachumhiyela harina tä atsinha yen otw'ayhata'pe n'ot'ischenyaj, wet itihla n'oye. Chik ileyej, wet itihla'pe altar. 26Wet tach'awhihola wet iwunhihola, yämthilek atsinha yenpej tichunhayaja.
“Wet chik sacerdote ileyej tä iyäynej atsinha häp inät tä tapay, 27wet chik matche tä iwoyeje lakain'oyaj häp hin'o elh wet kok'aye, wet inättso tä n'owit'äyhyaj tälhe ilänla lets'e wet hit'ukhat, wet isit'a alhoho häp lhäs. Wet nilhokej wichi yohlak, Matche tä ni'isa atsinha. 28Mat chik atsinha niwoyaye m'ak tä ni'isa, tek lewit'äyhyaj ihihila, mat iwohla lelesa.
29“Häp täjtso lakey chik õ'woyeje atsinha chik iwoyeje lakain'oyaj hin'o elh wet tamenej lech'efwa tä aschentsaj, 30wet häte chik hin'o w'et aschentsaj t'at, t'ischenpe lech'efwa. Tä mälhyejtso, is chik ihäne lech'efwa tä olham ottache wet sacerdote iwoyeje täjtso. 31Mat õyenhit'ala letesayej hin'o. Mat chik atsinha iwoye t'at m'ak tä ni'isa, lham t'at tä letes ihi wet lewit'äyhyaj ihi.”
