N'ochäkwis tä õ'wunhen lakey
1Lhawuk tahuyej Moisés wet yok:
2–Fwenho Aarón, Chik lham iwun n'ochäkwis, is chik lehutunek i'pe tä tatache.
3Wet Aarón iwoye Lhawuk lhämet tä ifwenho Moisés, wet iwun n'ochäkwis, itayhte tä lew'etes tatache. 4N'ochäkwhis oro t'at tä õyenejlhi n'okäjnhat, tälhe t'äsawet pajtha nichäte lhawol. Wet tä õyenlhi, õ'tech'aynej t'at lepeyak tä pajche Lhawuk ipäyne Moisés.
Õyachaje Lhawuk Leví lhayis yämthilek yen t'amajchetesa
5Lhawuk tahuyej Moisés wet yok:
6–W'enhat wichi tä tälhe letes Leví tä lhayej iyhäj Israel lhayis. Wet wola alejyajayej lhamel tä n'otetnekej tä häpehen ot'amajchetes. 7Wet m'ak tä is chik lewoye tä lewo alejyajayej lhamel, tsäyla'pe inät tä n'olejyaj, wet lhamel is chik yähäs lepusey tä i'pe t'äj wet ilej lew'uyis, wet häpkhihena iyhäj tä newache lakokhayaj. 8Wet is chik lhamel tachuma w'asetaj lhäs, lhäy'e harina tä lhäy'e lhip tä is tä õ'lheteji aceite, wet õyen otw'ayhata. Häte is chik letachuma w'asetaj elh tä õ'länpe n'och'isukyajay. 9Wet fwenhola Leví lhayis tä is chik lhaihutwek tä iwhäye carpa tä owukwe. Wet is chik nilhokej Israel lhayis tä lhaihute. 10Wet chik wak'alh tä letihi tä ottache häp Leví lhayis, is chik Israel lhayis itiche'pe takweyey häp Leví lhayis lhethey. 11Wet is chik Aarón iti n'oye Leví lhayis tä lhamel häpe t'at Israel lhayis t'awayhtes tä yachaj n'oye, häpkhilek nilhokej Leví lhayis tä otshupyeneje ochumet.
12“Wet chik tajyäme täjtso, is chik Leví lhayis iti'pe takweyey häp w'asetas lhethey. Wet elh w'asetaj is chik õ'län tä õyen lahaya n'och'isukyaj, wet elh is chik õ'wunho tä õyen otw'ayhata tä laha n'olejyaj tä õ'woyeje Leví lhayis. 13Wet chik leleyej, tihila Leví lhayis tä Aarón lhäy'e leles tatache, wet tila n'oye tä lhen otw'ayhata. 14Häp täjtso tä is chik lewoye tä lew'enhat Leví lhayis tä iyej iyhäj Israel lhayis, häpkhilek häpehen ot'amajchetes wet Olewuk t'at.
15“Wet chik tajyäme tä lewoyeje n'olejyaj, wet äp pajche leti n'oye, Leví lhayis wak'alh t'at yämthilek tach'ote ochumtes tä ihi carpa tä owukwe. 16Tsi Leví lhayis häpehen wichi tä õhw'en n'oho yämthilek häpehen ot'amajchetes tä iyej iyhäj Israel lhayis. Wet otchumlä tä oyen lahaya Israel lhayis leles tä lechunkatshay. 17Tsi Olewuk t'at nilhokej Israel lhayis leles tä lechunkatshay, lhäy'e leläy tä lechunkatshay. Häp ifwalahte olänhen Egipto lheley leles tä lechunkatshay, ot'amajej Israel lhayis leles tä lechunkatshay yämthilek Olewuk t'at. 18Wet häp tä otchuma Leví lhayis tä oyen lahaya lhamel. 19Ottshupiye lhamel tä iyej iyhäj Israel lhayis, wet ow'enho Aarón lhäy'e leles yämthilek lhamel iwoye lechumtes tä ihi carpa tä owukwe, wet Israel lhayis isej wet otäyhtejen letes. Häpkhilek Israel lhayis tek lhaitott'ayne owukwe tä ot'amajchet wet lewit'äyhyaj newache.”
20Wet Moisés lhäy'e Aarón, lhäy'e nilhokej wichi tä Israel lhayis, iwoye t'at Lhawuk lhämet, häp m'ak tä ne'tek Moisés iwoyeje wichi tä tälhe letes Leví. 21Leví lhayis iwoyej lhamehen n'olejyaj wet ilejen lew'uyis. Wet Aarón itiye Lhawuk lhamel wet yen t'awayhata, wet iwo lelejyajayej lhamel tä n'otetnekej tä häpehen Lhawuk t'amajchetes. 22Wet tä tajyäme tähestso, Leví lhayis nech'e iwoye t'at m'ak tä lhamel lechumet tä ihi carpa tä Lhawuk lewukwe, wet Aarón lhäy'e leles häp tä itetshan lhamel. Häp m'ak tä Lhawuk ne'tek Moisés iwoyeje Leví lhayis, mälhyej'attso tä õ'woyeje lhamel.
Nekchämis tä Leví lhayis is chik ihi lechumet
23Wet Lhawuk tahuyej Moisés wet yok:
24–Leví lhayis is chik iwo tesa tä lhamel iwoye lechumtes tä ihi carpa tä owukwe, häp lhamel tä hiw'en veinticinco nekchämis wet iwoye lechumet, 25pajtha äp veinticinco nekchämis wet ileyej lechumet. 26Mat is t'at chik tach'ote lepuhfwas tä ihi owukwe tä t'uye.
“Häp täjtso tä lewoyeje Leví lhayis yämthilek iwoye lechumet.”
