Film 1

₁Amtena ipuhfwa Filemón tä ahäpe och'otfwayej Dios lechumet, olham Pablo tä õhp'o n'ohi'pe Cristo Jesús, ochen ame olhämetna, olham lhäy'e lhapuhfwa Timoteo. ₂Häte ochene Apia, häp atsinha tä lhapuhfwa, lhäy'e Arquipo, häp lhat'unfwa tä y'awo lhaka'tshayaja'pe Cristo, lhäy'e amel tä Dios leles iyhäj tä lhaihutpejwek tä ihi Filemón lew'et.

₃Is chik Dios Lhajcha lhäy'e Lhawuk Jesucristo iti amejen lep'altsenyaj lhäy'e atamsek.

₄Ipuhfwa Filemón, tä owopej ot'alhyaja, ontichunpej hach'oye wet owo graciasayej oka Dios. ₅Tsi otoynej ame ahumnhayaj tä letiyej nilhokej Dios laka wichi lhäy'e ekhahyaj tä letiyej Lhawuk Jesús. ₆Wet tä oläte tä let'ekhaye mälhyej iwoye olhamel, oy'alhyen ame Dios yämlek nem koyhyaj tä letäfwelej häp m'ayhay tä ischehen tä in'amejen, häp tä isej Cristo Jesús. ₇Ipuhfwa, wuj tä olhaikhajyen wet okäjyaj ihi tä otoyne tä wuj tä lehumin Dios leles, tsi matche tä lekäsyenwethä lehusey.

_8-9Tä mälhyejtso tä ahäpe hin'o tä ahumnhatsaj, olhaip'altsen ame athana. Tej tä ohäpe Cristo laka apóstol, ofwenhit'a amho olhämet tä oyok, “Woye m'ak tä one'tek lewoye.” Mat oyok, Olham Pablo tä othaläkwfwaj t'at, lhäy'e tä õhp'o n'ohi'pe Cristo Jesús, ₁₀olhaip'altsenej ame häp n'aelh tä lhayen olhäsayej Cristo tä oihi n'op'onthina, oyäme Onésimo.

₁₁Ifwalas tä pajche lham häpe akawo tä achäjek tä tek aisej. Mat athana nech'e olham lhäy'e am n'aisej t'at häp lham. ₁₂Oyachaj ame, hätet iwoyek ochen ame ohusek. ₁₃Ot'uhin'ehläk it n'oyej häpkhin'ek tach'ot n'oye tä õhp'o n'ohi'pe Dios Silätyaj, tejin'ek kahäpeya am. ₁₄Mat otch'anlhayej ame täjtso, häpkhilek m'ak chik lewoye häpkhit'a m'ak tä olham tä onityen amej, mat häpe m'ak tä am t'at tä anech'ethayaj tä lewoye.

₁₅Oyenek häpe t'at täja m'ak tä tamenej p'ante tä Onésimo nem i'amej ayej, häpkhilek i'amej athana wet lajit lepesa. ₁₆Nemhit häte iwoye akawo tä achäjek, mat inu'pe täjtso, häpe t'at apuhfwa tä lehumin. Olham wuj tä ohumin, mat am nemla koyhyaj tä lehumin, tsi aelh t'at wet apuhfwayej Lhawuk.

₁₇Tä mälhyejtso, chik lhenn'o hat'unfwaya n'oyej Lhawuk, chumlä lham, tech'aynej chik olham t'at tä letachum n'ohlä. ₁₈Chik iche m'ak tä ni'isa tä iwoyej p'ante ame, wok letujlhaye'pe m'ak at chik häpe, alh n'oye'pe olham. ₁₉Olham Pablo olesayen olhämetna, oyok, Olhamlak otiskanpe. ¡N'am t'uhläk ofwel amho tä häte am iche t'at m'ak tä is chik lew'en n'oho atape!

₂₀Eh ipuhfwa, tä ahäpe Lhawuk lhäs, woye t'at m'ak tä ot'alhej amena, wet käjyenlhi ohusek tä ahäpe opuhfwayej Cristo. ₂₁Ochen ame olhämetna häp tä ohanej tä lewohiyela t'at, wet äp lenuhthila'pe m'ak tä ot'alhej amena.

₂₂Iche m'ak elh. Is chik lewaklhat n'oho ow'et chik oihla'ayejchufwi. Tsi oyenek oisej häp amel alhyajay wet Dios isiyakaynhilan'o amehen.

₂₃Epafras tä otan'isfwa tä õhp'o n'ohi'pe Cristo Jesús, lham ichen ame len'okhayaj. ₂₄Häte Marcos, Aristarco, Demas, lhäy'e Lucas, häp lhamel tä tach'ote ochumet.

₂₅Is chik Lhawuk Jesucristo lep'altsenyaj ihiche nilhokej amel ahusey.