Ten Cristo tä lhayen n'okawoya
1Tä mälhyejtso, tä y'alhaikhajyenejwek Cristo, wet tä lhahumnhayaj tach'ot n'amehen, wet tä y'ap'akejwek Dios laka Espíritu, wet tä n'alha'isyenhen, wet tä n'ahäpehen hap'altsentses, 2tä mälhyejtso, is che w'awulhchä achowhal, ahumnhayaj, ahusey, lhäy'e atichunhayajay, yämthilek matche tä okäjyaj ihi amejen. 3Yej lhenay atichunhayaja awujyaj che õ'ti amejen tä lhenlhi m'ak che häpe, wet yej alechäjwethä. Mat a'ayhatchä wet is che elh tefwajpejni yopejkwe, “Opuhfwas, häp tä inu n'o'pe.”
4Yej ts'ilkat m'ak che am aisej, mat häte tetshan m'ak che aiyhäj isej. 5Tipej amejen achowhal tä hätet iwoye Cristo Jesús lechowej p'ante, 6tä lham:
Tej tä tälho t'at m'ak tä häpe Dios,
wet w'awulhi t'at Dios,
mat yenhit'a lhakliya wet ileyej ayej.
7Lhaitiyej kanhihlä m'ak tä häpe,
wet nichäthihchä honhat mälhyet iwoye hin'o,
wet lhayen häpeya n'okawo.
Wet tä hin'o t'at,
8lhay'ayhatchä, tek lhaichäjlhi,
wet iwoye t'at m'ak tä õne'tek iwoye,
pajtha nichäte t'ilek,
tä häpe tä õhp'ajtej cruz.
9Häp tä tamenej tä Dios hiw'enho
leniyatyaj tä inu'pe nilhokej,
wet itiyej Lhey tä inu'pe nilhokej n'olheyes,
10häpkhilek nilhokej pule lheley,
lhäy'e wichi tä ihonhatena,
lhäy'e iyhäj tä ichufwi honhat,
itsinen lakamchetey tä iwujyen Jesús Lhey,
11wet nilhokej yen lesilätyaja tä yohlak,
“Jesucristo häpe Lhawuk”,
häpkhilek õ'wunit häp Dios Lhajcha.
Dios leles häpehen wichi tä i'pe honhat laka isi
12Ipuhfwas tä oalehumnhay, tä oinaj amejen, wet lewoyayepej olhämet. Tä mälhyejtso, athana tä n'am ne amejen, ísej lhip tä lhenay atichunhayaja wet woyayepej m'ak tä one'tek lewoyaye. A'amkatayejpej tä let'ukwe amhohen atamsekis, wet häte a'ämay hin'ohlä Dios wet wujyenpej. 13Tsi Dios t'at tä tachumlhi tä itipej amhihen atichunhayaj tä is alhoho, häpkhilek lehuminay wet lewoyaye lham lenech'ethayaj.
14Yej tum amehenpe m'ak at che häpe che lhenlhi, wet yej tayejwek ämtes, 15häpkhilek ahäpeyay Dios leles tä najit letesa, lhäy'e tä najit lakeyesa lhäy'e tä najit lech'ohleya, tä lheyayej wichi tä lhäy'e lhip tä ni'isahen tä ihonhatena. Ahätet iwoye katetsel, isiche t'at tä ihi honatsi, 16tä lefwenayho lhamel Dios lhämet tä häpe n'ow'atshancheyaj. Wet che lewoyaye täjtso, che näm Cristo okäjyaj ihihila amejen, tsi n'änhila tä laha ihi t'at ochumet tä owoye, tek w'et olhaikhajyen. 17Wet tej che õ'länn'o thayej, mat mälhhiyejat che oy'isej ow'oyis tä nitsäype häp achayaj tä lhen Dios t'awayhata. Okäjlhi che mälhyejtso, wet is che amel häte a'akäswethä. 18Matche, n'alhaip'ajtitwek tä n'akäswethä n'amejen.
Timoteo lhäy'e Epafrodito
19Che Lhawuk Jesús lenech'ethayaj, ochenla amehen thahya Timoteo, yämlek ohan amejen wet okäjyaj ihi. 20Tsi ow'enhit'a elh che lechowej häte iwoye olham ochowej, wet matche tä yenla tichunhayaja m'ak che amel isej. 21Nilhokej iyhäj t'ukwe m'ak che lhamel isej, itetshanhit'a m'ak tä Jesucristo lenech'ethayaj. 22Mat häp Timoteo, letäfwelayej t'at tä häpe hin'o tä lechowej ihi, wet hich'ot n'oye tä owo silätayej wichi Dios Silätyaj, mälhyej che olhäs. 23Wet häp tä ochenla amehen che kalelhäj m'ak che ihla n'oyej. 24Mat ot'ekhayeje Lhawuk tä olhamtej ohohla amehen thahya.
25Häte ow'en tä is tä ochen amehen lhapuhfwa Epafrodito, lham tä iwo ot'unfwayayej Dios lechumet lhäy'e tä owopej oka'tshayaja'pe Cristo. Lham häpe naji amel achenek tä hich'otej n'oye m'akpej tä owatlä. 26Lhäy'e lhip tä iwatläk hiw'en amel, tsi wuj tä ilän letichunhayaj tä amel lehanej tä t'inhayaj iyej naji. 27Matche naji, wet tatäynaj lhimphaj wet y'il t'at, mat Dios itiyej lep'altsenyaj. Mat tajlhamhiyet'a tä hip'altsen häp lham, häte hip'altsenn'o, yämlek nintäkwahchä ofwitajayajay. 28Häp tä tamenej tä nem koyhyaj tä owatläk ochen amehen, häpkhilek amel akäjyaj ihi che äp lew'enay, wet häte olham niwuja ofwitajayaj che ihla n'oyej.
29Che lham nichät amehen, chumayhlä wet akäsyenejwethä, tsi lhapuhfwayej Lhawuk. Wet enay hin'oya elh at che häpe che mälhyej iwoye. 30Tsi häpe t'at Cristo lechumet tä tamenej tä lham ayte y'inhihte. Tek yen lhakliya lhamej lew'atshancheyaj tä iti n'oyej lech'otyaj tä amel kahanayej lewoyneje, tä a'atofwaye n'ohlä.
