Prov 1

₁Häp tähesna David lhäs Salomón lhämtes,

häp lham tä häpe Israel laka rey.

₂Iwoye lhämtesna yämthilek letäfwelej

m'ak tä häpe n'ohanyaj lhäy'e n'ochufwenyaj,

wet äp lehanej n'olhämtes

tä yäme m'ak tä wuj tä laha ihi,

₃yämthilek i'amej n'ochufwenyaj tä aisej,

wet lewoye t'at m'ak tä t'uhawetej wet is alhoho.

₄Häp n'olhämtesna ihanej iwoyneje

chik ichufwenhen wichi,

yämthilek hin'olwethä

häp lhamel tä nihn'olawethä,

wet mamses yen tichunhayaja

yämthilek lehanyaj ihi.

₅Elh tä ahantsaj tach'ahuye n'olhämtesna

wet lhäy'epej lhip lehanyaj.

Wet elh tä letäfwnhayaj ihi isej n'olhämtesna

wet lhäy'e lhip tä ihanej iwoyneje m'ak tä iwoye,

₆häpkhilek ihanej m'ak tä ahantses yäme,

lhäy'e m'ayhay tä itech'aynej,

lhäy'e m'ayhay tä õhn'ältehen.

₇Oyok, humin Lhawuk wet woye lhämtes,

tsi häp tä n'ohanyaj tälhe.

Wichi tä kachuhantses yen w'et m'ayeka

n'ochufwenyaj lhäy'e n'ohanyaj.

₈Yäs, ch'ahuye ajcha tä aichufwen,

wet yej leyej m'ak tä ako itäfwnhat amej,

₉tsi häpkhilek asilatyaj,

hätehlat iwoye amis

wok n'olhetek t'ak tä wuj tä isilataj.

₁₀Yäs, chik wichi tä lech'isukyajay ihi

fwetaj ikan amej, yej alewahnej.

_11-12Elat lhamel yok, “¡Nek n'okwehen!

¡Is chik y'aniwhi hin'o chik häpe wet n'alän!

¡Tej chik newache m'ak chik tamenej

wet lakäjyajay ihi, mat n'alänhen t'at!

₁₃¡Wet n'ahäpkhihena hin'ol

tä wuj lakäywet tä hiw'en!

¡Lhat'etantes tapohikwela lhawukwey!

₁₄¡Lhu, häte am lew'enla m'ak tä alewuk,

häte iwoye olhamel,

wet ihla n'amejen chinaj t'äj tä y'awatlä!”

₁₅¡Yäs, yej lhekche lhamel

tä lhämtes mälhyej'attso!

Atontehlä lakeyis,

₁₆tsi lhamel nakele m'ak tä ni'isa tä iwoye,

nakele yämthilek itsäy w'oyis.

₁₇Laha ihihit'a n'otkanyaj tä õyenlhi

chik afwenchey hiw'en.

₁₈Mat hin'oltso yenlhit lhamhohen t'akanyaj,

wet yenlhit lhamhohen lewit'äyhyaj.

₁₉Häp täjtso lepes häp hin'ol

tä t'uhläk wuj m'ak tä hiw'en.

T'akänyaj tä ni'isa ilänhen.

₂₀N'ohanyaj t'än tä tumche hupuy kawayhil,

ifwitsenej lechos tä ihiche lhipey tä ischephä.

₂₁T'äne wichi tä wuj tä ilunhen,

wet iwo lhämetayej lhamel tä lhaihutwek

tä ihi hupuy lepelis.

₂₂Yok, “Amel tä kahanache m'akejen,

¿atsihila ifwalak lehan m'akejen?

Amel tä alhen aläkwyhantsesa,

¿atsihila ifwalak leleyej

tä lhen akäjyaja täjtso?

Amel tä laj ahuseya,

¿atsihila ifwalak leleyej

tä lhen w'et m'ayeka n'ohanyaj?

₂₃Ch'ahuyaye ofwonyaj wet otihla amejen ohusek,

wet itäfwnhatla amejen otichunhayaj.

₂₄Ot'än amehen, mat letach'ahuhit'a n'oye.

One'tek leho n'oye, mat lewohiyet'a.

₂₅Lewohiyet'a olhämet tä one'tek lewoyaye,

wet tek letach'ahuye ofwonyaj.

₂₆Tä mälhyejtso, olhamlak ot'ischey amejen

chik nichät amehen awit'äyhyaj.

Olhamlak oailäkwethä chik let'ilejen anowayhyaj,

₂₇chik näm amehen m'ak tä tanhoch'ay

lhäy'e m'ayhay tä ni'isa

wet ailhaklitwethä,

hätehlat iwoye pelhay tä fwitsaj,

iwasthiche nilhokej m'ayhay.

₂₈“Wet chik mälhhiyejatso,

lefwetajla let'än n'oye,

mat tek onchulhla amho.

Lefwetajla let'u n'okwe,

mat tek lelhokla n'oye,

₂₉tsi lhen w'et m'ayeka n'ohanyaj,

lehuminhit'a Lhawuk wet lewohiyet'a lhämtes.

₃₀Tek lewatlä ochufwenyaj

wet lhen w'et m'ayeka ofwonyaj.

₃₁¡Lekathiyeja laha m'ak tä ni'isa tä lewoye,

hätehlat iwoyek letshatejen ämtes tä ni'isachehen!

₃₂Tsi tä kahanache m'akejen,

lewetahen wet let'inhen,

wet tä laj ahuseya,

letekm'ahatwethä wet attäy t'at.

₃₃Mat häp elh chik tach'ahuhila n'oye, letamsek ihihila,

wet tek nowayhlahläk lewit'äyhyaj ihichela.”