Prov 16

₁Hin'o yen tichunhayaja m'ak chik iwohiyela,

mat Lhawuk t'at tä iwoye m'ak tä lham ihuminche.

₂Hin'o yäme tä nilhokej m'ak tä lham iwoye is t'at.

Mat Lhawuk lham t'at tä itetshan hin'o lehusek.

₃Nilhokej m'ak tä lewoye tihi Lhawuk takweyey,

häpkhilek lehanej lewoyneje.

₄Nilhokej m'ayhay tä Lhawuk yenlhi,

iche m'ak tä t'uhläk iwoyeje.

Häte iwoye hin'o tä kahap'altsentsaja,

ichätyenhiyela ifwala tä n'otasnhayaj.

₅Lhawuk y'ulhan iyhäj tä lhaichäjwethä.

Iwohiyet'ak nikatayej n'otasnhayaj.

₆Lhawuk itäyhtej letes hin'o tä ihumnhen iyhäj

wet yäm matchehen lhämtes tä iwoye.

Elh tä ihumin Lhawuk wet iwoye lhämtes,

lhaitontehlä m'ak tä ni'isa.

₇Chik hin'o ikäntejlhi m'ak tä iwoye häp Lhawuk,

lham hi'isyen hin'o letayhfwas

yämthilek letamsek ihi.

₈M'ak tä niwuja, chik häpe m'ak tä is, häp tä laha ihi.

Wet m'ak tä wuj, chik häpe m'ak tä ni'isa, laha ihihit'a.

₉Hin'o yen tichunhayaja m'ak tä t'uhläk iwoye,

mat Lhawuk t'at tä isyen alhoho.

₁₀M'ak tä rey yäme tälhe t'at Dios,

wet chik iwo lakalelhthayaja, is alhoho.

₁₁M'ak tä nittäya lhip,

w'awulho, tälhe t'at Lhawuk,

wet lham t'at tä lhenek medidas.

₁₂Rey y'ulhan m'ak tä ni'isa tä wichi iwoye,

tsi m'ak tä is alhoho

häp tä ikhajyen n'oniyatyaj.

₁₃N'olhämtes tä ische alhoho

häp tä tach'ote rey,

wet ihumin hin'ol tä matchehen lhämtes.

₁₄Rey lewäk häpe t'at n'ot'ilek kasilätwo,

mat häp hin'o tä lehusek ihi ihanej tä y'omat.

₁₅Chik lakäjyaj ihi rey,

n'ot'ilek ihichet'a.

Wet chik tach'ote hin'o,

hätet iwoyek iwomchä.

₁₆M'ak tä is chik okalhi häpe t'at n'ohanyaj,

tsi inu'pe oro lhäy'e plata.

₁₇Wichi tä isen, m'ak tä iwoye

itiyej kanhihlä m'ak tä ni'isa,

wet lhamel tä t'amaj lhamejen

t'uye t'at lew'atshancheyaj.

₁₈Elh tä lhaichäjlhi,

lewit'äyhyaj ihihila,

wet elh tä lhaiwujyen nofwila.

₁₉Wuj tä is chik olhay'ayhatchä

tä oiyej wichi tä p'elitses.

Wet isit'ak oiyej wichi tä lhaichäjwethä

wet oisej lakäywet.

₂₀Elh tä tach'ahuye Dios lhämet, isila alhoho.

Lhawuk lakäpfwayaj tä is iyej elh tä ichaye.

₂₁Elh tä yen tichunhayaja m'ak tä is,

wichi yäme tä lehusek ihi.

Wet elh tä akäschehen lhämtes,

y'ayhattshi n'ohanyaj.

₂₂Hin'o tä lehusek ihi,

lew'atshancheyaj tek tatäyej.

Mat häp wichi tä laj lehuseya,

n'otasnhayaj tä õ'tiyej

häpe t'at tä m'ak nitälhayehen.

₂₃Hin'o tä lehanyaj ihi lehusek,

lhämtes y'ayhattshi n'ohanyaj.

₂₄N'olhämtes tä akäschehen

hätet iwoye akäyek.

Ikäjyenlhi ohusek wet inech'aynhi okhajyhayaj.

₂₅Iche m'ak tä hin'o iwoye tä yok,

“Häp tä is”,

mat lepes häpe t'at t'ilek.

₂₆Hin'o tä chumaj,

chik nichuyu tachumlhi t'at,

tsi iwatlä lhäk.

₂₇Hin'o tä nem is

t'ukwe t'at m'ak tä ni'isa,

wet lhämtes hätet iwoye itäj lhal.

₂₈Hin'o tä nem is

tamenej tä iyhäj tataywek.

Wet elh tä sitäwo

tamenej tä iyhäj nemhit lhaihumnhen.

₂₉Hin'o tä laj letäyijlhayaja

tach'anlhahiyet'a elh

wet iwetahatche n'äyij tä ni'isa.

₃₀Imäphä tä nitichunejlhi

m'ak tä ni'isa tä t'uhläk iwoye.

Wet ichofwnhatlhi lak'ajw'o,

n'äl tä t'ukwe t'akanyaj yämthilek iwoye.

₃₁Hin'o tä lhetek ipelaji, häp tä õ'wujyen.

Hin'o tä is, häp tä nichätho tä thaläkw t'at.

₃₂Hin'o tä nikelitaphä tä tawäkwäylhi,

häp tä is, inu'pe hin'o tä takhajay.

Wet elh tä lhaifwonlhi, häp tä is,

inu'pe hin'o tä iso hupuy wet lhayen lewuka.

₃₃Hin'o tä iwatläk ihanej m'ak chik häpe,

ikoyej suerte,

mat m'ak tä tälhe suerte tälhe t'at Lhawuk.