1Niyat lehusek ihi t'at Lhawuk takwey.
Hätet iwoye inät tä iläfwelche
tä Lhawuk inuhatche lhip tä ihuminche.
2Hin'o tä yäme tä nilhokej
m'ak tä lham iwoye is t'at.
Mat Lhawuk lham t'at tä itetshan hin'o lehusek.
3Woye m'ak tä is alhoho,
tsi häp tä Lhawuk ihuminche.
Inu'pe itshätäy tä õ'länhen
tä õyen n'okhayajayej.
4Wichi tä kahap'altsentsesa,
lech'isukyaj häpe t'at tä lhaichäjwethä.
Lhamel yok, “Ihichet'a elh
chik w'awulh n'ohi.”
5M'ak chik lhäy'e lhip tä otetshan,
chik wak'alh, häp tä is.
Mat häp iyhäj tä ikelitlhi m'ak tä iwoye,
tä lepese niwohit m'ak chik iche.
6Hin'o lakäywet tä ikalheji
lhämtes tä kamatachehen,
tet iwoye lefwak, t'unhit'a, nofwila.
7Wichi tä kahap'altsentsesa,
lhamel t'at tä lhailänhen
tä niwoyaye m'ak tä is.
8Hin'o tä ni'isa,
m'ak tä iwoye hätet iwoye
n'äyij tä hits'ulhakche.
Mat häp hin'o tä lajit lakeya,
lechumtes wuj tä isen.
9Tej chik ow'et ni'saye, mat is t'at.
Mat isit'ak oiyej atsinha tä äkleyhtsaj.
10Hin'o tä ni'isa nichuyupejlä
m'ak tä ni'isa yämthilek iwoye,
wet hip'altsenhit'a elh.
11Chik õ'tasin hin'o tä aläkwyhantsaj,
wet hin'o tä laj lehuseka
nech'e lhaichufwenlak hiw'en.
Wet chik õ'tasin hin'o tä lehusek ihi,
lhäy'ehila lhip lehanyaj.
12Dios iyahin t'at lew'et
häp hin'o tä kahap'altsentsaja,
wet ichätyenpe lewit'äyhyaj häp lham.
13Hin'o tä nitch'ahuyaye
elh tä p'elitsaj tä lhaip'altsene,
häte lham chik fwetajla t'alheje elh lech'otyaj,
ihichet'ala m'ak chik ikalhi.
14Chik õ'wo chalayejlhi hin'o
wet õ'weskatshayne t'awayhat,
noj t'at lewäk.
15Hin'o tä is, lakäjyaj ihi t'at
chik iwoye m'ak tä is alhoho.
Mat häp wichi tä iwoye m'ak tä ni'isa,
lewit'äyhyaj t'at.
16Hin'o tä lehusek ihi,
chik lewetahayaj iyej,
tan'isiyeja wichi tä y'inhen.
17Hin'o tä wuj tä ihumin tä iwo lakäjyaja,
wet ikäne hat'es lhäy'e m'ayhay tä lenij akäjche,
p'elitsajila, m'ak hiw'enhit'ala.
18Wichi tä isen tek leteläythayaj ihiyeja.
Tajlhamhiyela lhamel tä kahap'altsentsesa
häpkhilek leteläythayaj iyej.
Wet iyhäj tä iwoye m'ak tä is alhoho,
tek leteläythayaj ihiyeja.
Tajlhamhiyela wichi tä akantses
häpkhilek leteläythayaj iyej.
19Tej chik oihi honhat tä ts'anis, mat is t'at.
Mat isit'ak oiyej atsinha tä fwitsaj wet äkleyhtsaj.
20Hin'o tä lehusek ihi
hiw'en lakäywet tä wuj laha.
Mat häp hin'o tä laj lehuseka
ihämit nilhokej m'ak tä iyej.
21Elh chik nileyayej m'ak tä is lhäy'e lep'altsenyaj,
lew'atshancheyaj ihiyeja,
lhäy'e le'isyaj, lhäy'e len'ohyaj.
22Hin'o tä lehusek ihi,
tej chik wuj tä õt'uye häp hupuy,
mat inuye wet ikalhi t'at,
isiyejt'a sip'äl tä wuj tä t'uye.
23Elh chik nowayhläk
ni'isa alhoho lhämet chik iwoye,
ihanhiyejt'a chik lelhakli iyeji m'ak chik häpe.
24Hin'o tä lhäy'e lhip tä tektshanlhi,
wichi yok, “Aläkwyhantsaj,
lhaichäjlhi, welkatlhi.”
25Hin'o tä n'etäjlhi
lhailänej t'at tä iwatlä m'ayek,
tsi tek t'uhläk tachumlhi.
26Ifwala imälhewek tä t'akänyaj
itiyej m'ak chik häpe.
Mat häp hin'o tä is tek n'äy m'akej.
27Lhawuk y'ulhan itshätäy
tä wichi tä ni'isahen ilänhen
wet yen t'awayhata.
Wet chik lhamel iwo t'awayhata
tä t'uhläk ikalheji m'ak tä iwatlä,
nem koyhyaj tä y'ulhan.
28Hin'o tä kamatache tä fwetaj
hiw'en m'ak tä yäme, tatäyhla.
Mat häp hin'o tä tach'ahuye m'ak tä õyäme,
häp tä nittäya, lhäy'e m'ak tä yenpej lhämeta.
29Hin'o tä kahap'altsentsaja
lhayen at häpeya hin'o tä t'un.
Mat häp hin'o tä is yäm is alhoho
m'ak at chik häpek iwoye.
30Chik Lhawuk tatay ahilä,
lajit lahaya ahanyaj,
lhäy'e atäfwnhayaj,
lhäy'e ämtes tä isen.
31Hin'o iwaklhat lew'ute yel'ataj
yämthilek iwo laka'tshayaja.
Mat Lhawuk t'at tä tach'ote
yämthilek ikalhi letayhfwa.
