Prov 30

₂Matche tä ohich'atej tä n'am han m'akej,

₃tsi tälhe tä olhaichufwenhiyejt'a n'ohanyaj

wet ontäfwenhiyejt'a Dios tä N'ot'amajchet.

₄¿Atsi tä tiyäj puleye

wet äp tälh puleye?

¿Atsi tä ihutwek yafwthi lhayis

tä ihi takweyey?

¿Atsi tä ihanej chik ikäfwnhi wesaj

häp inät lhayis?

¿Atsi tä iwo lepeseya honhat?

¿Wet chiwoye lhey, lhäy'e lhäs lhey, chik lehanej?

₅Nilhokej Dios lhämtes isen t'at,

wet lham t'uyehen wichi tä ilethane.

₆Yej let'isej m'ak chik häpe häp lhämet,

tsi elat aifwon wet ain'älthila

tä w'et lhämlhi t'at.

₇Tajlhame täkwfwas m'ak tä ot'alhej ame, Iwuk,

tä kamaj n'am leyej honhat.

Tähesna:

₈Tiyej kanhi n'ohlä m'ak tä häpe n'otkanyaj

lhäy'e chik w'et oyämlhi.

Wet yej lhen n'oye hin'o tä hiw'en m'ayek,

wet yej lhen n'oye hin'o tä niw'ena m'ayek,

mat en n'oye hin'o tä lhäk nittäyayej.

₉Tsi chik wuj m'ak chik ow'en,

elat olehla amej wet oyohlak,

“Ontäfwenhiyejt'a häp Lhawuk.”

Wet chik äp hich'atej tä m'ak n'am w'en,

elat ot'etanla, wet nech'e oailäkwlhi

tä ahäpe oka Dios.

₁₀Yej lhäme tä ni'isa n'okawo

chik lhehi tä tatache häp lewuk.

Tsi lhamlak yäm ame tä akni'isa,

wet ates ihi.

₁₁Iche elh tä fwitsaj

tä yäme tä fwetaj ni'isa lajcha,

wet iwoyeje lhämtes tä ni'isachehen häp lako.

₁₂Ichehen lhamel tä fwetaj newache lech'isukyaj,

mat lakokhayaj ihi.

₁₃Ichehen lhamel tä fwetaj len'ohyajay ihi,

wet lhainuhatpe iyhäj.

₁₄Ichehen lhamel tä yen at lefwajnhatesa letsotey,

wet tet iwoyek tsonhates t'at lech'alo lhiley,

wet ilänejen wichi tä p'elitses tä ihi honhat.

₁₅Iche m'ayhay täkwfwas

tä hätet iwoye fwis,

iläthiyet'ak yok,

“Naya, tek owatlä lhip”,

mat hits'uhi t'at w'oyis.

Iche tres m'ayhay tä ayhthatses,

wok oyok, iche cuatro

tä nhanayej chik yok, “Naya.”

₁₆Häpe n'op'itsekw'et,

lhäy'e atsinha tä sufwnaj,

lhäy'e honhat, tej tä iwomchä

mat kamaj iwat'atlä inät,

lhäy'e itäj, ihanhiyejt'ak yok,

“Naya, tek owatlä hal'ä.”

₁₇Elh tä iläkwlhi lajcha,

wet yen w'et m'ayeka lako lhämet

tä ne'tek yäm is m'ak tä iwoye,

is chik tsetwos timche tatelhoy,

wet istiwin lhayis ichunnejen leles häp t'isan.

₁₈Iche tres m'ayhay tä oseltej,

wok oyok, cuatro tä n'am hanej.

Häp tähesna:

₁₉Häp iyhäjkottaj tä wey'ä,

lhaitsayhatlhi wet is t'at.

Wet amlhäj tä takälä newahi,

mat chik tiyäjpe chenaj is t'at.

Wet barco chik inukwe inät,

häpe m'ak tä wuj mat is t'at.

Wet hin'o ihanej tä itichunayenlhi lhamej atsinha,

wet ikalhi t'at.

₂₀Atsinha tä lech'efwa ihi tä iwoye lakain'oyaj,

tufw lhäk wet ilejo lak'aj wet yok:

“Ihichet'a m'ak chik ni'isak owoye.”

₂₁Iche tres m'ayhay tä matche tä nit'uhawetayej,

wok oyok, cuatro tä wichi niteläytayej.

Häp tähesna:

₂₂Hin'o tä n'okawo

mat tä lepese niyat t'at,

wet hin'o tä ch'isuk

mat teskanej lhäk,

₂₃wet atsinha tä õn'äyiho mat lech'efwa ihi,

wet atsinha tä n'okawo mat tä lepese

icheyäjo lewuk tsinha lew'et.

₂₄Iche cuatro itshätäyhas tä ihi honhat

tä matche tä ihan m'akejen,

inu'pe hin'ol tä ihanche m'akejen.

Häp tähesna:

₂₅Siwanhas newache lakhajyhayaj,

mat tä nahayhos ihutwek lhäk

yämthilek iche t'at m'ak chik tufw.

₂₆Wet inätetas häte lakhajyhayaj ihihit'a,

mat yen at lew'eta chenhas.

₂₇Wet chol, laka niyat ihihit'a,

mat tä yikhen wuj tä is,

tek lhaiwomwethä.

₂₈Wet chal'a takhajayhit'a,

lehanej tä letsoklhi t'at,

matkat ihi t'at niyatey lewukwey.

₂₉Iche tres m'ayhay tä is lew'ekyajay,

wok oyok, cuatro tä wuj tä is tä ilunlhi.

Häp tähesna:

₃₀Hay'äj inu'pe itshätäy iyhäj,

wuj tä takhajay,

nowayhiyet'a m'ak chik häpe.

₃₁Ho'o tä takhajay,

wet kayla tä asnak,

wet rey tä ichunlä laka nifwotaj.

₃₂Chik alhen ch'isukwa tä alechäjlhi,

wok lhenwethä m'ak tä ni'isa,

leyej wet en atichunhayaja täja:

₃₃Elh tä ikasohi itshäwet kat'os,

hiw'enla manteca.

Wet elh tä yäm äytaji leyalh

tä tälhche lenhus, w'oyisla.

Wet elh chik iläkwlhi elh,

tatayhlawek lhamel.