Prov 31

₂Ahäpe olhäs tä tälho okachowej.

Dios t'at tä nichulho ot'alhyaj tä olhaip'altsene.

Iche m'ak tä ofwel amho, oyok:

₃Yej alekhajyench'oye atsinhay,

tsi lhamel tamenej reyes tä tatäy.

₄Lemuel, ofwel amho,

isit'ak reyes lhäy'e niyatey iyäyej hat'es.

₅Tsi chik iyäyej, hip'ethatlä leyes,

wet nemhit itetshan wichi tä p'elitses.

₆W'enho hat'es häp wichi tä eyte y'inhihen,

lhäy'e iyhäj tä laj lakäjyaja,

₇häpkhilek nemhit nitichunwethä lhamej tä p'elitses

lhäy'e tä leteläythayaj iyej lhamel.

₈Ämlhi'pe wichi tä laj len'ohyajaya,

wet ch'ote iyhäj tä newache elh chik tach'ote.

₉Ämlhi wet woye m'ak tä is alhoho,

wet ch'ote wichi tä p'elitses

tä iwatlä m'ayek.

₁₀Atha chik õnlhoke atsinha tä lehusek ihi,

tsi hätet iwoye m'ak chik t'unhi,

wuj laha, inu'pe tuntey tä isis.

₁₁Lech'efwa wuj tä t'ekhaye,

wet lham ikalhi t'at lakäywet.

₁₂Nilhokej ifwalas hin'o isej atsinha,

tsi ihanhiyejt'a chik iwoyeje

m'ak chik ni'isa.

₁₃Ichäj tson'ataj w'ole lhäy'e lino,

wet ihumin tä yenwethä.

₁₄Hätet iwoye barco tä ichäj n'olhäk

tä tälhe lhip elh tä atofwe.

₁₅Tä nech'e fwala tä kamaj honatsi i'pe honhat,

nephä wet iwaklhatho lhäk lew'et lheley,

wet hiw'enhomche lechumtes lakawos tsinhay.

₁₆Itetshan honhat lhip chik häpe wet ichäj,

wet chinaj t'äj tä ikalhi,

itihchä uvas tä itihi lelafwek.

₁₇Lhaikhajyen wet tachumlhi,

₁₈wet hiw'en tä ikalhi t'at laha

m'ak tä wichi ichäj tä tälhe,

wet tä honatsi tachumlhi

pajtha honaj chowej.

₁₉Ikhajyen takweyey

wet tayhin wet ipätsinchehen.

₂₀Lakato t'unhihot'a,

hiw'enho t'at m'akfwaj

elh tä iwatlä m'ayek.

₂₁Tek nowayhlä fwiy'et,

tsi nilhokej lew'et lheley lew'uyis ihi t'at.

₂₂Lham t'at tä yenwethä

lew'uyis tä taw'uyhiche tä imähen,

wet lakay'uchelis häpe t'at wesaj tä isis.

₂₃Wichi tä ihi hupuy tä lew'et

wuj tä nitäfwelej hin'o tä lech'efwa

tä iyejpej hin'ol tä len'ohyajay ihi

tä lhaihutpejwek.

₂₄Lham yenwethä leyhil tä isis,

wet wichi ichäj t'at.

Yenwethä n'okawakay,

wet hin'ol tä yen chumeta m'ayhay

tä ihäne honhates iyhäj,

lhamel ichäj t'at.

₂₅N'äl tä häpe t'at atsinha

tä takhajay wet lewujyaj ihi,

wet yenhit'a lhakliya ifwalas tä tatache.

₂₆Chik yämlhi,

n'äl t'at tä lehanyaj ihi,

wet tä ichufwenhen iyhäj,

n'äl tä lep'altsenyaj ihi.

₂₇Itetshanpej m'ak tä lew'et lheley iwoye,

wet tufwit'a m'ak chik nitälhaye lechumet.

₂₈Leles lhäy'e lech'efwa

lhamel iwujyen wet yok:

₂₉“Iche t'at atsinhay tä lehusey ihi,

mat am lenu'pe lhamel,

wuj tä ahusek ihi.”

₃₀M'ayhay tä ikänitlhi hin'o mathichet'a,

wet n'osilatyaj t'unhit'a.

Mat häp atsinha tä ihumin Lhawuk

wet iwoye lhämtes,

häp tä t'uhawetej chik õ'wujyen.

₃₁¡Wunit tä ihi tä wichi tatache!

¡Is chik lewujyaj tälhe t'at

lechumtes tä yenlhi!