Hin'o tä lelhakli ihi iwo t'alhyaja
1Iwuk, ch'ahuye ot'alhyaj,
is chik lelät n'oye.
2An'älit n'oyej tä olhakli ihi.
Hach'ote that n'oye
wet chulh n'oho'thahya chik ot'än ame.
3Tsi ow'atshancheyaj t'aylhahchä tä noj t'at,
hätet iwoye tutsaj tä noj.
Olhiley hätet iwoye fwiyhol tä chayo, wuj tä äytes.
4Ohusek wuj tä lak'efwhayaj ihi,
hätet iwoye hal'ä tälhes chik tamchäy,
wet tek onchuyuhlä olhäk.
5Tä tajlhamat olhakli tä in'oyej,
wuj tä olopen.
6Ohätet iwoye wok'o tä ihi tayhi,
wet ohätet iwoye ch'ustaj
tä ihi wichiw'et wumek.
7Omähit'a, ohätet iwoye afwenche
tä i'pe hup lhetek.
8Otayhfwas ilehiyejt'a tä ilhaklitn'o,
wet chik yen käpfwayaja m'ak tä ni'isa, iwo olheya.
9-10Wuj tä leti n'oyej awäk,
leneyhatphän'o wet letafwom n'oyej.
Wet häp tä oyen olhäka mok'otaj,
wet ottet'ilis nitsäyho t'at olhät.
11Wet ifwalas tä ow'atshancheyaj
hätet iwoye hupel tä noj,
ohätet iwoye hal'ä tälhes tä tamchäy.
Hin'o tä lhämtes täjtso nech'e iwujyen Lhawuk wet yok:
12Mat am, Iwuk,
tatäyhit'a tä aNiyat t'at,
wet lepes ihichet'ala
tä wichi ayenpej tichunhayaja.
13Nephä wet p'altsen Jerusalén,
tsi nichäte t'at lewhäy tä õ'kalelhät
yämthilek letiyej hap'altsenyaj.
14Akawos wuj tä ihumin tuntey tä ihi,
wet matche tä lhamel yen fwitajayaja tä wasi.
15-16Chik nichäte lewhäy tä Lhawuk inech'aynhi Jerusalén
wet hin'älit lham lewujyaj,
nilhokej wichi tä i'pe honhat,
lhäy'e niyatey reyes,
iwujyenla lham tä lewujyaj ihi.
17Lham tach'ahuhiyela
elh tä n'och'otyaj newayej
chik iwo let'alhyaja,
wet lhayenhit'ala ch'otech'oya.
18Wet täja is chik ihi n'olesaynek,
yämthilek wichi tä nech'e ihichehena iwunit Lhawuk,
pajla'tha nichäte leles tä lepes lheley.
19-20Lhawuk tä ihi Lew'et tä T'amajchet tä ipuleye,
iyahnejchä honhat yämthilek itetshan
wichi tä õhp'ohiche tä lelhakli ihi,
wet ifwayhthiyeja t'ilek
iyhäj tä õ'tiyej n'olänyaj.
21-22Häpkhilek wichi tä tälhomche honhates
lhaihuthiwek Jerusalén,
wet n'okwiyej Lhawuk wet iwujyen,
wet yen silätyaja häp lhey.
23Lhawuk iso n'oyej lhip okhajyhayaj
tä otfwayej tä omamse,
wet yämhit'a pitaj ow'atshancheyaj.
24Wet otahuyej wet oyok:
“Ika Dios, yej so n'oyej lhip ow'atshancheyaj.”
Am lepes ihichet'a haw'atshancheyaj.
25Wet lhäm t'unhi honhat wet ihit tä ihi,
tälhe tä nech'enyaya,
wet am t'at tä enek pule.
26Tähestso nemla ichehen,
mat am tek attäy, lhewche t'at.
Nilhokej nofwila,
hätehlat iwoye n'ow'uy tä noj.
Am lewohla elha,
hätehlat iwoye hin'o tä iwo elha lew'uy.
27Mat am, Elh tä ahäpe ahäpe t'at,
nofwit'ala haw'atshancheyaj.
28Wet akawos leles let'uhiyehena,
wet lhamel leles tä lepes lheley tek lep'ethathilahlä.
