Õ'wujyen Lhawuk tä lhenek pule lhäy'e m'ayhay tä ikaphä
1Owunthila Lhawuk imälhewek ohusek.
Iwuk Dios, ahäpe t'at N'owujtaj,
letaw'uyhi awujyaj lhäy'e asilatyaj,
2wet lhen at haw'uya isi.
Lech'enhi pule hätet iwoye wesaj,
3wet lhenlhi haw'et tä atojphä
tä iche'pe inät lhayis tä tumchephä.
Lhen aka kaletaja häp pule tä yik,
wet lhekche t'at yafwthitaj.
4Aka silätwos t'at häp yafwthitas,
wet lhen at akawosa häp itäj lhayis.
Õ'wujyen Lhawuk tä lhenek honhat lhäy'e inät lhayis
5Letip'ante'pe lefwetes tä t'unhi häp honhat
yämthilek ihit tä ihi.
6Wet lewomekitaj tä pitoj hip'op'ante'pe honhat
hätet iwoye wesaj chik õtw'uyhi,
wet inät hip'op'ante'pe chenhas.
7Matkat tä am letahuye, yik t'at,
tä iläte achos tä hätet iwoye pelhay tä y'ip.
8Tiyäjche'pe chenhas
wet äp inuhchä tä ihi lakawayhil,
wet ihiche lew'etes tä letihiche.
9Wet lhok, “Yej lhekch'oye,
wet yej lhachajo yämthilek lep'o'pe honhat.”
Õ'wujyen Lhawuk tä lhenek tewok lhayis
10Lechen inät tä tälhomche lew'etes
yämthilek tiyäjo tewok lhayis
tä inukwe chenhas kawayhil.
11Wet itshätäy tä fwitses iyäyej t'at,
lhäy'e asnolis tä tayhlheley
nemhit neheläp ilänhen.
12Wet afwenchey iwo lhupisa tä iche tewok lhip,
wet y'ipwethä tä ihiche hal'ä lhachal.
Õ'wujyen Lhawuk tä ichen inät tä tälh puleye yämthilek lhenhay isej
13Am t'at tä letsäype inät chenhas,
tälhe haw'et tä atojphä.
Wet tä wuj inät tä tälh puleye,
wuj lhay tä ihi honhat.
14Lechihelit hup
yämthilek itshätäy lhäk iche,
wet hin'o tutchey
yämthilek hiw'en lhäk tä tälhe honhat
15häpkhilek takhajay,
wet hiw'en t'at hat'es tä ikänitlhi,
wet äp hiw'en aceite yämthilek yätaj.
16Häp hal'äy pino lhayis tä ihi Líbano
tä Lhawuk lakäs, isej t'at inät.
17Afwenchey tä niwusa iwo lhupisahiche,
wet kalak lhayis ihiche pino lhayis.
18Kayla lhayis yen at lew'eta
häp chenhas tä atoschephä,
wet inätetas y'uchechufwi
häp tuntey tä wus.
Õ'wujyen Lhawuk tä lhenek ifwala lhäy'e honatsi
19Lhenlhi iwel'a yämthilek kalelhäj lewhäyis.
Ifwala ihanej t'at lewhäy tä y'uy.
20Lewo honatsiya wet nech'e ilunhen
itshätäy tä ihi tayhi.
21T'owalhas y'ipwethä tä t'uhläk iwo läneka,
lhamel t'ukwe lhäk tä Dios hiw'enho.
22Matkat tä ifwala yäpnhomche chowhay wet imähen.
23Wet nech'e yik hin'o tä tachumlhi pajtha honatsi.
Õ'wujyen Lhawuk tä lhenek lewomekitaj lhäy'e lheley
24¡Iwuk, wujpey m'ayhay tä lhenlhi!
Nilhokej lhamel ahanyaj t'at tä lhenejlhi.
¡Honhat tapoyejej enhay!
25Lewomekitaj tä wuj wet äp tsajo,
itshätäy tä wus lhäy'e iyhäj tä niwusa tä ihi.
26Wet barcos tä wus inukwe t'at,
häte m'akitaj tä inät lhele ihi t'at
wet ikoylhi tä ihi.
Õ'wujyen Lhawuk tä iteskanyenej lhenhay häp m'ak tä isej
27Nilhokej enhay tataye t'at
chik am lew'enhomche lhäk
tä nichätepej lewhäy.
28Am lew'enho lhamel wet tachumlä,
lhamel teskanejen m'ak tä isen tä tälho akwey.
29Wet chik nem letetshan, nemhit is lhamel,
wet chik lesoyej lew'atshancheyaj, y'inhen,
yachajo tä honhat mok t'at.
30Mat lechene ayalh tä n'ow'atshancheyaj
tsi enhay t'at,
wet mälhyej'attso tä lenech'aynhi
m'ak tä i'pe honhat yämthilek is.
Õ'käjejlhi Lhawuk
31¡Is chik nittäya Lhawuk lewujyaj
wet akäjejlhi lhenhay!
32Chik iyahin honhat, honhat w'ahuye t'at,
wet chik itsok chenhas, tutsaj tälhomche.
33Tä kamaj oläy owunthila Lhawuk.
Owohla otenekayej oka Dios
tä kamaj ow'atshancheyaj ihi.
34Is chik Lhawuk akäjejlhi otichunhayajay,
tsi tajlhamat lham tä okäjyaj tälhe.
35Is chik tatäy wichi tä lech'isukyajay ihi.
Is chik nemhit iche lhamel tä ni'isahen.
Owunthila Lhawuk imälhewek ohusek.
¡Lewujyaj ihi Lhawuk!
