Salmo|Sal 106

₁¡Lewujyaj ihi Lhawuk!

¡N'awunit Lhawuk tsi lham häp tä hap'altsentsaj,

wet lehumnhayaj tek tatäy!

₂Nehit katsik ihanej iwoyneje

yämthilek y'ithat lhenhay tä äyteschehen.

Nehit katsik ihanej iwoyneje

yämthilek iwujyenej m'ak tä t'uhawetej.

₃Dios lakäpfwayaj tä is iyej iyhäj

tä iwoyepej m'ak tä is alhoho.

₄En atichunhayajan'o, Iwuk,

chik letach'ote aka wichi.

Yej p'ethat n'ohlä

chik lefwayhthen lhamel,

₅häpkhilek ow'en akäpfwayaj tä wuj

tä iyej häp lhamel tä letatshupiye

wet okäjyaj ihi tä oiyej aka wichi tä akäswethä.

₆Olhamel owoye t'at och'isukyajay,

hätet iwoye ojchalis p'ante.

Nemhit oisen, owoye t'at m'ak tä ni'isa.

₇Olhamel ojchalis ihi p'ante Egipto,

wet lhamel itetshanhit'a

m'ak tä äyteschehen tä lewoye.

Lhamel yenhit'a tichunhayaja

tä wuj tä lep'altsen lhamel,

mat tä lhamel iwhäye Lewomekchät,

lhamel tatay at ahilä.

₈Mat Dios ifwayhthen lhamel,

ipäyne lham lakhajyhayaj

tsi lhamyaj t'at, lewujyaj ihi.

₉Wet tahuye Lewomekchät wet y'im t'at,

yämthilek lhamel inukwe lewomekch'o,

hätet iwoyek inukwe ts'anis, tamchäy t'at.

₁₀Wet mälhyejtso tä ifwayhtej lhamel

häp wichi tä n'äyihomche,

wet isakanhiyejt'a tä t'uhläk ilänhen häp lhamel.

₁₁Mat inät hip'o'pe

wet niwohit elh chik imälhehi,

y'inhen t'at.

₁₂Tä mälhyejtso,

lhamel t'ekhaye Dios lhämtes tä ifwenho,

wet iten letenkay tä iwunit Dios.

₁₃Matkat lhamel yofwajkwet hip'ethatlä

m'ayhay tä Dios iwoye,

wet lhamel tek t'uhläk ihanej

m'ak tä Dios t'uhläk iwoye.

₁₄Tä lhamel ihi ts'anis,

lhamel yelhte Dios tä yok:

“Chik matche tä Dios in'amejen,

is chik hiw'en n'amhohen m'ayhay tä y'awatlä.”

₁₅Matche, Dios hiw'enho t'at

m'ak tä lhamel t'alhch'oye,

mat häte ichene t'inhayaj

tä wuj tä ni'isa.

₁₆Tä lhamel ihi p'ante

lakasthawet tä ihi ts'anis,

lhamel y'äytene Moisés lhäy'e Aarón

tä häpe Lhawuk t'amajchet.

₁₇Wet Lhawuk ifwoynho honhat,

wet Datán lhäy'e Abiram,

lhäy'e wichi tä lhaip'ajtej,

lhamel wesche wet honhat hip'o'pe.

₁₈Häte iche itäj tä y'uho

wet hip'ohen wichi iyhäj

tä lhamel iwoye m'ak tä ni'isa.

₁₉Tä lhamel ihi p'ante Horeb,

lhamel yenlhi lecheyä tä oro

tä itech'aynej w'asetaj lhäs tä asnak,

wet lhamel n'okwiyej.

₂₀Ileyej Dios tä lewujyaj ihi,

wet yen häpeya laka dios weyis

tä tufw hal'ä tälhes lepeyak.

₂₁Lhamel hip'ethatlä Dios tä ifwayhthen

tä iwoye m'ayhay tä äyteschehen tä ihi Egipto,

₂₂lhäy'e m'ak tä wichi iseltejen tä ihi Lewomekchät.

₂₃Dios yok, “Otäyhthila wichina.”

Matkat häp hin'o tä lham tatshupiye tä häpe Moisés

tek tach'anlhayeje täjtso.

Wet Dios tach'ahuye t'at häp lham t'alhyaj,

wet ileche lewäk wet tek itäyhthen wichina.

₂₄Mat tä paj lhamel lakachuhanyaj ihi,

häp tä tamenej tä nichäthiyet'a

honhat tä isilataj tä Dios ifwenho.

₂₅Tä lhamel ichechufwi lewukwey tä tsänt'ähes,

lhamel yämejwethä tä isit'a m'ak tä Lhawuk iwoyeje,

wet lhamel iwohiyet'a m'ak tä lham ne'tek lhamel iwoye.

₂₆Tä mälhyejtso, Dios itiyejphä takwey

lhämet tä hit'unhatche wet yok:

“Wichina y'inhihena tä ihi ts'anis,

₂₇wet lhamel leles ifwtsatla'pehen honhates

tä lewuhuy wichi tä w'enha lhamejen.”

₂₈Lhamel lhaip'ajtej p'ante

häp dios tä kamatache tä lhey Ba'al-peor,

wet tufw itshätäy tä õ'länhen

tä õyen n'okhayajayej n'ocheyälis tä laj leyalha.

₂₉Wet m'ak tä ni'isachehen

tä iwoye iwäkwyhayen Lhawuk,

wet ichene t'inhayaj häp lhamel.

₃₀Mat nephä Finees wet ilän

elh tä tamenej täjtso,

wet takasit t'inhayaj tä ilänhen wichi.

₃₁Wet Lhawuk yen tichunhayaja

m'ak tä Finees iwoyena,

wet nilhokej wichi yen lhämeta,

tälhe lewhäytso yäk nämena,

wet pajla'tha tiyäj'attsiy.

_32-33Wet tä äp lhamel ip'antewhäye

inätw'etes tä ihi Meriba,

yachajo tä iwäkwyhayen Lhawuk.

Wet häp tä nech'e tamenej Moisés

tä wuj tä ni'isa letichunhayaj

wet iwoye lhämet tä ni'isa,

wet lewit'äy ihi.

₃₄Lhamel tek itäyhthen p'ante

häp wichil tä Lhawuk ne'tek itäyhthen.

₃₅Mat lhamel lhailhahtej t'at

wichi tä kahäpeya lhamel,

wet lhaichufwenejen wichitso lakeyis.

₃₆Lhamel n'okwiyej wichitso lecheyälis,

wet häp tä tamenej tä lhamel lewit'äyhyaj ihi.

₃₇Wet ilänhen leles

wet yen n'okhayajayej ahät lhayis.

₃₈Itsäy lew'oyis häp leles tä laj letesa,

wet yen n'okhayajayej Canaán lheley laka dios lhayis,

wet honhat kok'ayeje w'oyistso.

₃₉Wet lhamel kok'ayeje m'ayhay tä iwoye,

wet lhaikänchiyej lakeyis tä ni'isachehen.

₄₀Wet Lhawuk itiyej lewäk

häp laka wichi wet y'ulhan.

₄₁Wet yachaje wichi tä i'pe honhat,

wet letayhfwas ikalhi

wet lhayen lewuka häp lhamel.

₄₂Letayhfwas itiyej lewit'äyhyaj,

yen w'et m'ayhaya wet yen lakawosa.

₄₃Wujpe lewhäy tä Dios ifwayhthenpej,

matkat lhamel tataypejlä Lhawuk lhämtes,

wet lhäy'epej lhip tä tiyäjo m'ak tä ni'isa.

₄₄Mat Dios hiw'enpej tä lelhakli ihi

wet ilätepej t'alhyajay.

₄₅Wet yen tichunhayaja

lhämet p'ante hit'untejche lhamel,

wet häp tä äp yachajo

tä hip'altsen t'at lhamel,

tsi wuj lehumnhayaj tä itiyej lhamel.

₄₆Wet takäpfwayeje tä yämthilek

letayhfwas tä yen lakawosa

itiyej t'at lep'altsenyaj lhamel.

₄₇¡Fwayhat n'ohen,

Iwuk tä ahäpe olhamel oka Dios!

Tonphä olhamel tä oiyej wichi tä i'pe honhat,

häpkhilek olhamel ow'en amho oka gracias

wet oyenla okäjyaja tä owunitpej ey.

₄₈¡Lewujyaj ihi Lhawuk, Israel laka Dios,

athana wet yämthilek tiyäj'attsiy!

Is chik nilhokej wichi yok, “¡Amén!”

¡Lewujyaj ihi Lhawuk!