Salmo|Sal 107

₁¡N'awunit Lhawuk tsi lham häp tä hap'altsentsaj,

wet lehumnhayaj tek tatäy!

₂Is chik iwoyetso häp wichi tä Lhawuk lefwayhtshay,

häp lhamel tä Dios ifwayhtej letayhfwas

₃wet äp ihutwek tä tälhomche honhates

tä tumej tafwojhiye lhäy'e tä tapinhiye,

lhäy'e tä ifwala tälhche,

lhäy'e tä ifwala y'uy.

₄Iche iyhäj tä wetahen

tä inukwe ts'anis tä holotaj.

Lhamel nilhokhiyet'a len'äyij

yämthilek nichäte hupuy wet yen lew'eta.

₅Wuj tä ichimhen wet äp nichuyuhen,

wet tatäy lhimphaj wet y'inhen.

₆Mat tä lhamel lelhakli ihi,

t'änch'oye Lhawuk wet ifwayhtej lelhakli.

₇Wet nech'e inuhatche len'äyij tä is

tä tiyäje hupuy yämthilek yen lew'eta.

₈W'enho gracias Lhawuk

häp lehumnhayaj tä nittäya,

lhäy'e m'ayhay tä isis tä iwoyeje wichi,

₉tä lham hiw'enho inät wichi tä ichimhen,

wet hiw'enho lhäk tä naya häp nehläs länhay.

₁₀Iche iyhäj tä ihi honataj,

ihi t'at t'akay tä häpe

lefwitajayajay lhäy'e cadenas,

₁₁tä lhamel tatayhlä Lhawuk lhämtes

wet yen w'et m'ayeka

m'ak tä lham Dios tä N'owujtaj

t'uhläk lhamel iwoye.

₁₂Wet Dios yen leteläythayaja

lechumtes tä äyteschehen,

wet nichätej katsi wet nehit katsik tach'ote lhamel.

₁₃Mat tä lhamel lelhakli ihi,

t'änch'oye Lhawuk wet ifwayhtej lelhakli.

₁₄Itonphä tä tälho honataj

wet iwasthiche t'akay tä chinhas.

₁₅W'enho gracias Lhawuk

häp lehumnhayaj tä nittäya,

lhäy'e m'ayhay tä isis tä iwoyeje wichi.

₁₆Tsi iwasthiche lepe p'otes tä bronce,

wet iwo lhipeya chinhas tä õhp'alkathiche.

₁₇Iche iyhäj tä lech'isukyajay tamenej

tä t'inhayajay ihi wet lelhakli ihi,

₁₈n'äfwtseye lhäk

wet tatäy lhimphaj wet y'inhen.

₁₉Mat tä lhamel lelhakli ihi,

t'änch'oye Lhawuk wet ifwayhtej lelhakli.

₂₀Iwoye lhämet wet ichesthen,

wet ifwayhtej n'op'itsekw'et.

₂₁W'enho gracias Lhawuk

häp lehumnhayaj tä nittäya,

lhäy'e m'ayhay tä isis tä iwoyeje wichi.

₂₂Länhen itshätäy tä lewo graciasayej Lhawuk,

wet en akäjyaja tä lhen ämeta m'ayhay tä iwoye.

₂₃Iche hin'ol tä iwom m'ayhay,

inukwe lewomekitaj,

wet laka barcos inukwe t'at inät.

₂₄Lhamel hiw'en m'ayhay tä isis

tä Lhawuk iwoye tä ihi lewomekitaj.

₂₅Lhawuk yok:

“Is chik iche yafwthitaj tä äytaji

wet iwo lhetheya inät.”

₂₆Wet yafwthitaj ithatchephä barcos

wet äp itiyäjayenchehchä,

wet hin'ol tä ihiche y'ilejen

tä hiw'en lewit'äyhyaj.

₂₇Tan'ajwethä tet iwoye w'oknhas,

wet nemhit isej lakhajyhayajay.

₂₈Mat tä lhamel lelhakli ihi,

t'änch'oye Lhawuk wet ifwayhtej lelhakli.

₂₉Lhawuk yok, “Is chik nem äytaji”,

wet inät nemhit iwo lhetheya.

₃₀Wet tä lhamel hiw'en tä inät

nem iwo lhetheya, akäswethä,

wet Lhawuk ichätyene lhip

tä lhamel t'uhläk nichäte.

₃₁W'enho gracias Lhawuk

häp lehumnhayaj tä nittäya,

lhäy'e m'ayhay tä isis tä iwoyeje wichi.

₃₂¡Wujyenay Lhawuk tä lheyayej

wichi tä lhaihutwek,

wet wunitay tä lheyayej

hin'ol tä thänhäy!

₃₃Lhawuk y'imhat häp tewok lhayis

lhäy'e inät lhayis,

wet honhat tä inukwe nech'e ts'anis t'at.

₃₄Häp honhat tä is

nech'e yen mak'ataja,

wichi tä ihi häp tä lech'isukyajay tamenej.

₃₅Honhat tä ts'anis

nech'e yen lewomhaya,

wet honhat tä tamchäy

nech'e yen inät lhayisa.

₃₆Häp tä yen wichi tä nehläs länhay lew'eta,

wet lhamel yenwethä hupuy lhayis.

₃₇Tutcheyhiche lelafwey wet itihchä uvas,

wet wuj yachuyaj lhay tä ilanhi.

₃₈Lham takäpfwayeje m'ak tä is

wet yäm wujpey lhamel,

wet leläy häte lhäy'epej lhip.

₃₉Tä letayhfwas yen w'et m'ayeka lhamel

wet itiyej lewit'äyhyaj,

wet wuj lelhakli ihi

wet nemhit wujpe lhamel.

₄₀Mat Dios yen w'et m'ayeka

häp wichi tä ilhaklit lhamel,

wet iwetahathi ts'anis tä newache n'äyij.

₄₁Mat itonphä wichi tä ihi lep'altseyaj,

wet yäm wujpey, tet iwoye tson'atas.

₄₂Wet hin'ol tä isen,

tä hiw'en täja lhamel lakäjyaj ihi,

mat häp wichi tä ni'isahen yok tam.

₄₃Elh chik lehusek ihi

yenla letichunhayaja täjtso,

wet ihanhiyeja Lhawuk lehumnhayaj tä nittäya.