Salmo|Sal 118

₁¡N'awunit Lhawuk tsi lham häp tä hap'altsentsaj,

wet lehumnhayaj tek tatäy!

₂Is chik Israel lhayis yok:

“¡Lhawuk lehumnhayaj tek tatäy!”

₃Wet is chik sacerdotes yok:

“¡Lhawuk lehumnhayaj tek tatäy!”

₄Wet is chik wichi tä iwujyen Lhawuk, yok:

“¡Lhawuk lehumnhayaj tek tatäy!”

₅Tä olhakli ihi ot'äne Lhawuk,

wet tach'ahu n'oye wet ifwayhatn'o.

₆Lhawuk in'oyej wet tek onoway,

tsi nehit katsik ihanej iwoyneje

m'ak chik yen n'oye.

₇Lhawuk in'oyej wet tach'ot n'oye.

Tä mälhyejtso, ow'enla chik tatäy

häp lhamel tä n'äyi n'oho.

₈Wuj tä is tä owo t'ekhahyajayej häp Lhawuk,

wet tek ot'ekhaye häp hin'ol.

₉Wuj tä is tä owo t'ekhahyajayej häp Lhawuk,

wet tek ot'ekhaye häp hin'ol tä takhajayhen.

₁₀Nilhokej wichi tä ihiche honhates

tä lhamel tatay n'ohlä,

mat oisej Lhawuk wet okalhi lhamel.

₁₁Wet tej tä oihit lechowej,

mat oisej Lhawuk wet okalhi lhamel.

₁₂Tej tä tet iwoye akäyekwos chik oihi lechowej,

mat lefwitseyaj y'om t'at,

tet iwoye hon'al tä õ'wunho.

Oisej Lhawuk wet okalhi.

₁₃Lhamel inu n'oye tä t'uhläk ikalh n'ohi,

mat oisej Lhawuk tä tach'ot n'oye.

₁₄Owujyenej otenek häp Lhawuk

tä häpe okhajyhayaj wet äp Ofwayhthi.

₁₅Häp hin'ol tä isen tumehen t'at lewukwey

tä ichoywethä tä iwunit Lhawuk, wet yok:

“¡Lhawuk lakhajyhayaj ikalhi letayhfwas!

₁₆¡Lhawuk lakhajyhayaj wuj tä isilataj!

¡Lhawuk lakhajyhayaj ikalhi letayhfwas!”

₁₇Oy'inhit'ala mat oläy t'at,

yämthilek oyen lhämeta m'ak tä Lhawuk iwoye.

₁₈Äytajche Lhawuk letasnhayaj tä iti n'oyej,

mat iwahnhit'a n'oyej ot'ilek.

₁₉Fwoyenchehen Lhawuk Lew'et lepelis,

tsi ot'uhläk ohochufwi

yämthilek ow'enho oka gracias häp Lhawuk.

₂₀Häpe t'at huppe tä lewuk Lhawuk,

wet häp wichi tä isen häpkhilek inukwe.

₂₁Ow'en amho oka gracias, Iwuk,

tsi lechulh n'oho tä ahäpe Ofwayhthi.

₂₂Häp tunte tä hin'ol

tä yenlhi hup itiyej kanhi,

nech'e häpe t'at tunte tä lhamya.

₂₃Wet elh tä iwoye täja häpe Lhawuk,

wet y'aw'en tä wuj tä is lechumet.

₂₄Ifwalana häpe t'at tä Lhawuk iwo lechumeta.

Is chik lhakäjyaj ihi wet lhatamsekis ihi.

₂₅Woye tä owoye, Iwuk, fwayhat n'ohen.

Olhaip'altsen ame, Iwuk, ch'ot n'oyehen

häpkhilek oische alhoho.

₂₆¡Is chik Lhawuk itiyej lakäpfwayaj tä is

häp hin'o tä näm tä Lhawuk lhämetej!

Olhamel otkäpfway amehen tä oihi Lhawuk Lew'et.

₂₇Lhawuk häpe Dios

wet iwoyej n'oyehen m'ak tä is.

Woyay tesa n'okäjyaj,

chäj alhoho hal'ä lhachal

wet tiwhäye altar lech'ul.

₂₈Owo graciasa amej wet oaiwujyen

tä ahäpe oka Dios.

₂₉¡N'awunit Lhawuk tsi lham häp tä hap'altsentsaj,

wet lehumnhayaj tek tatäy!