Salmo|Sal 119

₁Lhawuk lakäpfwayaj tä is

iyej wichi tä iwoye lhämtes wet newache letes.

₂Lhawuk lakäpfwayaj tä is

iyej wichi tä itetshan lhämtes

wet imälhewek lehusey tä t'ukwe häp lham.

₃Lhamel iwohiyet'a m'ak tä ni'isa,

mat inukwe Lhawuk len'äyij.

₄Am lene'tek matche tä wichi iwoye ämtes.

₅Wuj tä is chik olhaitsokhilhi t'at häp ämtes.

₆Wet chik otetshan nilhokej ämtes,

ihichet'ala m'ak chik oyen n'äfwlhiya lhamej.

₇Wet chik olhaichufwenej ämtes tä isen,

oaiwunthila wet ihichet'ala m'ak chik ni'isak

oyenla tichunhayaja lhamej chik ihi ohusek.

₈Owohiyela ämtes, yej le n'oyej.

₉¿Atsi m'ak tä mamse iwoye

yämthilek ihanej iwoyneje chik t'amaj lhamej?

Häpe t'at chik iwoye Dios lhämtes.

₁₀Omälhetwek ohusek tä ot'u amche.

Yej tach'anlha n'oye chik oleyej ämtes.

₁₁Oyenpej tichunhayaja ämtes,

häpkhilek n'am woye och'isukyaj

wet tek ottay ahilä.

₁₂Iwuk, oaiwunit.

Chufwen n'oyej ämtes.

₁₃Oyenlat lhämeta nilhokej ämtes

tä pajche lefwenho wichi.

₁₄Oyenlat käjyaja tä owoye ämtes,

inu'pe okäywet.

₁₅Oyenlat tichunhayaja ämtes,

wet otetshanhila m'ayhay tä lewoye

yämthilek oten.

₁₆Oyenlat käjyaja achufwenyajay,

wet tek op'ethathilahlä ämtes.

₁₇Woyej n'oye m'ak tä is tä akawon'o,

häpkhilek ow'atshancheyaj ihi

wet owoye t'at ämtes.

₁₈Päyen n'oye häpkhilek ohanej

achufwenyaj tä isis.

₁₉Ohäpe hin'o tä w'enha lhamej tä oihonhatena.

Yej leskat n'oho ämtes.

₂₀Nilhok lewhäy tä ilänn'o otichunhayaj

tä owatläk ohanej ämtes.

₂₁Let'isej lhip awäk tä letiyej

häp hin'ol tä lhaichäjwethä,

wet lewit'äyhyaj ihi lhamel tä ileyej ämtes.

₂₂So n'oyej lhamel leläkwyhanyaj

tä yenn'o w'et m'ayeka,

tsi ohäpe elh tä iwoye t'at ämtes.

₂₃Tej tä hin'ol tä takhajayhen

fwetaj iwoyej n'oye owit'äyhyaj,

mat tä ohäpe akawo

oyenpej tichunhayaja ämtes.

₂₄Olham wuj tä okäjejlhi ämtes,

tsi häp tä ichufwenn'o.

₂₅Tatäy lhimphaj wet oy'il t'at.

W'en n'oho ow'atshancheyaj,

mälhyej tä ämet yäme.

₂₆Pajche ofwel amho m'ak tä owoye,

wet lechulh n'oho.

Chufwen n'oyej ämtes.

₂₇W'en n'oho ohanyaj

häpkhilek owoye ämtes,

häp tä ot'uhläk oyen tichunhayaja

m'ayhay tä isis tä lhenlhi.

₂₈¡Olhakli hip'o n'o'pe!

Khajyenn'o, mälhyej tä ämet yäme.

₂₉Tonte n'ohlä m'ak tä kamatache.

P'altsenn'o wet chufwen n'oyej ämtes.

₃₀Ottshupiye m'ak tä matche,

wet wuj tä owatlä ämtes.

₃₁Iwuk, olhaip'ajtej ämtes.

Yej n'äfwlhatn'o.

₃₂Okelit tä ot'uhläk owoye ämtes,

tsi wuj tä lekäjyenlhin'o.

₃₃Iwuk, chufwen n'oyej ämtes häpkhilek ohanej,

tsi owatläk owoye nilhokej.

₃₄W'en n'oho ohanyaj häpkhilek

ot'amajej m'ak tä lechufwen n'oyej,

wet imälhewek ohusek tä owohiyela.

₃₅Ti n'ohi on'äyij yämthilek

onukwe wet owoye ämtes,

tsi häp tä otamsek tälhe.

₃₆Humnhatej ohusek häp ämtes.

Isit'ak onlhak'alch'oyek

wuj okäywet chik okalhi.

₃₇Yej wahin n'oyej chik otetshan

m'ak tä m'ak nitälhaye.

W'en n'oho ow'atshancheyaj

häpkhilek owoye m'ak tä lehuminche.

₃₈Äm matche n'oyej ämtes tä lewoyeje

häp lhamel tä aihumin.

₃₉So n'oyej wichi lhämtes

tä hin'äfwlhatlhi n'oyej tä onuhat lhamho.

Tsi ämet chik am lewoye häp tä isen.

₄₀Olham okän ämtes.

W'en n'oho ow'atshancheyaj,

tsi ahäpe Elh tä is.

₄₁Iwuk, ti n'oyej ahumnhayaj tä nittäya

wet fwayhatn'o, mälhyej tä ämet yäme.

₄₂Häpkhilek onchulhejlä

elh chik iti n'oyej lhämet tä ni'isa,

tsi ot'ekhaye t'at ämet.

₄₃Yej so n'oyej tä oyämepej ämet tä matche,

tsi ot'ekhaye t'at ämtes.

₄₄Oyenhipeja chumyaja achufwenyaj

pajla'tha tiyäj'attsiy,

₄₅häpkhilek niwohit m'ak chik hip'ajtit n'ohchä,

tsi owoye t'at ämtes.

₄₆Chik oihi tä reyes tatache,

oyämhiyela ämtes, on'äfwelhit'ala.

₄₇Tsi wuj tä ohumin ämtes

wet lhäy'e lhip tä okäjejlhi.

₄₈Ohumin wet owujyen

wet wuj tä oyen tichunhayaja,

oyenhit'a w'et m'ayeka.

₄₉Tichunche ämette lew'en n'oho tä ohäpe akawo,

wet häp tä tamenej tä oniwhayaj ihi n'oyej.

₅₀Tä olhakli ihipej,

oisej t'at tä ikhajyenn'o

wet iwo ow'atshancheyaja.

₅₁Lepes ihichet'a tä iläkwlhin'o

häp wichi tä lhaichäjwethä,

mat olehiyejt'a achufwenyaj.

₅₂Iwuk, oyen at tichunhayaja

ämtes tä lewoyehte

häp ifwalas tä tajyämetso,

wet häp tä ikhajyenn'o.

₅₃Wuj tä owäk ihi tä ow'en wichi

tä iwoye m'ak tä ni'isa tä ileyej achufwenyaj.

₅₄Oyen oteneka ämtes

tä oihi häp honhat tä ka'ow'etana.

₅₅Iwuk, otichun hach'oye tä honatsipej.

Owatläk oyen chumyaja häp achufwenyaj.

₅₆M'ak tä lewukn'o

häpe t'at tä owoye ämtes.

₅₇Nilhok m'ak tä ow'en

häpe t'at am, Iwuk.

Pajchehte oyok:

“Olhaichufwenhiyeja tä owoye ämtes.”

₅₈Imälhewek ohusek tä olhaip'altsen ame.

Woyej n'oye m'ak tä is,

mälhyej tä ämet yäme.

₅₉Oyen tichunhayaja olham ochumyaj,

wet oyachajo tä owoye ämtes.

₆₀Olhaikeltej tä oyen chumyaja ämtes.

₆₁Oihi lechowej wichi tä ni'isahen

tä iwoyej n'oye t'akanyajay,

mat tek op'ethatlä achufwenyajay.

₆₂Onephä tä honatsi chowej

wet owo graciasa amej

tä oyen tichunhayaja ämtes tä ische alhoho.

₆₃Olhaip'ajtej lhamel tä aihumin

wet iwoye ämtes.

₆₄Iwuk, ahumnhayaj tä nittäya

tapoyejej honhat.

Chufwen n'oyej ämtes.

₆₅Iwuk, let'amaj n'oyej tä ohäpe akawo,

mälhyej tä ämet yäme.

₆₆Chufwen n'oyej yämthilek is m'ak tä owoye,

lhäy'e otäfwnhayaj, tsi ot'ekhaye t'at ämtes.

₆₇Tä kamaj katasina n'oyej m'ak tä äytajche,

wuj owetahayajay tä owoye,

mat athana owoye t'at ämet.

₆₈Ahäpe elh tä hap'altsentsaj

wet is m'ak tä lewoye.

Chufwen n'oyej ämtes.

₆₉Wichi tä lhaichäjwethä

yämej n'oye otes tä kamatache,

mat owoye t'at ämtes mälhewek ohusek.

₇₀Lhamel lehusey t'unhen,

mat olham oyen käjyaja achufwenyaj.

₇₁Wuj tä oisej tä letasinn'o,

tsi tä mälhyejtso olhaichufwenej t'at ämtes.

₇₂Olham oyok, lhäy'e lhip tä laha ihi

achufwenyaj tä lhen ämeta,

inu'pe wuj chinaj t'äj.

₇₃Am tä enekn'o wet owak'alh t'at.

W'en n'oho ohusek tä is

yämthilek olhaichufwenej ämtes.

₇₄Wet wichi tä aihumin wet iwoye ämtes,

lakäjyaj ihihilak lhamel hiw'enn'o,

tsi ot'ekhaye t'at ämet.

₇₅Iwuk, ohanej tä m'ayhay tä lewoye isen t'at,

wet is alhoho tä leti n'oyej olhakli.

₇₆Is chik ahumnhayaj tä nittäya ikhajyenn'o,

mälhyej tä pajchehte lefwel n'oho.

₇₇Lhu päyen n'oye hap'altsenyaj

wet en ow'atshancheyaja,

tsi tä lechufwenn'o

okäjyaj ihi t'at.

₇₈Is chik n'äfwelhen wichi tä lhaichäjwethä,

tsi niwohit m'ak chik tamenej

tä iwoyej n'oye lhämtes tä kamatachehen.

Mat olham oyenlat tichunhayaja ämtes.

₇₉Is chik lhaip'ajtit n'oyej wichi tä aihumin,

häp lhamel tä ihanej ämtes wet nitäfwelej.

₈₀Is chik imälhewek ohusek tä owoye ämtes,

häpkhilek niwohit m'ak chik oyen n'äfwlhiya lhamej.

₈₁Matche tä oniwhich'oyek lefwayhthilan'o,

wet ot'ekhaye t'at ämtes.

₈₂Oy'el tä oniwhipejlä ifwala

chik lhayäm matche ämet,

wet oyopej: “¿Atsihila ifwalak lekhajyenn'o?”

₈₃Tej tä nem ois,

ohätet iwoye m'ak chik tutsaj länek,

mat tek op'ethatlä ämtes.

₈₄¿Chihätefwas ifwalas chik kamaj oniwhihlä?

¿Atsihila ifwalak lewo akalelhthayajayej

häp wichi tä n'äyi n'oho?

₈₅Wichi tä lhaichäjwethä

wet iwohiyet'a achufwenyaj,

hätet iwoyek lhamel yenwethä

chowhay tä t'uhläk onchätho.

₈₆¡Ch'ot n'oye, tsi niwohit m'ak chik tamenej

tä lhamel n'äyi n'oho!

Nilhokej ämtes häpe t'at m'ak tä matchehen.

₈₇Tatäy lhimphaj wet otayhfwas

itäyhatn'o tä oihi honhat,

mat olehiyejt'a ämtes.

₈₈Tä ahumnhayaj nittäya, fwayhatn'o

wet owohiyela ämtes tä lene'tek wichi iwoye.

₈₉Iwuk, ämtes tatäyhit'a.

Ihi t'at pule.

₉₀Tälhe tä nech'enyaya

pajla'tha nichäte lepes,

lelehiyejt'a aka wichi.

Lhenlhi honhat wet lhäm t'unhi,

wet ihit tä ihi.

₉₁Nilhokej m'ayhay tä lene'tek ichehen,

iche t'at pajtha nichäte ifwalasna,

wet tach'ot at ame.

₉₂Wet chik achufwenyaj niwohi okäjyaja,

oy'ilej t'at ofwitajayaj.

₉₃Ihichet'ala ifwalak op'ethathilahlä ämtes,

häp tä ow'atshancheyaj tä lew'en n'oho tälho.

₉₄Fwayhatn'o tsi ahäpe Owuk,

wet owoye t'at ämtes.

₉₅Wichi tä kahap'altsentsesa

t'uhläk itäyhatn'o,

mat wuj tä otch'ahuye ämtes

tä lene'tek owoye.

₉₆Ow'en tä nilhokej m'ayhay lepes iche t'at,

mat ämtes lepes ihichet'a.

₉₇Wuj tä ohumin achufwenyaj.

Ifwala imälhewek tä oyen tichunhayaja.

₉₈Ämtes ipej n'oyej,

yenn'o häpeya ahantsaj

wet onu'pe otayhfwas.

₉₉Matche tä ohan m'akej,

onu'pe n'ochufwenyajwos tä lechufwenekn'o,

tsi wuj tä oyen tichunhayaja ämtes

tä lene'tek wichi iwoye.

₁₀₀Tä owoye ämtes, häp tä ohan m'akej,

onu'pe hin'ol tä thänhäy.

₁₀₁Tä ot'uhläk owoye ämet,

olechehen nilhokej okeyis tä ni'isachehen.

₁₀₂Olehiyejt'a ämtes,

tsi am tä lechufwenn'o.

₁₀₃Wuj tä hak'onek ämtes tä nichätho ok'aj,

inu'pe akäyek.

₁₀₄Ohanyaj tä in'oyej tälho t'at ämtes,

wet häp tä on'äyiho m'ak tä kamatache.

₁₀₅Ämet hätet iwoye isi

tä ihutunche on'äyij,

häpkhilek ohanej m'ak tä is chik owoye.

₁₀₆Omatthichela olhämet tä ot'unhatche,

wet oyenla ochumyaja ämtes tä isen.

₁₀₇Iwuk, wuj tä olhakli ihi.

W'en n'oho ow'atshancheyaj,

mälhyej tä ämet yäme.

₁₀₈Chumlä awujyaj tä owunit ame,

wet chufwen n'oyej ämtes.

₁₀₉Owit'äyhyaj yikhit'a och'oye,

mat tek op'ethatlä achufwenyaj.

₁₁₀Wichi tä kahap'altsentsesa

iti n'oyej t'akanyajay,

mat oyikhit'ach'oye ämtes.

₁₁₁Okäywet tä nittäya

tä lhenn'o lewuka häpe t'at ämtes,

tsi häp tä ikänitlhi ohusek.

₁₁₂Tälho t'at ohusek tä ot'uhläk

oyen chumyaja nilhokej ämtes,

wet olehiyejt'ala.

₁₁₃On'äyiho wichi tä fwetaj

lhayene iyhäj tä isen,

mat achufwenyaj häp tä ohumin.

₁₁₄Am tä ahäpe oletnhawet wet äp ofwamthi.

Oniwhayaj in'oyej tä ot'ekhaye ämet.

₁₁₅¡Mä och'oye, amel tä akni'isahen,

tsi owatläk owoye oka Dios lhämtes!

₁₁₆Iwuk, w'en n'oho okhajyhayaj,

mälhyej tä ämet yäme, wet oläyhla,

häpkhilek newa n'oyej on'äfwlhi tä oniwhich'oye.

₁₁₇Ch'ot n'oye wet otfwayhla,

wet owohiyela ämtes.

₁₁₈Lewohit'a lahaya häp wichi tä ileyej ämtes,

tsi laha ihihit'a letichunhayajay.

₁₁₉Häp wichi tä kahap'altsentsesa tä ihi honhat,

lhen at häpeya hup mok,

wet häp tä tamenej tä ohumin t'at ämtes.

₁₂₀Ochettiyejche onowayhyaj tä oihi tä letatache,

wet oyenhit'a w'et m'ayeka ämtes.

₁₂₁Pajche owoye t'at m'ak tä is alhoho.

Yej wom n'ohi otayhfwas kweyey.

₁₂₂Un'oye wet ch'ot n'oye,

wet yej tach'anlhayek iwit'äyenn'o

wichi tä lhaichäjwethä.

₁₂₃Oy'el tä oniwhich'oyek

letach'ot n'oye wet lefwayhatn'o,

mälhyej tä ämet yäme.

₁₂₄Tä i'amej ahumnhayaj tä nittäya,

woyej n'oye tä ohäpe akawo,

wet chufwen n'oyej ämtes.

₁₂₅Ohäpe akawo.

W'en n'oho otäfwnhayaj,

tsi owatläk ontäfwelej ämtes.

₁₂₆Iwuk, woye m'ak tä lewoye,

tsi wichi iwohiyet'a achufwenyaj.

₁₂₇Mat olham ohumin ämtes,

inu'pe oro tä isilataj.

₁₂₈Ochunkat lehilä ämtes,

wet on'äyiho m'ak tä kamatache.

₁₂₉Wuj tä isen ämtes,

häp tä tamenej tä owoye t'at.

₁₃₀Ämtes lechufwenyaj hin'älit m'ayhay,

wet wichi tä nhanache m'akejen

nech'e letäfwnhayaj ihi.

₁₃₁Matche tä owatlä ämtes,

wet och'enhi ok'aj tä okän.

₁₃₂Yahinn'o wet p'altsenn'o,

mälhyej tä lewoyeje wichi tä aihumin.

₁₃₃Tsok otkwey yämthilek onukwe t'at ämtes,

mälhyej tä lehuminche.

Yej wahin n'oyej chik ikalh n'ohi m'ak tä ni'isa.

₁₃₄Fwayhat n'oyej hin'ol tä fwitses,

wet owohiyela ämtes.

₁₃₅Ti n'oyej akäpfwayaj tä is tä ohäpe akawo,

wet chufwen n'oyej ämtes.

₁₃₆Tä ow'en tä wichi yen w'et m'ayeka ämtes,

wuj tä olhafwyhayaj ihi.

₁₃₇Iwuk, am tä ais,

wet ämtes ische alhoho.

₁₃₈Nilhokej ämtes tä ische alhoho

wet äp matchehen.

₁₃₉Matche tä ilänn'o owäk

tä ow'en tä otayhfwas nitetshana ämtes.

₁₄₀Matche tä lhäy'e lhip tä isen ämtes,

häp tä tamenej tä ohumin t'at.

₁₄₁Lajit ohaya, wichi yen'atn'o w'et m'ayeka,

mat tek op'ethatlä ämtes.

₁₄₂Lepes ihichet'a tä is at alhoho m'ak tä lewoye,

wet achufwenyaj häpe t'at m'ak tä matche.

₁₄₃Tä näm n'oye olhakli lhäy'e ofwitajayaj,

ämtes iwot okäjyaja.

₁₄₄Lepes ihichet'a tä isen t'at ämtes.

Täfwnhat n'oyej häpkhilek ow'atshancheyaj ihi.

₁₄₅Iwuk, imälhewek ohusek tä ot'än ame.

Chulh n'oho, ot'uhläk owoye ämtes.

₁₄₆¡Ot'än hach'oye!

Fwayhatn'o yämthilek owoye ämtes.

₁₄₇Tä nech'e fwala,

tä kamaj honatsi i'pe honhat,

onephä wet ot'alhej ame

hach'otyaj chik leti n'oyej.

Ot'ekhaye t'at m'ak tä ämet yäme,

wet oniwhayaj iyeji t'at.

₁₄₈Tä honatsi omähit'a,

oyen tichunhayaja ämtes tä isen.

₁₄₉Iwuk, tä ahumnhayaj nittäya, ch'ahu n'oye.

Woye m'ak tä is alhoho wet fwayhatn'o.

₁₅₀Wichi tä t'uhläk iwit'äyenn'o atofwiyet'a n'ohlä,

mat lhamel atofwehlä achufwenyajay.

₁₅₁Wet am, Iwuk, tek a'tofwe n'ohlä,

wet ämtes matchehen t'at.

₁₅₂Pajche tä ontäfwelej ämtes tä lewoye,

wet nofwit'ala.

₁₅₃Tetshan olhakli wet fwayhat n'oyej,

tsi tek op'ethatlä achufwenyaj.

₁₅₄Ch'ot n'oye wet fwayhat n'oyej owit'äyhyaj,

mälhyej tä ämet yäme.

₁₅₅Wichi tä ni'isahen

nichäthiyet'ala lefwayhyaj,

tsi lhamel iwohiyet'a ämtes.

₁₅₆Iwuk, lhäy'epej lhip hap'altsenyajay.

Woye m'ak tä is alhoho wet fwayhatn'o.

₁₅₇Wujpey otayhfwas

wet t'uhläk iti n'oyej owit'äyhyaj,

mat olehiyejt'a ämtes.

₁₅₈Chik ow'en hin'ol tä itiyej t'akanyaj ämtes,

lhäy'e lhip tä n'am humin,

tsi lhamel iwohiyet'a ämtes.

₁₅₉Iwuk, tetshan,

matche tä ohumin t'at ämtes.

Tä ahumnhayaj nittäya, fwayhatn'o.

₁₆₀Imälhewek ämet tä matche t'at,

t'un wet isen nilhokej ämtes.

₁₆₁Niwohit m'ak chik tamenej

tä t'uhläk iwit'äyenn'o

häp hin'ol tä takhajayhen,

mat ohusek yenhit'a w'et m'ayeka ämtes.

₁₆₂Oyen at käjyaja ämtes,

ohätet iwoye hin'o tä nilhokpe

chinaj t'äj tä wuj.

₁₆₃Ohuminhit'a n'olhämet tä kamatache, oy'ulhan.

Mat häp achufwenyaj häp tä ohumin.

₁₆₄Tä ow'en ämtes tä isen,

ifwala imälhewek tä oaiwunit t'at.

₁₆₅Häp wichi tä ihumin achufwenyaj

matche tä letamsekis ihi,

wet ihichet'ala m'ak chik iwit'äyen lhamel.

₁₆₆Iwuk, ottaye t'at chik lefwayhthilan'o,

tsi oyen ochumyaja ämtes.

₁₆₇Owoye t'at ämtes

wet matche tä ohumin.

₁₆₈Owoye ämtes lhäy'e achufwenyajay.

Lew'en t'at nilhokej ochumyajay.

₁₆₉Iwuk, is chik lelät n'oye

tä ot'än hach'oye.

W'en n'oho ohanyaj,

mälhyej tä ämet yäme.

₁₇₀Is chik lelät n'oye tä ot'alh ame.

Fwayhatn'o, mälhyej tä ämet yäme.

₁₇₁Chik lechufwen n'oyej ämtes,

wujlak oaiwunit.

₁₇₂Oyenla oteneka achufwenyajay,

tsi nilhokej ämtes isen t'at.

₁₇₃Is chik awak'alh t'at

tä letach'othila n'oye,

tsi matche tä ottshupiye t'at ämtes.

₁₇₄Iwuk, owot yiyak lefwayhat'atn'o.

Tä lechufwenn'o, okäjyaj ihi t'at.

₁₇₅Fwayhatn'o häpkhilek oaiwujyen,

wet is chik oisej t'at achufwenyajay.

₁₇₆Oweta, ohätet iwoye tson'ataj tä weta.

¡Lhu un'okwe, tsi tek op'ethatlä ämtes!