Õyen tichunhayaja ifwalas p'ante õ'häne Jerusalén häp Arca tä N'ot'amajchet tä Lhawuk lhämtes ihi
1-2Iwuk tä ahäpe Jacob laka Dios tä takhajay,
tichunche David lhäy'e lelhaklis tä iyej p'ante.
Tichunche lhämet tä hit'unhatche amej tä yok:
3“Ohohit'alachufwi owukwe
wet tek olhaithatla'pe omäwet
yämthilek owo t'elakw'eta.
4-5Omähit'ala lhimphaj
tä kamaj n'am lhoke hup
yämthilek Owuk tä Jacob laka Dios
tä takhajay yen lew'eta.”
6Tä y'ehi p'ante Efrata,
y'ahanej ihi lhip tä Arca tä N'ot'amajchet
tä Lhawuk lhämet lehi ihi,
wet y'anlhoke tä ihi lew'et tä lhey Jaar.
7N'ahoyela Lhawuk Lew'et tä T'amajchet,
wet n'atkhoschela katsi
chik y'ewhäye lepach'ol.
8Nephä, Iwuk, chuma Arca
tä atetnekej awujyaj,
wet lhuu hoye lhip tä lhenla haw'eta.
9Is chik lew'uyyenhiche le'isyaj
häp aka sacerdotes,
wet is chik t'änhen tä lakäjyaj ihi
lhamel tä häpe aka wichi.
10Tä lehumin akawo p'ante David,
wet is chik letach'ote t'at rey tä letatshupiye.
11Lhawuk iwoyeje p'ante lhämet
tä hit'untejche David,
häp lhämet tä nilehichela tä yok:
“Elh ales tä lepes lheley
otihihila aniyatyaj.
12Chik ales iwohiyela olhämet
tä owoyeje lhamel,
lhäy'e ochufwenyajay,
häte lhamel leles ihihila aniyatyaj
pajla'tha tiyäj'attsiy.”
13Lhawuk tatshupiye chenaj Sión
tä t'uhläk yen lew'eta.
14Yok, “Häp täja ow'et
tä ohumin chik oihihila
pajla'tha tiyäj'attsiy.
15Ow'enhihola wichi wuj häp m'ak chik isej,
häpkhilek p'elitses teskanejen lhäk.
16Ow'uyyenhihichela le'isyaj
häp laka sacerdotes,
wet oka wichi t'änhihena
tä lakäjyaj ihi.
17Otihihila David leniyatyaj tä ihi lhipna
häp leles tä lepes lheley elh,
wet olehiyejt'ala tä ot'uye leniyatyaj,
hätehlat iwoye n'ochäkw tä isi tä n'oma.
18Wet oyämla wuj len'äfwlhi
häp wichi tä tatayhlä,
mat lham ihihila isi tä lesilatyaj.”
