Lhawuk häpe Dios tä lewujyaj ihi lhäy'e tä hap'altsentsaj
1Dios tä ahäpe oka Niyat,
oyenlat lhämeta awujyaj
wet olehiyejt'ala tä oaiwujyen.
2Ifwalapej ifwalapej oaiwujyen,
wet tek olehiyeja tä oaiwunit.
3Lhawuk häpe N'owujtaj tä Lhamya
wet t'uhawetej tä wichi iwujyen.
Lham lewujyaj nehit katsik ihanej.
4Wichi ifwenhihola leles
häp achumtes tä isen,
pajla'tha nichate lepes lheley.
Lhamel yenlat lhämeta
m'ayhay tä äyteschehen tä lhenlhi.
5Wichi yämhiyela aniyatyaj tä lewujyaj ihi,
wet olham oyämhiyela enhay tä isis.
6Wichi yämhiyela m'ayhay
tä äyteschehen tä lewoye,
wet olham oyämhiyela awujyaj.
7Wichi yämhiyela tä matche
tä ahäpe hap'altsentsaj.
Lhamel yenlat leteneka
tä ahäpe N'owuk tä is.
8Lhawuk häpe Dios tä is wet äp hap'altsentsaj,
nakenhiyejt'a lewäk, iteläytej t'at,
wet wuj lehumnhayaj.
9Lhawuk hip'altsen nilhok wichi,
wet wuj tä t'uyehen häp lhenhay.
10Iwuk, is chik nilhokej enhay aiwunit t'at,
wet nilhokej aka wichi is chik aiwujyen.
11Is chik lhamel yäme aniyatyaj lewujyaj
lhäy'e achumtes tä äyteschehen.
12Is chik ifwenhomche iyhäj häp akhajyhayaj
lhäy'e aniyatyaj lewujyaj.
13Aniyatyaj häpe m'ak tä nittäya,
wet nofwit'ala pajla'tha nichäte
wichi tä lepes lheley.
Lhawuk yäm matche nilhokej lhämtes,
wet ispej m'ak tä iwoye.
14Lhawuk ilehiyejt'a lhamel tä nichät katsi,
wet ineyhatphä iyhäj tä laj lakhajyhayaja.
15Nilhokej wichi aiyahin t'at,
lhamel iniwhich'oyek lew'enhomche lhäk
tä nichätepej lewhäy.
16Lew'enhomche lhamel m'ak tä naya,
lhäm yipsejen lhäk tä tälho akwey.
17Is alhoho nilhok m'ak tä iwoye häp Lhawuk,
wet lakäpfwayaj tälhe t'at lechumtes.
18Lhawuk tek atofwehlä
häp lhamel tä t'änch'oye,
häp lhamel tä lehusey ts'ilak tä t'änch'oye.
19Wet häp lhamel tä ihumin wet iwoye lhämtes,
hiw'enho t'at m'ak chik iwatlä.
Chik t'alhe Lhawuk lech'otyaj,
tach'ote t'at, iläte wet ifwayhthen.
20Lhawuk t'uye t'at häp lhamel tä ihumin,
mat häp wichi tä ni'isa itäyhat t'at.
21Is chik owunit t'at Lhawuk.
Is chik nilhokej wichi
iwujyen lhey tä t'amajchet,
athana wet pajla'tha tiyäj'attsiy.
