Niyat tä Dios yen lhäsa
1¿Chipte tä iwo lehuyaja wichi tä i'pe honhat?
¿Chipte tä fwetaj iwoye m'ayhay tä lajit lahaya?
2Niyatey lhäy'e n'owustas tä i'pe honhat
lhaihutchewek tä lhaiwaklhatejen laka'tshayaj,
yämthilek tatayhlä Lhawuk
lhäy'e elh tä itshupyeneje tä yen niyata.
3Lhamel t'änhen tä yok:
“¡N'atiyej kanhi lhat'akay tä yäyit n'amejen!
¡N'aleyej tä yen lakwenkaya n'amel!”
4Mat Lhawuk tä yen lew'eta pule
t'ischeyej wet iläkwethä lhamel.
5Itiyej lewäk wet ilhaklit lhamel,
wet tahuyej tä yok:
6“Olham pajche oyen t'amajchetayej
elh tä oyen niyata.
Lham i'pe Sión, häp chenaj tä ot'amajchet.”
7Niyat yokwe:
“Oyenla lhämeta m'ak tä Lhawuk t'uhläk iwoye.
Lham ifwel n'oho tä yok, Ahäpe olhäs.
Tälhe fwalana Ajchan'o.
8Alhej n'oye yämthilek alewuk
nilhokej wichi tä i'pe honhat,
yäk nichäte lhip tä lepes.
9Lewasthiyejila lhamel akhajyhayaj tä wuj,
lewohla lhipeya, mälhhiyejat iwoye towhay tä iyhät.”
10Tä mälhyejtso, amel tä aniyatey
lhäy'e n'owustas tä i'pe honhat,
hanayej täjtso, achufwenayej ochufwenyajayna.
11-12Wunitay häp Dios wet n'okwiyayej.
Khosche katsi tä lheyayhi tä itayche
wet tiyayej anowayhyaj.
Tsi elat lewäk ihi
wet iso amejen haw'atshancheyaj.
Tsi che iwo lewäka, iwoye t'at.
Dios lakäpfwayaj tä is iyej t'at
häp wichi tä ilethane.
