Salmo|Sal 30

₁Iwuk, owunit ame tä lefwayhatn'o

wet tek lewahnej chik otayhfwas yen käjyaja ot'ilek.

₂Iwuk Dios, ot'alhejnaj ame hach'otyaj

wet lechesatn'o.

₃Am, Iwuk, lefwayhat n'oyej ot'ilek,

lew'en n'oho ow'atshancheyaj,

yämthilek n'am hoye honhat tä atojchä

tä n'op'itseyhay lew'et.

₄Amel tä Lhawuk aleles, tenay atenkay

wet wunitay lhey tä t'amajchet.

₅Tsi pitajit'a lewäk,

mat lep'altsenyaj häp tä lepes ihichet'a.

Chik y'atafwchehchä tä honatsi,

mat tä nech'e fwala lhakäjyaj ihihila.

₆Täjte ow'en tä ois t'at, wet oyok:

“Ihichet'a m'ak chik ikalhla n'ohi.”

₇Am, Iwuk, tä oisej hap'altsenyaj,

lhäm kalelhäj ow'et tä leti n'ohi.

Mat tä nem lhe n'oyej, wuj tä onoway.

₈Ot'ännaj hach'oye, Iwuk,

olhaip'altsennaj ame, oyok:

₉“¿Atsi m'ak chik aisej chik oy'il

wet ohoye n'op'itseyhay lew'et?

Ot'isan lemok ihanhiyejt'ak aiwunit

wet tek yen lhämeta hap'altsenyaj.

₁₀¡Ch'ahu n'oye, Iwuk, p'altsenn'o!

¡Ch'ot n'oye, Iwuk!”

₁₁Letiyej kanhi olhaklis

wet nech'e otkatinlhi t'at.

Leso n'oyej ofwitajayaj

wet lew'uyyen n'ohi okäjyaj.

₁₂Tä mälhyejtso, Iwuk Dios,

okalhihit'ak oyok tam,

mat otenla otenkay tä owunit ame

wet ow'enpej amho gracias.