Chaye Lhawuk
1Yej län amej atichunhayaj
che lew'en wichi tä iwoye m'ak tä ni'isa,
wok let'äytene lhamel.
2Tsi nofwila, hätehlat iwoye hup tä w'atshan
mat tamchäy t'at.
3Chaye Lhawuk wet woye m'ak tä is.
Ehi honhatna wet amajej m'ak tä matche.
4En akäjyaja Lhawuk,
wet hiw'enla amho m'ak tä wuj tä lewatlä.
5Tihi Lhawuk takwey häp haw'atshancheyaj.
Chaye häp lham wet tach'otla ame.
6Hin'älthila ha'isyaj
lhäy'e tä lewoye m'ak tä is alhoho,
mälhhiyejat iwoye ifwala tä nichätho lechowej,
wuj tä isi.
7Yej lhak'alhi mat wo atamseka,
taye t'at wet Lhawuk tach'otla ame.
Yej län amej atichunhayaj
che lew'en hin'o tä ikalhi m'ayek,
wok häp elh tä yenlhi m'ak tä ni'isachehen.
8Tiyej kanhi awäk, leyej tä afwitsaj,
yej län amej atichunhayaj,
tsi täjtso häp tä y'ayhattshi m'ak tä ni'isa.
9Tsi wichi tä ni'isahen
õyokwesichephäla tä ihi honhat,
mat häp lhamel tä t'ekhaye Lhawuk
häpkhilek lew'et häp honhat tä lham hiw'enho.
10Pajiyejt'a wet nemla iche wichi tä ni'isahen.
Tejlak lefwetaj let'ukwe, mat lew'enhit'ala.
11Mat häp lhamel tä lhaknichäjawethä
häpkhilek honhat lewuhuy,
wet iwohla lakäjyajayej letamsek tä wuj.
12Häp hin'o tä ni'isa t'upejläk
iwit'äyen häp elh tä is alhoho.
Tä hiw'en, matche tä n'äyiho.
13Mat Lhawuk t'ischeyej hin'o tä ni'isa,
tsi hiw'en tä tott'aye t'at lakapes.
14Wichi tä ni'isa itonhi lefwajnhat
wet ithatho lech'äha häp lelutsej,
yämlek ithatche katsi p'elitses
lhäy'e tä w'et m'ayhayhas t'at,
wet ilänhen wichi tä is m'ak tä iwoye.
15Mat lhamenlak lefwajnhates itshänhomche t'otlelis,
wet lelutses ichähihena wet wasiche.
16Hin'o tä is lakäywet tä lhimphaj tä iyej, häp tä is,
inu'pe wichi tä ni'isahen lakäywet tä wuj.
17Tsi Lhawuk inäk'äsila lakhajyhayaj wichi tä ni'isahen,
mat t'uye t'at wichi tä isen.
18Häp wichi tä newache letes,
Lhawuk hiw'en t'at m'ak tä iyej lhamel,
wet m'ak tä lakäywetla
nofwit'ala yämlek tiyäj'attsiy.
19Häp ifwalas che ni'isa che nehläs iche,
Lhawuk tek iwomla lhamel,
wet lhäk tä naya ihiyeja.
20Mat häp wichi tä ni'isahen
hätehlat iwoye hon'al tä tamchäy, tatäy t'at.
Wet tä tatayhlä Lhawuk,
lhamel hätehlat iwoye tutsaj tä noj.
21Häp hin'o tä ni'isa,
che t'alhe m'ak che häpe,
iwohit'a lahaya.
Mat häp hin'o tä is
hip'altsen elh wet hiw'enho m'ayek.
22Häp wichi tä Lhawuk
takäpfwayeje m'ak tä is,
honhat lewuhuyla lhamel.
Mat häp wichi tä Lhawuk
takäpfwayeje m'ak tä ni'isa,
õyokwesichephäla tä ihi honhat.
23Lhawuk ipäyne m'ak tä is che elh iwoye,
wet itihi n'äyij tä lham ihuminche.
24Tejlak nichät katsi, mat nephäpej,
tsi Lhawuk t'at tä itsok takwey.
25Ohäpehte mamse, athana och'ut t'at,
mat ohanhiyejt'ak ow'en hin'o tä is wet Lhawuk nitch'otaye,
wok leles t'alh'atwethä.
26Mat ifwalapej lham hip'altsen t'at iyhäj
wet icheyjäntej m'ak tä lewuk,
wet Dios takäpfwayhiyela leles.
27Atontehlä m'ak tä ni'isa
wet woye m'ak tä is,
wet tek tatäyhla amej haw'et tä lhehi.
28Tsi Lhawuk ihumin m'ak tä is alhoho
wet iwomhit'a laka wichi.
Mat itäyhat t'at häp wichi tä ni'isahen,
wet tek iwahnej che iche leles.
29Häp wichi tä isen, honhat lewuhuyla
wet yenla lew'eta yämlek tiyäj'attsiy.
30Häp hin'o tä is lehanyaj ihi tä yämlhi,
wet is alhoho m'ak tä yäme.
31Itihi t'at lehusek häp laka Dios chufwenyaj,
wet ihanhiyejt'a che nichäthen.
32M'ak tä iwoye hin'o tä ni'isa,
iyahinlhi t'at hin'o tä is tsi t'uhläk ilän.
33Mat isakanhiyejt'a tsi Lhawuk tek iwahnej,
häte tach'anlhahiyet'ak itiyej letes.
34Chaye Lhawuk wet woye lhämet,
wet lham aiwujyenla
wet hiw'enla amho honhat yämlek alewuk.
Wet lew'enla wichi tä ni'isahen che tatäy lhamel.
35Ow'en hin'o tä ni'isa,
matche tä lhaichäjlhi,
w'awulhit hal'äk tawoy.
36Mat tajyäme wet nemhit iche,
ofwetaj ot'ukwe mat ow'enhit'a.
37Lhek yahinya hin'o tä is alhoho tä letes newache,
m'ak tä ihiyeja lepese häpe t'at letamsek.
38Mat häp wichi tä inäk'äs Dios lhämet
nofwila t'at lhamel,
tsi m'ak tä ihiyeja häpe t'at letäyhyaj.
39Wichi tä isen lech'otyaj tälhe t'at Lhawuk,
wet häpe t'at leletnhawet
che näm ifwalas tä atha m'ayhay.
40Lhawuk tach'ote yämlek lewit'äyhyaj newayej,
wet ifwayhtej wichi tä fwitses,
tsi lhamel ihoye yämlek t'uyehen.
