LIBRO 2
Tej tä n'am nehi honhat tä ow'et, mat otiyej onihayaj Dios
1Hätet iwoye ch'iwase tä ichim,
yik t'at tä t'ukwe tewok,
mälhyejtso, Dios, tä ohusek t'u amche.
2Hätet iwoyek ochim tä owat ahilä
tä ahäpe ow'atshancheyaj.
Dios, ¿atsihila ifwala chik oyachajo tä oho ame?
3Ihichet'a m'ak chik oisej,
mat olhafwyhayaj häp tä tatäyhit'a n'oyej
wet wichi yopejkwe:
“¿Chip ihitso aka Dios?”
4Olät lhame tä ofwitajayaj wuj tä ilänn'o
tä otichunch'oye ifwalaste ohäne wichi Dios Lew'et
wet lhamel t'änhen tä iwunit Lhawuk.
¡Wuj tä is lakäjyaj!
5Matkat oyok, ¿chipte tä ofwitajayaj ihi?
¿Chipte tä olhak'alhi?
Is chik otiyej onihayaj Dios
wet olehiyejt'a tä owunit.
Lham häpe oka Dios wet Ofwayhthi.
6Dios, olät lhame tä nemhit otkhajay.
Häp tä tamenej tä wuj tä otichun hach'oye
tä oihi honhat tä Jordán,
lhäy'e tä oihi chenhas tä Hermón lhäy'e Misar.
7Pitsaje tewok lepak tä ichulh lhamho.
Matche tä äytaj otichunhayaj,
hätet iwoyek lechen o'pe
inät lhayis tä tälhpe chenhas
wet iwo lhetheya tä hip'o o'pe.
8Tä ifwala Lhawuk ichen n'oye
lehumnhayaj tä nittäya,
wet tä honatsi oy'enhiyejt'a tä ochoylhi,
lhäy'e ot'alhyaj tä ot'alhe Dios
tä häpe ow'atshancheyaj.
9Otahuyej Dios tä Ofwayhthi wet oyok:
“¿Chipte tä lep'ethat n'ohlä?
¿Chipte tä ofwitajayaj ihi
wet otayhfwas ilhaklitn'o?”
10Y'aje olhiley tä äytes
tä otayhfwas iläkwlhin'o,
wet nilhok lewhäy tä lhamel yopejkwe:
“¿Chip ihitso aka Dios?”
11Wet oyok, ¿chipte tä ofwitajayaj ihi?
¿Chipte tä olhak'alhi?
Is chik otiyej onihayaj Dios
wet olehiyejt'a tä owunit.
Lham häpe oka Dios wet Ofwayhthi.
