Dios häpe N'okalelhthayajwo tä is alhoho
1Lhawuk, Dios tä matche,
tahuy wet t'äne wichi
tä tälhe tä ifwala tälhche
lhäy'e tä ifwala y'uy.
2Dios lesilatyaj tälhe t'at Sión,
häp hupuy tä lhäy'e lhip tä isilataj.
3Lhaka Dios näm wet yen lepaka itäj
tä ichunlä wet hip'o m'ayhay.
Häte yen lepaka pelhay tä äytaji
tä ilunej t'at häp lham.
4Tä lham ikaphä,
t'äne pule lhäy'e honhat
yämlek hiw'enej tä iwo lakalelhthayajayej
häp laka wichi.
5Wet yok:
“Hutwek häp wichi tä olham ot'amajchetes,
häp lhamel tä pajche yäm kalelhäj tä lhaithat n'oyej
wet ilänhen tshätäy tä yen n'okhayaja n'oyej.”
6Wet pule yen silätyaja
tä Dios häpe N'okalelhthayajwo tä is alhoho.
7Wet nech'e Dios yok, “Ch'ahuyay n'oye,
amel tä ahäpehen oka wichi Israel lhayis,
oyämhiyeja ame ates.
Ohäpe Dios, amel aka Dios.
8Ofwonhiyejt'a ame itshätäy tä lelänhen
tä lhen han'okhayaja n'oyej,
lhäy'e m'ayhay tä lewunhomche tä lew'en n'oho.
9Wet ot'alhiyet'a aläy w'asetas leles,
wok kayla lhayis tä asnakis tä ihi lehi,
10tsi oläy t'at nilhokej itshätäy tä iche tayhi,
lhäy'e w'asetas tä wujpey tä iche chenhas,
11häte afwenchey tä iche puleye oläy t'at,
wet nilhokej itshätäy tä i'pe honhat olewuk t'at.
12Chik onchuyu p'iya, ofwenhit'a amho,
tsi olewuk t'at honhat
lhäy'e nilhokej m'ak tä ihi.
13Otufwit'a w'asetaj t'isan
wet oyähiyejt'a kayla w'oyis.
14Is chik otw'ayhat tä lew'en n'oho
häpe t'at aka gracias,
wet ämpej matche ämet tä lewoyej n'oye.
15Chik alhakli ihi än n'oye,
olham ofwayhthila amej wet lewunthilan'o.”
16-17Mat Dios tahuyej hin'o tä ni'isa wet yok:
“Tä kahuminache tä ofwonej ame
m'ak tä ni'isa tä lewoye
wet let'ulhan olhämtes,
¿chipte tä w'et lhen ämeta
olhämtes lhäy'e ochufwenyajay?
18Mat tä lew'en elh tä etantsaj, lehumin t'at,
wet alep'ajtej wichi tä lakain'oyaj ihi.
19Lhenpej ämeta m'ak tä ni'isa
wet m'ak tä kamatache tälhchepej hak'aj.
20Lhäme apuhfwa wet lhok, Isit'a,
wet letiyej asitäyhyaj.
21Tä lewoye nilhokej tähestso
newache olhämet chik oti amej,
wet lefwetaj olham omälhyej lewoye.
Mat oyen tesa amej tähestso,
otetshanhila m'ayhay tä lewoyena,
wet lew'enla.
22“Amel tä lep'ethatay n'ohlä,
tetshanay olhämettso,
tsi elat otäyhat amel
wet niwohit elh chik aifwayhthen.
23Elh chik hiw'en n'oho laka gracias,
häp tä ihuminn'o wet iwujyenn'o.
Olham ofwayhthila häp elh tä nileyache on'äyij.”
