Salmo|Sal 55

₁Dios, ch'ahuye ot'alhyaj

wet chulh n'oho tä olhaip'altsen ame.

₂Woye tä owoye, ch'ot n'oye

tsi wuj tä olhakli ihi.

₃Otchettiche tä oläte otayhfwas lechos

lhäy'e wichi tä ni'isahen tä t'änhen.

Ichätyen o'pe owit'äyhyaj

wet wuj tä fwitses tä inu n'oye.

₄Ot'otle nilhak'alhi

tä nichät o'pe ot'ilek lenhoch'ayhyaj,

₅wet otchettiyejche onowayhyaj

tä lhäy'e lhip tä ni'isa tä tiyäj n'oho.

_6-7Wet oyok, Istajyak olhafwis ihi,

mälhyej iwoye hokwinaj,

wet ohanej che owey'ä wet olhayäm atojche,

oyen w'eta honhat tä wichi newahi

wet otamsek ihi.

₈Wet oläfwel che oyik

yämthilek nitajan'o fwitsek

lhäy'e yafwthitaj tä fwitsaj.

_9-10Iwuk, täyhat wichina,

w'enhathiche lhämtes.

Tsi ow'en m'ak tä lhäy'e lhip tä ni'isa tä ihi hupuy,

ow'en tä fwitses wichi wet äp äkleyhtses,

wet fwalapej honatsipej

ilunej n'olafwek tä tuntey

tä iwoye lakeyis.

₁₁Tä ilunche hup kawayhil,

itiyej lech'atkanyaj iyhäj,

wet ifwech'enwethä wet iwit'äyen lhamel.

₁₂Che häpkhi otayhfwa che isitäyenn'o,

oteläytej t'at,

wok häp elh tä n'äyi n'oho che iläkwlhin'o,

oweskathin'ehlä.

₁₃Matkat am t'at, yaelh,

tä lewoyej n'oye m'ak tä ni'isa,

tä ahäpe okalay'i tä lhamya wet äp ot'unfwa.

₁₄Fwalas tä tajyämetso

y'epejwek tä y'ehi Dios Lew'et,

wet y'alunhi t'at wichi tä wuj tä ihi.

₁₅¡Is che t'ilek iselkathen häp otayhfwas!

¡Is che nichätho n'op'itsek lew'et tä kamaj iläyhen,

tsi m'ak tä ni'isa ihiche t'at lew'etes lhäy'e lehusey!

₁₆Mat olham ot'äne Lhawuk

wet lham ifwayhthilan'o.

₁₇Tä nech'e fwala,

lhäy'e tä fwala ihi lechowej,

lhäy'e tä honaj,

owopej ot'alhyaja tä onlhak'alhi

wet olhafwyhayaj ihi.

Wet lham tach'ahuhila n'oye,

₁₈wet ifwayhthilan'o che oihi n'oka'tshayaj,

tejlak wujpey otayhfwas.

₁₉Dios tä Niyat tälhe tä nech'enyaya

ilätla n'oye wet y'ayhthilahchä otayhfwas.

Tsi lhamel iwohit'a lehusey iyhäja,

wet tek nowaye häp lham.

₂₀Lhamel iwo m'akayej lakalay'is

wet inäk'äs letamsek tä iwoyej lhamehen.

₂₁Iwoye lhämtes tä akäschehen,

mat letichunhayaj häpe t'at laka'tshayaj.

Lhämtes äytesichehent'a,

mat häpkhit'a m'ak che elh isej,

hätet iwoye n'ofwajnhat tä y'uy.

₂₂Ti'pe Lhawuk nilhokej m'ak tä lhen alhakliya,

wet lham aikhajyenla.

Tsi tek tach'anlhahiyelak nichät katsi

häp hin'o tä iwoye lhämtes.

₂₃Dios, häp hin'oltso

tä aläntses lhäy'e tä akantses,

pitajit'ala len'äyij.

Lechätyenhihola chowej tä lajit lech'oya.

Mat olham ot'ekha ame.