Salmo|Sal 58

₁Amel tä han'ohyaj ihi,

isit'a alhoho akalelhthayajay tä lewoyeje wichi,

mathichet'a.

₂Isit'a m'ak tä lhen atichunhayaja,

amel tä letamenej tä nemhit lefwunyaj itiyej m'ak tä ni'isa

häp wichi tä ihi honhat.

₃Wichi tä ni'isahen,

m'ak tä ni'isa ihiche t'at tä nech'e ichehen.

Lhamel tä w'et yämwethä wetahen

tälhe tä kamaj ihiche lakolis.

₄Hätet iwoye amlhäs tä n'ot'ilek,

lhayen ch'otech'ola wet hip'okwe'pe lech'otey

₅häpkhilek nilätaye mago laka música

tä ihanej tä ifwihat.

₆¡Dios, näksen letsotey häp t'owalhastso!

₇Is chik tatäy,

hätet iwoye inät tä y'im.

Is chik tamchäy,

hätet iwoye hon'al tä iwhäye n'äyij.

₈Is chik hätet iwoye chilalo tä yik,

noj t'at wet tatäy.

Is chik hätet iwoye han'äfwaj

tä lako ilän lhamhi,

hiw'enhit'a'pe ifwala.

₉Tä kamaj nitäfwelayej lewit'äyhyaj,

is chik y'uho hätet iwoye ch'uthanil.

Is chik õyokwesphä lhamel,

hätet iwoye hon'al tä w'atshan

tä ihwok tä äytaji ichäj.

₁₀Elh tä is alhoho, lakäjyaj ihihila

chik hiw'en häp hin'o tä ni'isa

tä lewit'äyhyaj ihi.

¡T'äsichela lew'oyis,

wet lepach'ol ichätejchehen!

₁₁Wet wichi yohlakwe:

“Dios matche tä hiw'enho laha

häp wichi tä ische alhoho.

Iyahin lhamel wet iwo lahaya

m'ak tä is tä iwoye.”