Salmo|Sal 68

₁Tä Dios yik tä iwo laka'tshayaja,

letayhfwas ifwtsatpehen honhat.

Häp wichi tä n'äyiho,

tä hiw'en nowaye wet inukwe alhoho.

₂Wet noj lhamel, hätet iwoye

tutsaj tä yafwthi ichäj, noj t'at.

Wachuhi, hätet iwoye akäyek lhus

che õ'tihi itäj, wachuhi t'at.

Wichi tä ni'isahen,

tätäy lhamel tä ihi tä Dios tatache.

₃Mat häp wichi tä isen lhäy'e lhip tä akäswethä

tä ihi tä Dios tatache, wet tiyäjchephä.

₄¡Tenay atenkay tä iwunit Dios,

lhäy'e tä lewujyen lhey!

¡Wunitay häp lham

tä yen lew'uteya pule lhayis!

¡Enay akäjyaja Lhawuk,

enay akäjyaja tä lheyayhi tä tatache!

₅Dios tä ihi Lew'et tä T'amajchet,

chipenhas lajcha t'at

wet tach'otehen tesalis.

₆Wet wichi che iyhäj newache,

Dios iwo lew'eta yämthilek lhamel ihi.

Ilanche n'okwenkay yämthilek hiw'en m'ayek,

mat häp wichi tä niwoyaye m'ak tä is alhoho,

lhamel imälhehi honhat tä niwohit m'ak che ihi.

₇Dios, tä lechunch'oye p'ante aka wichi

wet lenukwe honhat tä ts'anis,

₈wet honhat w'ahuye,

wuj pelhay tä tälh puleye,

tä am tä ahäpe Israel laka Dios

alen'älit tä lhe'pe p'ante chenaj tä Sinaí.

₉Wuj pelhay tä letsäype honhat,

yämthilek lew'atshancheyaj ihi

aka honhat tä tamchäy.

₁₀Wet aka wichi ihi t'at,

wet häp tä isej hap'altsenyaj

lew'enho elh tä p'elitsaj m'ak tä iwatlä.

₁₁Lhawuk iwo lhämeta

wet wujpe atsinhay tä yen silätyaja tä yok:

₁₂“¡Niyatey lhäy'e laka nifwotas

inukwe alhoho tä nowayhen!”

Wet atsinhay tä ihi lew'et,

lhamel hiw'en lhamhomche

m'ak tä õ'soyej lhamel tä yikhen.

₁₃Matkat amel lemälheyej aläy.

¡Hokwinaj lhafwis tä õhp'oyejche'pe plata,

wet oro tä lhäy'e lhip tä is

tä õhp'oyejpe lew'oley!

₁₄Häp ifwala tä Dios tä laj letumfwaya

yokwes häp niyatey,

hätet iwoye tä fwiy'et tä ipelaj

nichätpe chenaj tä lhey Chalaj.

₁₅¡Matche tä wuj tä atojphä

häp chenaj tä ihi Basán!

₁₆Amel, chenhas tä a'atoschephä,

¿chipte tä let'äytene chenaj tä Sión

tä Dios t'uhläk yen lew'eta?

Lhawuk yenla lew'eta yämthilek tiyäj'attsiy.

₁₇Wujpey kaletas tä häpe Dios laka'tshayajchal,

wet lham nekche tä tälhe Sinaí

wet ihoye Lew'et tä T'amajchet.

₁₈Dios, am leho'pe lhip tä atojphä,

wet lechäj amche iyhäj tä pajche lhäythen.

Letachumlä m'ak tä hin'ol yachaj ame tä Alewuk,

y'aje wichi tä tatayhlä m'ak tä is,

lhamel lhayachaj ame, Iwuk.

₁₉¡Lewujyaj ihi Lhawuk,

n'amel lhaka Dios tä lhafwayhyaj tälhe!

Nilhokej ifwalas lham tach'ot n'amehen.

₂₀Lhaka Dios häpe Lhawuk Lhafwayhthi,

wet ihanej iwoyneje yämthilek

ifwayhat n'amejen lhat'ilek.

₂₁Dios y'ajihomchela letayhfwas lhethey,

häp lhamel tä tujlhache tä iwoye lesukyajay.

₂₂Lhawuk yokwe:

“Onachajila alhoho amel

tä letälhe Basán,

onachajila alhoho amel

tä letälh lech'oye lewomekitaj,

₂₃häpkhilek apach'ol ichätejchehen

atayhfwas lew'oyis tä let'äsche,

wet aläy asinhäs iyähiyejena.”

₂₄Dios, ika Niyat,

ow'en wichi tä inukwe len'äyij,

ihoye Haw'et tä Amajchet

yämthilek n'okwi amej.

₂₅Iyhäj tä ichoywethä

ichunch'oye lhamel tä yikhen,

wet iyhäj tä tachuma lefwolis

imälheche len'äyij,

wet lhutshay ihi lechowej

wet y'ajiche laka panderetas.

₂₆¡Nilhokej amel, wunitay Dios!

¡Wujyenay Lhawuk, amel tä ahäpehen Israel leles!

₂₇Wet lhamel tä ichunlä iyhäj

häpe wichi tä tälhe letes p'ante Benjamín,

häp wichi tä niwuja'pe,

lhäy'e wujpe niyatey tä tälhe Judá,

tälhe Zabulón wet tälhe Neftalí.

₂₈Dios, n'älit akhajyhayaj,

mälhyej tä pajche lewoyeje olhamel.

₂₉Tä lhehi Haw'et tä Amajchet tä ihi Jerusalén,

niyatey ihän ame awayhtes.

₃₀Fwone Egipto tä hätet iwoye

m'akitaj tä fwuna lhele,

häp lhamel tä hätet iwoye w'asetas tä fwitses

tä yen lelesa wichi iyhäj wet niyatejen.

Lhamel t'uhläk hiw'en m'ayek,

häp tä tamenej tä yen kwenkaya wichi.

¡Dios, tsatkatpe honhat

häp wichi tä ihumin laka'tshayaj!

₃₁Nämhihena hin'ol tä tälhe Egipto

tä ichäj alhoho m'ayhay tä isis,

wet häp wichi tä ihi Etiopía

ipiynhiyela takweyey häp Dios.

₃₂¡N'oniyatyajay tä i'pe honhat,

choywethä tä lewunit Dios!

¡Tenay n'otenkay tä lewunit Lhawuk,

₃₃lham tä i'pe pule lhayis,

häp pule lhayis tä tälhe tä nech'enyaya!

¡Ch'ahuyaye lepak tä äytaji

tä ifwitsenej tä iwoye!

₃₄Hanayej tä Dios lakhajyhayaj ihi,

lewujyaj n'äl t'at tä iyej Israel lhayis,

wet lakhajyhayaj ihi pule.

₃₅Len'ohyaj ihi Dios tä ihi Lew'et tä T'amajchet.

Lham t'at tä Israel laka Dios

wet hiw'enho lakhajyhayaj laka wichi.

¡Wunit Dios!