Salmo|Sal 72

₁Dios, w'enho ha'isyaj

lhäy'e m'ak tä is alhoho häp niyat rey,

₂häpkhilek is alhoho m'ayhay tä iwoyeje

aka wichi lhäy'e ales tä p'elitses.

₃Is chik letamsek ihi honhat,

wet wichi ikalhi lakäywet.

₄Is chik niyat tach'ote wichi tä p'elitses.

Is chik ifwayhthen nä'tshas

tä lhokwey niw'ena m'ayek,

wet t'äspe hach'atkantses.

₅Is chik najit lepesa tä niyat iti amej lenowayhyaj,

tä kamaj fwala iche lhäy'e wel'a.

₆Is chik hätet iwoye pelhay

tä nitsäype hup tä w'atshan,

wet hätet iwoye ayas tä i'pe honhat.

₇Häp fwalas tä lham ihi leniyatyaj,

is chik lhäy'epej lhip n'otamsek

lhäy'e m'ayhay tä isen,

tä kamaj lewhäy iche.

₈Is chik leniyatyaj i'pe lewomekitas

lhäy'e nilhokej honhates,

tälhe tewokitaj Éufrates

yäk nichäte honhat lhip tä lepes.

₉Is chik letayhfwas lhayachaje häp lham

wet wichi tä yen lew'eta ts'anis takhoschufwi.

₁₀Is chik niyat tä tälhe Tarsis,

lhäy'e iyhäj tä tälhe lhiletas,

ichäje m'ak tä yen t'awayhata,

lhäy'e niyatey tä tälhe Sabá lhäy'e Seba.

₁₁Is chik nilhokej niyatey

itihiche honhat lakamchetey

tä ihi tä lham itayche.

Wet is chik nilhokej wichi tä i'pe honhat yen lewuka.

₁₂Tsi ifwayhthila elh tä p'elitsaj chik lhaip'altsene,

wet tach'othiyela elh tä iwatlä m'ayek

tä newache elh chik tach'ote.

₁₃Hip'altsenla wichi tä w'et m'ayhayhas t'at,

wet ifwayhthiyeja t'ilek

häp lhamel tä p'elitses.

₁₄Ifwayhthiyeja n'och'atkanyaj tä õ'tiyej,

lhäy'e tä õ'sowethä,

tsi wuj tä iwo lahaya lhamel.

₁₅Is chik pitaj len'äyij niyat rey.

Is chik õhw'enho häp oro tä tälhe Sabá.

Is chik najit lepesa tä õy'alhyene Dios wet õ'wunitpej.

₁₆Is chik wuj yachuyaj tä ihi laka honhat,

is chik lhäy'e lhip tä i'pe

chenhas lhipey tä atoschephä.

Is chik tälh lhoy,

mälhyej iwoye tä ihi chenhas tä Líbano,

wet is chik wujpey lech'anfwas,

mälhyej iwoye hon'al tä i'pe honhat iwo lhawoya.

₁₇Is chik wichi yenpej tichunhayaja niyat,

wet is chik letoyaj tiyäj'attsiy.

Is chik nilhokej wichi tä i'pe honhat

isej t'at häp lham

wet ikatej n'okäpfwayajay tä isen.

Wet is chik lhamel yen lheya N'okäpfwaytsek.

₁₈¡Lewujyaj ihi Dios, Lhawuk,

Israel laka Dios!

¡Ts'ilak lham tä yenlhi m'ayhay tä wus!

₁₉¡Wunitay yämlek tiyäj'attsiy!

¡Is chik lewujyaj tapoyej honhat!

Amén. Amén.