Salmo|Sal 74

₁Dios, ¿chipte tä lajit lepesa tä lewom olhamel?

¿Chipte tä letiyej awäk aka wichi?

₂En atichunhayaja tä alhen p'ante Lewuka

häp nekchämis tä pajche,

wet äp lesakanej p'ante

yämthilek lhen aka wichiya.

En atichunhayaja chenaj Sión tä häpe haw'et.

₃Lhu, lhek yahin tä wasi t'at,

atayhfwas iwasthi mälhewek häp Haw'et tä Amajchet.

₄Atayhfwas ihi naji Haw'et tä Amajchet

wet iwo letenekayej tä ikalhi aka wichi,

wet lhamel itihi laka banderas tä w'enha lhamej

₅wet iti'pe lepe.

Lhamel hätet iwoye wichi

tä yisthen n'olhetes tä ihi tayhi,

₆lhamel ifwajiche wet y'ajiche

tä iwo lhipeya m'ayhay tä hal'ä,

₇wet lhamel iwunho Haw'et tä Amajchet,

wet iwasthi wet ithat katsi.

₈Lhamel t'uhläk matche tä itäyhat olhamel.

Iwunhomche hupuy tä ihi honhat

tä olhamel oyenpej w'eta tä on'okwi amej.

₉Nemhit ow'en m'ayhay tä oyen tetnekayej

m'ak tä n'ot'amajchetes,

wet nemhit iche profetas,

wet ohanhiyejt'a ifwala che nofwila

m'ak tä mälhyejna.

₁₀Dios, ¿atsihila ifwalak noj

tä otayhfwas iläkwethä olhamel,

wet nemla yäm ame tä akni'isa?

₁₁¿Chipte tä kan'älita akhajyhayaj tä wuj,

mat letatsufwel at amej?

₁₂Dios, ahäpe t'at oka Niyat

tälhe ifwalas tä pajchehen,

wet wujpey tä lekalhipej

atayhfwas tä ihonhatena.

₁₃Häp tä isej akhajyhayaj

wet lech'esajche p'ante lewomekitaj,

wet lech'esajen lhethey

häp m'akitas tä lewomekitaj lheley,

₁₄wet lep'ajthi lhethey

häp lewomekitaj lhele tä lhey Leviatán,

wet lew'enho t'isan häp itshätäy tä fwitses

tä ihi ts'anis yämthilek tufw.

₁₅Lenuhatphä inät lhayis lhäy'e tewok lhayis,

wet lhäm y'imche tewok lhayis tä nhanayej che y'im.

₁₆Alewuk t'at ifwala lhäy'e honatsi,

wet iwel'a lhäy'e ifwala ihi t'at lew'et tä letihi.

₁₇Lewo lepeseya honhat,

wet lhenlhi lewhäy tä nahayhos

lhäy'e tä fwiy'etil.

₁₈Iwuk, tichunche tä otayhfwas ailäkwlhi

wet wichi tä ch'isukwis iti amej

lhämtes tä ni'isachehen.

₁₉¡Yej p'ethatlä olhamel!

¡Tek otkhajayhen, omälhyet iwoye pop lhayis!

¡Yej wahin n'oyejen wichi

tä tet iwoye itshätäy tä fwitses!

₂₀Tichunche ämet tä let'unhatche n'oyejen,

tsi honhat tapoyej wichi tä fwitses.

₂₁Wet yej tach'anlhaye tä õyen w'et m'ayhaya

iyhäj tä õ'lhaklit.

Mat fwayhthen lhamel,

yämthilek tej tä p'elitses

lhäy'e tä niw'ena m'ak, mat aiwunit.

₂₂¡Dios, nephä, akhajyen, yej alewahin!

Tichunche tä wichi tä ch'isukwis

y'enhiyejt'a tä ailäkwlhi.

₂₃Yej p'ethatlä tä atayhfwas t'än atape,

wet lhäy'epej lhip t'änyajay

lhamel tä tatay ahilä.